德國恥辱出局 一個循環的終結｜李聲揚
快手寫下德國出局，希望唔好寫太長。
唔使講我捧咗德國幾多年，今次出局我唔係特別傷心。我亦冇逃避咁轉為話抵死，雖然都真係幾抵死。
我最開心嘅係，今次真係可以全城圍插德國隊。想佢死嘅阿根廷英格蘭迷固然開心，但就算德國球迷我見都係怒插多過傷心。反路維嘅好，支持路維嘅好，而家都好團結。真係幾多年未見過。即使2014年捧盃都冇咁團結，講真的。
但唔好誤會，至少我唔係將個矛頭指向路維。路維有一定責任，之前好多人鬧過，不重覆。但Given That德國兩場拎咗三分，隔離瑞典又大炒墨西哥，德國只係要入韓國一球。但都做唔到，咁冇可能只怪落路維度。衰啲講句，就算半場路維死咗我去教，都唔應該咁。最後輸埋就只係更加難睇。但即使失波之前，德國都係好唔掂。
第一場對墨西哥，可以話輕敵，球員狀態未入局，估唔到人哋咁樣打反擊（比亞荷夫係咁講），加上自己埋門冇乜運。好啦，第二場，面對第一場落筆打三更嘅壓力，再加上先失波。踢到荒失失我可以理解。但好彩又好血性又好乜都好，神推鬼撞又二比一反勝。士氣應該好返晒啦
韓國隊有幾水皮，大家見識過。佢地啲反擊係冇威脅嘅，最後入波第一球小小幸運，第二球係德國殺晒上去。但我想講嘅係，德國在組織上，攻擊上，呢場甚至比對上兩場更差。即使未失波，其實都冇幾多個好嘅機會。勉強就係哥利茲卡近門頭嗰球咯。但頭兩場機會肯定仲多。
半場時，我都仲審慎樂觀。覺得德國留返下半場先谷。好啦，開波出嚟係谷過一陣嘅—如同對墨西哥開波時一樣。咁你對墨西哥比人係咁反擊仲三十分鐘失波就冇計。但對住韓國，就係咁？
即使去到明知瑞典領先，德國面臨出局（但同時間，德國只需要一個入波咋喎），我都唔覺得班球員想贏。你唔知前因後果，直頭覺得德國已經出咗線添。喂大佬，你地唔想贏不如早早棄權啦，唔好浪費球迷時間嘛。
真係喎，德國去到下半場中後段，都完全係谷唔起。有幾球波可能冇運，無人看管都頂唔中龍。失嘅兩球波，都算。前面傳失好多波，咁我當你心急。但其實成隊根本都好似唔想追唔想跑咁。
我諗啲球員真係太累了。唔知係身體上定心理上。第一場我見德國有想過反撲，唔係太有效但收貨。第二場失波後我見到有心追。到最尾十打十一德國仲壓住瑞典砌，谷上去。我都收貨。偏偏去到今日，你見啲球員好似已經冇心或冇力再去追波。
我唯一比較欣慰嘅就係可以掃走啲球盲。你話奧斯爾唔掂奧斯爾懶？今場佢交足功課（當然去到九十分鐘都係冇力），隊友生性啲入咗波啦。我甚至覺得佢係成隊表現最好嗰個。你話達斯拿唔掂？咁冇用佢啦，兩場都冇用。結果今場又點？基迪拉人人都話唔掂，我都話佢好唔掂。但今場出返佢，佢又係咪特別差呢？又唔係喎
因為個個都咁差咯。連上兩場表現幾好嘅萊斯同卻奧斯（當然唔係完美），都係一無是處。湯馬士梅拿可能成為早熟早殘嘅典型教材。提提你：佢2016已經一球波都冇入,，今屆一樣食蛋。
所以，你話鬧路維，我覺得冇意思。第一場失利你可以賴佢。但今場踢成咁，邊個球員話係路維嘅錯，就係佢不負責任。我話知佢出乜人打乜陣，都不可能係打成咁的。我未有賽後數據，但幾肯定韓國跑得仲多過你—而人地基本上係篤定出局。你堂堂衞冕冠軍，個撚個踢大球會，賺人地幾十倍人工，有乜面目見人呢？
未睇賽後新聞，期待遲下有冇人爆出德國內部不和—但其實又真係唔係太似。
另一個罪人，係德國足總。上篇都鬧過，做乜要同路維續約續到2022？等佢專心帶波？佢好忙咩？定冇人識得教波？
唔係馬後炮，但波就係咁，你好難分到係球員勁定領隊勁。我都一度迷信路維。但今年熱身賽我開始同意朋友Nic所講，喂，邏輯上，唔係話你拎世界盃一定係天才咯。我唔會一屆（雖然計埋友賽都好多場）將佢踢落地獄，但，好難說服我話世界盃冠軍好大程度係佢功勞。
我覺得對韓國失利係球員嘅錯多過路維。但，稍為返工返耐啲嘅，都知咩叫問責架啦。你激勵唔到班友，佢地遊魂唔想賣命，當然你都要負責啦。
好啦，路維唔係教得好，但我唔敢話佢教得特別差。現實係德國足總一早同佢續約到2022—而我唔覺得足總會炒佢，亦都未必真係應該咁做。掉轉頭，路維你自己有啲廉恥嘅，就唔好阻住地球轉，起身走人啦。拎返啲尊重。
關唔關佢事都好，我好感謝佢對德國足球嘅貢獻。但就算係雲加都好，人做一個位做得耐，自然就懶，自然就睇唔到世界，開始以為自己最醒，睇唔到問題。所以你見啲大公司好多時幾年就換一次CEO。同一個人玩得太耐，就會有問題。我信足總唔會炒佢—但教到分組賽出局，仲要包尾，仲要對韓國。只計呢屆，你真係衰過2000列碧克（列碧克當時手上冇牌可用，而且同組對手都唔差）。
球員呢，一樣，我好感激佢地為國家隊付出咁多。我亦唔會怪任何一個球員。但，係時侯了。我唔知下手教練（或路維繼續玩）會以老帶新定點。但我傾向覺得，應該大洗牌。由紐亞到保定侯姆斯，到梅拿奧斯爾萊斯（卒之完咗世界盃心願，仲有波入）卻奧斯基迪拉，其實要玩埋2020都得，甚至玩到2022都仲得。但，退下來吧。捧過盃咪算。明顯地睇到佢哋冇咗爭勝心了
賽前都有講，呢屆德國似1998，不幸言中。當屆賽前其實已經唔多掂，但大家信德國係「大賽球隊」（事實都係）。當年對墨西哥已經係先失波，之後靠球員質素反勝（同今年對瑞典一樣）。到八強對克羅地亞就比人炒獲勁，正式進入黑暗年代—但唔好忘記，當年克羅地亞實力其實強橫，德國仲要十一打十，但又係老土講句，啲球員都仲有盡力。表現係遠比今場好。
我成日講，其實捧德國係幸福嘅。特別係年青過我嗰啲。其實個低潮期真係唔長。98年後係黑暗期，但好歹都入到00決賽周。之後慘敗。去到2002年外圍賽仲比英格蘭大炒5-1（但唔好忘記德國作客都贏到波）。但去到2002決賽周又幾好彩地入到決賽。2004又衰過，然後去到2006變返盛世，之後打親大賽都入四強。
更重要嘅係，呢個週期中，其實真係冇乜邊場我覺得德國係打得好而輸波。輸親都技不如人，唔係黑哨或乜。唯獨係2016我唔順氣，覺得踼多次德國會贏。
不過又放心，德國打後點都好，都好難會重演當年98年出局後咁大鑊。你睇而家青年球員其實係有的。未必好夠班，甚至接唔到捧，甚至將來一兩屆大賽只會成為黑馬。但唔會好似98年咁大鑊咯.
無論如何，波輸咗，輸得好難睇。局又出咗，出得好難睇。人腳係有嘅。唔好奢望咩下屆就彈返起，但應該大刀換人—我寧願你犧牲埋2020嘅成績，夾返班好嘅人打上嚟吧。
自己下台吧，路維。球員們，自己退隊吧。未必係你哋嘅錯，但捧盃有時收檔有時，去到呢個位見好就收啦。捧過盃咪算。
