金融時報文：德國真正死因剖析，巴西西班牙比利時暫時發揮最好｜李聲揚
前言：本文原本只在我Facebook Page 寫，體嘢高生叫我可以放medium。雖然其會花多我少少時間，但其實之前我都有咁諗，畢竟放呢度會流傳得耐啲。兩個顧忌。第一係呢期我FB Page啲文都係外文翻譯消化加感想多，好似唔夠原創性，而之前只有原創嘅我先放呢度。但問過讀者普遍認為我啲譯文其實都唔係 「咁譯」，原創成份好重。第二其實都係同一個問題，例如FT嘅文其實科水訂戶先睇到，我係，但大把人唔係。咁譯篇文當然唔係問題（況且都話唔係咁「咁譯」），但圖呢？以後嘅做法就係盡量唔copy啲圖除非必要（但呢篇就必要）。copy必定講明。當然呢個唔係免死金牌，有事就去鬧高生啦。
以後應會多啲文放medium，譯文照放（其實之前講藝術品易偷難放嗰篇都係譯文啫）。係會花多我啲時間，但長遠嚟講應會流傳廣啲，更加 「傳世」。
Become an FT Subscriber. Gain a global perspective on the US and go beyond with curated news and analysis from 600…www.ft.com
（FT原文，當然要科水訂先睇到。我有，但好多人冇嘛）
繼續，FT用數據講暫時咩情況，邊隊最對辦。咁當然少不免要講德國做乜出事。留意Simon Kuper本身已經用冇咁「Stat」嘅角度寫咗次德國，驕傲自滿，熱情不再，呢啲比較入屋嘅分析。而其實Simon Kuper都寫好多數字嘢，就算唔係數據派都一定唔係反數據，因為個世界就係咁。鍾意矯情造作我對眼就係證據嘅就睇波事春秋啲膠文啦。
講返，其實講德國，呢篇講嘅，同我講嘅都唔差太遠。因為大家都係睇嗰啲數，大家都係嗰場波，雖然有啲香港人係平行時空唔知睇咩台嘅。其實就算唔熟足球嘅，有睇呢幾場，都發現德國控球時間好長，亦唔係冇攻勢，射門亦好多。但做乜咁少入波？（防守差就另一個課題）。
答案，正係xg，Expected Goal．多年前睇李照興寫書，講話Air Supply係一個底線 — 你同啲咩真係「音樂發燒友」講你鍾意Air Supply，係畀人鄙視的。同樣地，原教旨派守舊派磨墨派等等反Stat嘅，你講控球傳球還可（因為佢哋都識嘛），但一講到xg，就好多人同你反面了！亦係xg決定你係古老石山原始人（或者真正有熱情嘅足球狂熱者，佢哋話），定係一個受過教育嘅中產知識份子（或曰唔睇場波對住維基寫文嘅人，佢哋話我）。
xg，槪念唔太難。小禁區起腳以往見到有五成機會入，咁嗰腳xg就係0.5，你全場有兩腳就係xg 1 。即係應該入一球。咁當然可能係兩球入晒，或者一球都冇。等於擲公字啫，基本常識。呢啲都唔知就真係返屋企磨墨講熱血算了。同樣地，可能三十碼狂抽xg係0.3。畀你擺定三十碼罰球射又高啲，係0.4。之類。咁當然又係嗰句，冇系統完美。射門幾多控球多應該係客觀的，個個都係數到咁多。但xg，人人計法不同。例如你三十碼罰球，對面果個係卡里奧斯（即係咁講）定保方先？唔會計。你小禁區頭槌，有冇人壓住？多數系統會計唔同。但我禁區邊起腳，慣用腳同唔慣用，你又分唔分？唔知。另外，冇起腳嘅就乜都唔計。例如墨西哥對德國嗰啲，三打一但佢傳咗出界，就唔會計入去。有人話如果傳到呢？咁你傳到兼起咗腳先計。因為你冇起腳係真係正常唔會入波嘛
但，同擲銀仔一樣，xg呢啲嘢，長線當然幾準，正如你掟一萬次應該係公一半字一半咁。但你掟十次就可能真係十次都公。
你話唔信stat？以前啲波有激情？發唔發現其實而家所有隊都係passing game，中短矩離傳波。你再唔見以前嘅長傳急攻高Ｑ大棍。唔係而家啲前鋒細粒咗（當然因為呢種戰術沒落，高佬開始冇乜優勢，另一樣嘢），而係有數字睇就知唔work．同樣地，而家嘅球隊比以前嘅少咗好多遠射。正係Simon Kuper本書所講，遠射係有型，球員記得一世，球迷都記得 — 但之前三十幾球唔入。係冇效率嘅。你見曼城巴塞皇馬拜仁之類（其實，即係多數頂級球會），係少遠射的。同樣道理亦係，而家多咗好多人開短角球，唔係一棍斬入去。
個圖比較咗德國同其他隊。德國射門次數係極多，但xg低。更大劑嘅係，佢哋嘅總xg其實都唔算好低（因為射門真係極多），但係由好多好低xg嘅加埋一齊。咁我冇證據在手，但相信同樣係1 xg，兩球半單刀，係好過三十球三十碼抽射嘅。你睇德國，甚至連0.5嘅xg都冇做過。西班牙比利時英格蘭都有。德國好多射門都係心急，遠射，人群中照射，或者角度差都夾硬嚟。矛頭當然直指中鋒添姆雲拿。
唔止，德國其實xg都唔少，一時搵唔到數，但，佢地xg總共有5以上，但只係入得兩球波。睇返德國嘅射門質素，係同突尼西亞摩洛哥差不多（但其實，好過墨西哥）。
結論，德國射門多，但中龍少。中到龍嘅都在啲差嘅位起腳射。而就算射到嘅，入波都同應有嘅xg（已經計及佢哋射門嘅位差）仲要低。邊個負責？都係我篇文講，由路維到球員，人人有責。啲友亂咁射，當然係教練有責任。做唔到高質嘅埋門，你可以怪進攻中場（奧斯爾）畀嘅波唔夠靚，最好下下比到去單刀畀你射。但觀乎奧斯爾造到咁多波，全部變晒低質射門，接應嗰啲居然唔分返一半責任？傳個位差，搵支槍迫住你要射？
文章下半截，提到xg其實偏袒咗對弱隊嘅隊，你對住巴拿馬梗係下下入到禁區射，英格蘭大炒巴拿馬六一，唔及哥倫比亞數波蘭三蛋咁勁。所以佢計埋得勝機會（正係用Elo rating）。計及呢啲因素，德國製造嘅機會，其實冇想像中咁多（應該話，多係應份嘅）。英格蘭其實都唔見得好好多。反而巴西西班牙先係勁抽。比利時都強
中間再講防守，其實之前有文講過，唔講太多。最少畀人製造到機會嘅，法國烏拉圭。德國呢？其實又冇你想像中咁多。所以都係有啲黑仔
講到尾，計及創造機會嘅能力，同人地起腳嘅機會，最堅都係巴西，比利時，西班牙。英格蘭都ＯＫ。最奇怪係，其實德國都在前列。
所以德國嘅問題又未必係想像中咁大。其實機會做到，防守冇你想像中咁差。但起腳嘅位置好差。咁再諗多次，真係進攻中場嘅錯？定起腳嘅多啲責任？畀個位你，唔靚，咁你仲夾硬射？又怪進攻中場？
當然，我始終覺得德國都係欠啲運。但有睇三場波嘅，亦不能否認以佢哋嘅表現，特別係第三場，就真係不值得出線的。
