話咁快，分組賽已經踢晒。對於fantasy玩家嚟講，16強之前嘅呢個short break相當重要，因為喺分組賽後，淘汰賽前嘅呢段空檔，大家係可以無限制地任意買賣球員﹗留意，呢次係最後一次有得無限量轉換球員，所以真係要諗得周詳少少，因為之後先再修正的話，代價可以好大。
首先，大家可以再study多次餘下嘅比賽日程：
16強
6月30日: 2場
7月1日: 2場
7月2日: 2場
7月3日: 2場
8強
7月6日: 2場
7月7日: 2場
4強
7月10日: 1場
7月11日: 1場
決賽 + 季軍戰
7月14日: 1場
7月15日: 1場
16強嘅組軍嚟講，大致上可以有2個方針。先講第一個，分散投資。
16強有4個比賽日，8場比賽，8支晉級隊伍。8強開賽前，大家會有3個免扣分嘅轉換球員名額。如果組軍上真係可以做到15個位置用足來自15隊嘅球員，再加上完round後嘅3宗買賣，即係話到8強嘅時候，你可以確保至少會有10位 (7 + 3) 未出局嘅球員喺陣中。
但，你要知道，世事總唔會咁完美。無論係budget所限又好、某啲場次真係冇心儀球員又好、對某幾隊晉級特別有信心都好啦，即使分散投資，大部份玩家可能最多都只能做到係有來自11-12隊左右嘅球員。咁但係，基本上如果爆冷情況唔太嚴重，而大家又好正路咁揀多兩、三位來自相對較熱門球隊嘅球員，要保證8強時有10-11個未出局嘅球員應該問題不大。
呢個做法嘅弊處，大家應該都唔難諗到，就係穩陣得嚟，爆高分嘅機會亦唔大。好簡單，頭先話有8隊晉級，即係都有8隊出局。如果真係徹底咁分散投資，難免會有幾個輸波 / 表現唔好嘅球員喺陣中，咁對於要爭取高分就冇咩幫助喇。加上而家開始每一階段嘅比賽後，球員身價都會有升跌，早入貨就可以慳到少少錢。
剛才提到嘅呢個方針，對所有玩家都適用，尤其係如果暫時成績幾好嗰批，就更加可以有條件穩穩陣陣去玩。不過接下嚟講嘅第二個方針，就唔係人人適用喇。呢個方針，主要適用於未使用wildcard嘅玩家。揀人嘅策略係，唔理球隊晉級機會，唔考慮之後兵源有幾妥善，總之淨係考慮16強嘅比賽。譬如，你認為呢輪賽事入面，卡雲尼、哈利簡尼同美斯都好有機會入波，但同時你認為烏拉圭、英格蘭同阿根廷將會被擯出局。喺呢個策略下，冇問題，你可以照入晒三個而唔需要擔心下一輪太少球員上陣嘅問題，因為呢輪之後，你可以嚟個wildcard。
呢個做法嘅好處係咩？一來，你可以盡用你嘅心水球員，而唔使諗咁多其他嘢﹔二來，如果你嘅眼光夠準，呢一輪尚有多少強弱較懸殊嘅比賽，係揀中高分球員爆分嘅好機會。如果你搏贏左，揀做重心嘅幾支球隊都晉級，咁就最好啦，但即使不幸落敗，但你仍然有wildcard可以重新再執過，因此可以係無後顧之憂咁去搏，而代價可以話係零成本。
呢個做法嘅好處係，如果你真係料事如神嘅話，你獲得高分嘅機會就大增。而即使搏輸左，仍然仲有wildcard呢個安全網，唔怕成個陣充斥已出局人士。壞處就好簡單，風險非常高，同埋對玩家嘅道具有一定要求。
另外提提大家，呢個時候亦係bench boost嘅好時機，因為無限量轉會下，想要咩人都可以揀，理論上真係可以15個位都放啱用嘅球員，咁樣bench boost嘅威力就可以放到最大。
最後想講埋maximum captain。大家可以睇返上文個賽程，你會發現，16強之後，每輪都係得兩個比賽日。咁即係話，你只有一次轉captain嘅機會。16強有4個比賽日，已經係最後機會去享受呢一點，因為captain仲可以轉完又轉，等到高分嗰個為止。喺少機會修正captain人選之下，呢個人選就變得更加重要，於是我會建議留返8強或之後先用，務求喺較少機會修正captain人選下幫到自己，maximise呢項道具嘅價值。
好，今日就講到呢度，祝大家有個愉快嘅體驗。有咩回應或者心得想討論下嘅話，歡迎喺度同大家傾下~~
Box to Box
