【讀者來稿】世界盃fantasy玩法懶人包｜Eason

大家好，我係Eason。第一次喺體嘢出文就講解今年世界盃fantasy嘅玩法。我盡量用最簡短嘅文字令大家明白，希望大家睇完呢篇文會對世界盃fantasy有所幫助，有咩問題歡迎大家交流一下，最緊要大家玩得開心！

首先去 fantasy.fifa.com/ 登記，幫自己隊波改名，然後就可以揀人啦。

一隊波要揀15人，包括：

龍門 x 2

後衛 x 5

中場 x 5

前鋒 x 3

11個正選球員，4個後備，再要揀1個隊長。而你揀選嘅隊長將會獲得雙倍分數。

呢度有一個限制，就係每隊波來自同一國家嘅球員嘅數目係有限制嘅，上限如下：

分組賽 – 3

16強 – 4

8強 – 5

4強 – 6

季軍戰及決賽 – 8

唔使擔心唔記得，因為揀人嘅時候，如果超過上限，系統會prompt你，確保你嘅隊伍係合符規格。

可以選擇嘅陣式包括：

5-3-2

5-2-3

5-4-1

4-4-2

4-3-3

4-5-1

3-5-2

3-4-3

呢度亦唔需要諗太多，只需要按照你隊波嘅長處短處嚟揀就ok。譬如你3個前鋒都好強，咁當然就係揀3個前鋒嘅陣式啦，相反如果你嘅重點投資係後衛，咁就應該選用5後衛陣式喇。

預算

分組賽有€100m畀大家揀球員，去到淘汰賽開始就有€105m。

球員價值

分組賽時，球員價格唔會變，但去到淘汰賽開始，球員價格就會視乎分組賽表現而有升跌。

手動換入球員機制

世界盃fantasy好玩嘅係，每一日賽事完結後，可以喺第二日賽事開始前手動換入表現差嘅球員。我會用呢張圖輔助解釋。

1. 喺同一round賽事入面，大家可以喺後備席揀任何未比賽嘅球員入替已上陣比賽嘅正選球員。例如普巴踢完第一場個分好低，你可以揀後備席未踢第一場嘅柴崎岳換入佢，博柴崎岳更高分。

－唯一例外嘅係，如果該位球員拎紅牌，咁就唔可以換走。

2. 嗰輪賽事嘅最後一場完結前，可以無限換入球員 (i.e. 最多換4個 – 因為一隊波本身就係4個後備球員)，完結後就唔可以再手動換入球員。
3. 隊長人選都可以換嘅（拎咗紅牌除外），例如美斯踢完第一場好低分，你可以揀任何球員代替佢做隊長（例如柴崎岳），希望拎更高分。美斯將不會再有雙倍分數，柴崎岳則會有雙倍分數。同換人一樣，球員一日未踢，都可以換入，踢左就冇得換入。
4. 留意返，換走咗嘅球員將會變成0分。一旦確認咗換人同換隊長，就唔可以取消。意思係就算換人嘅球員或換咗嘅隊長所得嘅分數比原有嘅低，咁都無辦法。
5. 一旦啟動咗手動換入球員機制，即係話你進行過手動換人嘅操作，你嗰輪賽事就唔會有球員由系統自動換入。以上兩項只能二擇其一。

如果無手動換入任何球員，遊戲會幫你自動進行換人。規則好簡單：

正選11個球員入面，如有任何球員喺全場比賽中都無上陣，嗰個球員就會由後備球員入替。(會按你後備席嘅先後次序去換入)

可以參考返同一張圖：

1. 如果連加特無上陣，就會由後備1山齊士入替（陣式會變成5-3-2），但如果山齊士都無上陣，就會由後備2柴崎岳入替，如此類推。
2. 後備龍門只會入替無上陣嘅正選龍門。

要記住球員就算只係上陣一分鐘都會被視為有上陣，會計分，所以揀15個球員嗰時都盡可能揀長居正選嘅球員，而後備席亦最好都排一排個順序。

免費轉換球員名額

講左咁耐，大家應該都想開始執下個陣容喇。頭先講過啦，陣容係有budget嘅限制，同埋同一國籍球員嘅數量限制，但如果大家有玩過其他fantasy遊戲，一定知道其中一個有趣嘅地方，就係買賣球員嘅部份。咁幾時可以進行球員買賣呢？以下簡單為大家解釋一下。

第一輪分組賽開賽前：無限

即係話開波前，大家可以任意轉人，直至組成一隊完全啱晒你心水嘅陣容為止。

第二輪分組賽開賽前：1個

第一輪踢完之後，第二輪開踢之前，大家可以無條件喺陣容上作出一個球員嘅調整。想轉更多球員都得，不過每一個extra調動要先扣四分。

第三輪分組賽開賽前：1個

第二輪踢完之後，第三輪開踢之前，大家可以無條件喺陣容上作出一個球員嘅調整。想轉更多球員都得，不過每一個extra調動要先扣四分。

16強開賽前：無限

16強開賽前，大家又可以再一次無條件無限制地執球隊陣容。

8強開賽前：3個

16強踢完之後，8強開踢之前，大家可以無條件喺陣容上作出3個球員嘅調整。想轉更多球員都得，不過每一個extra調動要先扣四分。

4強開賽前：5個

8強踢完之後，4強開踢之前，大家可以無條件喺陣容上作出5個球員嘅調整。想轉更多球員都得，不過每一個extra調動要先扣四分。

季軍戰及決賽開賽前：5個

4強踢完之後，季軍戰開踢之前，大家可以無條件喺陣容上作出5個球員嘅調整。想轉更多球員都得，不過每一個extra調動要先扣四分。

喺度再強調多一次，如果想轉換球員，而無條件嘅轉換名額已經用完，咁其後每轉換1個球員，球隊總分將會被扣4分；即係如果extra轉換2個球員，總分將會被扣8分，如此類推。而每一輪賽事嘅分數則唔會被扣嘅。

擺喺度無用過嘅免費轉換球員名額唔會累積落下一輪。所以唔使慳住嚟使架。

最後，介紹幾個特別道具。

WILDCARD：

畀你無條件無限換球員。

－只可以用1次

－只可於該輪賽事前用

MAXIMUM CAPTAIN：

自動幫你喺嗰輪賽事當中嘅11個球員裏面揀1個最高分嘅球員成為隊長。分數照樣x 2。

－只可以用1次

－只可於該輪賽事前用

BENCH BOOST：

正選連後備15個球員都會獲得分數。

－只可以用1次

－只可於該輪賽事前用

每一輪賽事都有截止時間，大家記得mark低，唔好唔記得換人呀！

TL﹔DR

大家最關心嘅係應該點計分，睇下面呢個表就一清二楚啦。

分數計算：

註1：*所有計分只係計到加時

註2：*球員紅牌出場後，球隊失波所扣分數會繼續計

呢個咁簡單嘅懶人包就嚟到呢度先。玩fantasy當然有獎品，官方每一輪賽事嘅頭三名都會有獎，總冠軍更加有部車！最搞笑係有fifa 18一隻，fifa 19都出啦大佬！最吸引係有今年32強球隊隊長簽名嘅隊長臂章！不過，要挑戰全球玩家，並要喺佢地之中脫穎而出並唔容易，所以，最重要嘅係體波台個private league嘅贏家都會有獎品，聽聞仲會係總編喺俄羅斯親自帶返嚟嘅添！大家快啲join我哋個league啦！

體波台private league code: MXWDJIPH

期待喺體波台同大家多多交流研究﹗ J

Eason

體嘢編輯部

資訊浩瀚；東張西望。
竭盡所能；深入求真。
企高一格；全新體法。