多年以來，日本國家隊已展現出東亞球隊面對其他洲份強敵嘅致勝之道。但不吐不快，筆者因為「有幸」睇官方直播（其實係被迫聽香港電視台即場旁述分析），更唔清楚噚晚場波邊個有份講（但最討厭就係曾偉忠），但粗略印象就係一班退役球員、教練同名嘴（如股壇吹水員般），反映香港普遍對外國嘅足球認知水平（非單指球員），實在低劣。
所謂致勝之道，無非就是全天候的交波走位，尤其於定點球同傳中球有多點觸球機會，即使身軀效小仍能取得入球；冇多餘控球；傳球準繩；球員體能充中，除耐力外，core muscle強度於中場爭奪，或守勢時前鋒對於保護皮球（反之，轉攻為守時第一時間爭奪皮球）尤其重要。
最令人厭惡嘅，係上述人等自恃有發言權，明明眼見日本經過哥倫比亞（雖然走運打多一人）同塞內加爾兩役（兩隊應該可以話係南美同非洲一線球隊）、競技水平通過驗證，但偏要話「踢到6分鐘都仲守到，日本隊算係咁」，「比利時呢場冇機會出真功夫，唯有下場對巴西先見到真實力」，「日本球員睇唔住盧卡古㗎嗱」云云。
真不知佢地是否盲到唔睇往績、場面（日本人面對體型相約，但力量仍明顯佔優嘅哥倫比亞同塞內加爾差，仍有力一拼，大家有目共睹），定係隨便將膚淺、懶惰嘅分析宣之於口。當日本入到波，一球、兩球，上述人等嘅意外反應同詞窮真係令人羞愧。
唔分析、齋評分，日本頭兩場整體有9分，攻守俱佳，失球都係個別一次兩次失誤，中前場傳頭走位搶截更堪稱東亞球隊教材，第3場（對波蘭）係以心理考驗為主。本場對比利時，筆者特別想點名讚彈幾位球員：
乾貴士（14號）。佢係有入波，但上半場浪費好幾個機會（把握力只達日職聯水平），面對左路傳中卻死右腳（唔一定係高波，有幾球簡單傳番去犄角位都做唔到）。守轉攻時有時控球過多同閱讀不足保守停留或向後（見15號）。
大迫勇也（15號）。已超出日職聯，4場波無論係死球，生球都做到保護皮球。佢既有能力頂入，亦識走位。先開紀錄幾分鐘後，日本本來有一球突破機會，可惜14號係守轉攻時毫無意識再下一城，交波俾15號（我覺得感受到同一種孤獨）。
柴崎岳（7號）。此君表現不錯，但仍有改善空間。猶記得佢（或10號仔香川真司）做咗幾次半施丹式轉身係中場保護皮球，但中後段欠缺侵略性動力（/體力？），浪費一啲快攻機會。
長友佑都。表現出色，難怪可以離開日職聯發展（編注：之前效力國際米蘭，剛正式轉投加拉塔沙雷）。以佢無限拼搏，相信佢返到老家後一定好恨自己點解唔再努力，將體能鍛煉得更好。
再回應一部分人嘅意見指，日本嘅機會只係來自對手有甩漏、表現不濟。但係足球對壘從來就係此消彼長，再者歐洲球隊嘅犯錯係來自比賽強度高、對手水平相當嘅情況下出現，更況且日本有能力把握得到對手犯錯，而其他東亞波冇——即如香港，就係分野所在。我唔係想讚日本隊上天，只係日本足球已達到咗脫亞入歐嘅水平（唔係稱霸亞洲或東亞咁簡單），唔係一場兩場嘅幸運。
資訊浩瀚；東張西望。
竭盡所能；深入求真。
企高一格；全新體法。