話咁快去到最後一輪賽事，有幾隊已經篤定出線16強，有啲隊仲要拼到最後，唔係就要返屋企。如果大家仲有wildcard喺手，我就建議喺呢一輪用喇，因為相信唔少強隊都會收起部份主力，熱門球員都可能休息，好似克羅地亞同比利時就講明話會有輪換；比利時方面甚至話夏薩特、 盧卡古、梅頓斯有傷。咁嘅情況下，真係唔建議留佢哋，就算佢哋出，我諗都會留力。另外，出咗局嘅球隊都唔一定無表現，話晒四年一次，都要向國民交代，有時冇左包袱冇壓力下，發揮更佳都未定，而個別球員都會搏盡，希望有其他球會簽佢哋，加吓人工都好吖嘛。今輪我就有以下球員推介畀大家！
後防：
Ricardo Rodríguez（瑞士，身價5.5）
瑞士最後一場會對已出局嘅哥斯達黎加，只要和波就能夠出線。對手今屆不再神奇，仲係零入球，要避免做三零部隊，可能會極力爭取入波，但似乎真係無乜板斧。揀Ricardo Rodríguez嘅原因都係貪佢有助攻、有遠射、有12碼，簡簡單單，唔諗咁多，不如考慮下佢。
Ruediger（德國，身價5.5）
Boateng紅牌要停賽，Ruediger好大機會會正選上陣，雖然見佢哈哈碌碌，但對住一人球隊南韓咋喎，Cleansheet應該好穩陣，加上佢喺過去一季喺車路士都少少地入咗兩球，搏埋佢入波，身價5.5喺德國隊嚟講真係幾抵玩。
昌子源／酒井宏樹（日本，身價4.0）
我諗賽前都無乜人諗過呢隊日本隊竟然有機會出線16強，佢哋最後一場對波蘭，對手提前出局都令人大跌眼鏡。日本只要賽和就出線，相信都會以守為先，而波蘭睇落放棄居多，昌子源同酒井宏樹身價只係4.0，屬最平價後衛，執個落去搏Cleansheet，然後其他位置放啲高身價球員，似乎係明智之舉。
中場：
Ziyech（摩洛哥，身價7.0）
摩洛哥雖然出局，但佢哋鬥心極強，進攻悅目，啲波夠晒好睇，入唔到波真係唔抵。對住有碧基嘅西班牙，Ziyech隨時搵到啲甜頭，加上西班牙亦都係和波就出線，如果A組首名係俄羅斯，隨時睇住嚟踢，留力走下線都唔出奇。Ziyech下季隨時出走阿積士，要搏表現吸引大會，得番最後呢一場！
Layun（墨西哥，身價5.5）
依家墨西哥唔係出硬線，佢哋最後一場會對瑞典，對手要晉級16強都真係焗攻，後防容易暴露空位，真係啱晒今屆打反擊幾好睇嘅墨西哥，雖然有時把握力同決定都係麻麻，但好多時Layun反擊道跑得好快，走到最前，都有機會起腳，搏佢入波或者助攻！
Quintero（哥倫比亞，身價5.5）
頭兩場賽事，Quintero都係拎6分，以身價5.5嚟講真係超值。哥倫比亞最後一場幾贏波就會反壓塞內加爾出線，日本都入到佢哋兩球，哥倫比亞唔係唔得下嘛？正路都會揀Falcao同James Rodríguez，但如果中場想搵個低價球員，不如搵Quintero啦，近年佢都係被波圖外借去其他球會，我諗佢都想爭取表現，返去歐洲主流聯賽搵食嘅。
前鋒：
Musa(尼日利亞，身價7.5) 過去一兩季Musa喺李斯特城真係無乜表現，上季冬季更加要返去莫斯科中央陸軍「剷雪」，啱啱對冰島入咗兩球，可以話係吐氣揚眉，面對住依家呢隊咁不濟嘅阿根廷，超霸鷹要出線真係毫無保留，相信Musa喺阿根廷嘅防線會搵到唔少甜頭。
Finnbogason(冰島，身價6.5) 對住已出線嘅克羅地亞，冰島要出線都係要焗攻，要揀攻擊球員，我就信任Finnbogason多過中場Sigurdsson，始終覺得Sigurdsson傷員完嘅狀態都係麻麻，加上上場射失12碼，而Finnbogason有喺友誼賽射入12碼，隨時取代Sigurdsson做埋劊子手！
巴西攻擊線球員：
巴西上仗幾經辛苦贏兩球，基本上不敗都出線，但相信佢哋都會唔留手，務求入波擊敗塞爾維亞。杜格拉斯哥斯達上場入替後表現活躍，今場正選都唔出奇。加上尼馬、捷西斯、古天奴，點都揸個喺手，望佢哋有高分落袋啦。
推介完球員，有啲隊伍我會勸大家避一避，包括俄羅斯、烏拉圭、英格蘭、比利時、法國同克羅地亞，因為真係好難估佢哋輪換乜嘢球員。
如果真係要揀，我會推介以下兩個球員：
Kramaric（克羅地亞，身價8.0）
Rashford（英格蘭，身價8.0）
Fekir（法國，身價8.0）
最後，再講多次，如果大家仲有wildcard喺手，喺呢一輪用啦，可以再加Bench Boost一齊用（同英超fantasy唔同），盡量揀啲要搏命嘅球隊，大膽啲可能係揀5隊，每隊3個，啱啱15個球員。淘汰賽應該唔會咁多波入，要搏高分真係呢一輪，祝大家好運，繼續揀邊個，邊個就爆分啦！
Eason
資訊浩瀚；東張西望。
竭盡所能；深入求真。
企高一格；全新體法。