德國二比一反勝瑞典賽後評：有改善，但仲有更多改善空間｜李聲揚
1. 今場難評，上場易評。今場評德國有啲難度，絶對比起上場更加難評。上場波好多人怪罪迪斯拿，奧斯爾或基迪拉。頭兩者我不盡同意（但基迪拉似乎係萬人齊小）。亦都有人話唔應該打4231，應該出返三中堅，真係個個係專家。我都有估過路維會本死無大礙，賽前亦有傳出佢會用三中堅，但結果都係冇。關鍵可能係侯姆斯話頸傷（畀路維叉頸？留意佢上次賽後抨擊球隊。不過由佢賽後好快手出post恭賀球隊嚟睇，似係真傷而唔係畀人雪），侯姆斯既傷，如果仲玩三中堅就要出兩個稀客拍保定，太冒險吧。但上場暴露咗兩閘攻得太上，以及6號位形同虛設，防反擊極差，呢啲問題就真係人人睇到。今場變咗陣，拎到寶貴3分，仲要係絶殺反勝，大家又可以狂打日耳曼精神嘅飛機（事實上德國1974年之後冇試過半場落後可以追得返）。對手瑞典亦似乎比墨西哥差，所以幾難比較。但整體嚟講，我覺得德國發揮都係比上場好
2. 戰術陣式差不多，只係人換人。結果德國抽起咗奧斯爾同基迪拉。以路維嚟講已經好大膽。奧斯爾之前打四屆大賽都係場場正選。基迪拉亦一路係重臣。一次過換走兩個，又唔可以話路維死唔肯變。現實亦唔到佢唔變。佢選擇用魯迪取代基迪拉，而萊斯就取代奧斯爾。另外上面都提過，魯迪加取代侯姆斯。仲有左閘赫達復出，取代上場表現都幾唔掂嘅柏汀赫特（但呢個預咗，赫達只係上場感冒先冇出）其實都係同一個陣式，只係換人不換打法。但你話係咪又打得好好？又唔知。因為魯迪三十分鐘已傷出，然後德國失波，下半場又再變陣，所以有啲難評估。
3. 但整體嚟講，啲問題算係有改善。當然唔知道有幾多係因為瑞典明顯不及墨西哥有關。兩閘攻得太上嘅問題其實冇乜改變，甚至路維可能根本唔覺得有問題。但至少見到幾樣嘢。第一，相對地，而家一邊閘上去，另一邊係會守返後啲，而今場依然見到係右邊進攻多。但以赫達本人嘅標準嚟睇，佢已經比較多時間留在後面。第二，整體防反擊，其實係好咗嘅。你話瑞典把握力好啲入多幾球，其實瑞典真係冇幾多個好有威脅嘅埋門，點都比德國少。當然亦同佢哋球員唔夠快，又唔識用兩邊空間有關。
4.睇返三個入球，其實都同卻奧斯有關。第一球佢固然係罪人，但都有啲唔好彩。冇錯佢係面對面交失波，以佢嚟講都幾少見。但呢球其實唔係咩好快速嘅反擊。德國係在後場開死球準備轉守為攻時，佢交失波。所以你睇到多數球員係向瑞典嗰邊跑緊，而甘美治都仲企得後過卻奧斯，右上角果個應該係赫達，都未過晒半場（但已經返唔切）。德國其實係夠人嘅。
德國失嘅一球，卻奧斯傳失波後，其實瑞典完全唔係快攻，你見德國都仲夠人，卻奧斯已回防緊。但赫達攻咗上去（右上角嗰位），再快都返唔切。咁所以中堅嘅魯迪加去咗追人哋邊路球員，係十分正路嘅做法，雖然佢閘唔切。中間點？失波嗰腳，其實你見瑞典入波嘅球員仲有保定同卻奧斯兩個一齊夾擊。所以唔係話唔夠人話咩大失誤。瑞典笠一個過頭波去到中間，入波嘅又係一個笠射。福至心靈又好好彩又好紐亞唔應該咁輕出又好，但總之，我唔覺得呢球係好似墨西哥嗰場咁嘅問題。其實卻奧斯交失波時真係唔覺得呢啲位太危險，咁就失波，不幸多過要鬧人。仲有留意嘅係，其實失波正係魯迪傷出根度簡入替後一分鐘唔夠。唔係邊個球員嘅問題，而係個分工好似仲未清楚。魯迪在場時明顯佢係逗後嗰個，但到根度簡出咗嚟，卻奧斯就似乎做咗逗後嗰位（當然因為根度簡一出嚟後德國就失波，可能係戰術上改變）。不排除根度簡一出嚟時卻奧斯根本未係好知咩事（雖然佢球波正係想交比根度簡）
追和點解又關卻奧斯事？唔好只睇到添姆雲拿傳中，重點係邊個分波畀佢？正係卻奧斯在中間忽然分去左邊，添姆雲拿甚至不在畫面入面。可以見到呢個球員幾咁有視野（雖然其實人人都知，但而家好多球盲）。卻奧斯助攻數字其實完全唔多，但佢好多時係做到助攻之前嗰腳。特別係啲中距離分邊，而佢傳球成功率係極高嘅。今場佢掂波去到驚人嘅144次，史上冇一個德國球員有咁多。墨西哥上場派專人看管佢，瑞典就冇，都係一個分嘢。
好啦，反勝一球，當然人人話卻奧斯係功臣射得點靚。但重點根本唔在此，係在於點解有個咁嘅自由球．固然多得瑞典球員犯規。但邊個搏返嚟？又係左路嘅添姆雲拿（左下角）。咁但邊個畀波佢？之唔係又係卻奧斯！到佢入波，反而唔係最神勁—上場佢都罰球射中楣啦。呢啲咁嘅位，仲要差不多完場，對面又多高佬，一定係佢直射了。
5.然後講下下場點算好，其實都冇乜可以點。咁講真，以德國隊嘅實力同韓國隊嘅水平，根本冇可能唔拎三分。唔係串，而係如果韓國都贏唔到嘅，就抵出局啦對不？保定停賽，即係三中堅免問，你又會見到4231，問題係打法上正選上點打法。首先今場贏波上場輸波，點都覺得係變陣成攻。
6. 而整體嚟講，德國都係比上場好，就算冇補時嘅奠勝入波都係咁話。有理由相信路維會繼續今日嘅陣容。保定出唔到，咪搵侯姆斯。當然魯迪加其實都踢得唔好，比保定侯姆斯更差，但亦冇乜更好選擇。如果連侯姆斯都唔出得就變咗瑞利拍魯迪加。左右二閘，人選唔會變，亦冇得點變。中間卻奧斯當然係絶對正選，萊斯今場嘅表現亦都似乎勢必拎正選。第三個中路中場就難揀。魯迪踼得三十分鐘，表現你話太好又唔係。根度簡入嚟嗰六十分鐘，又不覺得特別好。所以仲係有啲懸念。但似乎唔會出返奧斯爾基迪拉啦啩。右路進攻方面，梅拿大家都好鍾意，我都好鍾意，又勤力，但今屆世界盃真係水準之下，唔係唔郁得嘅球員咯。中鋒同左邊位方面就最得意，上半場達斯拿你話好差又唔係，好彩少少嘅一早入咗波（畀人救空門），但之後就好多進攻犯規，而不能否認換走佢後隊波又好似係順咗，可能因為佢呢兩場波太唔夠果斷，成日都拎住個波慢慢玩，連自己擅長嘅推波過人都唔敢做。添姆雲拿仲搞笑，打中鋒時真係唔多掂，但下半場高美斯入替達斯拿，打返正箭頭位，添姆雲拿明顯移咗去左邊，反而效果好好喎！追和球波係佢出嘅，反勝一球波亦係因為佢在邊路搏到罰球。有得再試下
7. 德國當然問題依然在，就算唔計瑞典先入一球，都仲有不少問題，但未必短期改到。簡單嚟講就係球員唔夠快，好似唔夠飢餓，回防都仲係唔多夠快，進攻更加唔見得有打快攻。呢啲真係死症冇得搞，唔知係球員決心唔夠大丫，冇態丫，定真係老啦。另外我依然認為佢兩閘攻得太上—而又冇乜建樹。特別係甘美治，上半場不停對住高佬陣斬高波，唔知想點。下半場先會出返多啲地波。另外，啲進攻防守平衡都係怪怪哋，特別係下半場1-1後，瑞典都冇乜反擊，但唔見佢加大好多壓力。反而去到十打十一佢先谷啲人上去搏。
8.最後快手講下我對個別球員/位置嘅感想:
紐亞—依然係好穩建嘅演出，決心亦都大咗。事後可以怪佢失球波企得太出，但以佢作風呢啲波點會唔飛出嚟？尾段有下跣腳，唔知係咪仲受傷患影響。但呢兩場波嘅表現絶對唔會有人質疑點解唔用達史迪根。
中堅嚟講，魯迪加其實係唔多掂嘅，但亦不見得有更好人選。保定瑕不掩瑜，雖則食咗個紅牌（抵食，但我唔明做乜嗰啲位要咁搏命，仲只係打和緊），但好多人忽略咗佢在進攻上嘅貢獻。佢係全隊掂波傳球都第二多嘅，放長波廿一個，到位嘅十六個，已經算相當好。冇咗佢我就唔知下場點玩了，或者侯姆斯做呢個角色。但侯姆斯其實鍾意自己扭波多過咁放長波。所以下場德國應該玩少一瓣。另外上面講過，冇咗保定已經唔使諗三中堅。如果真係侯姆斯都出唔到嘅，就變咗瑞利拍魯迪加，有啲擔心。
左右兩閘其實表現都麻麻地。但至少見到個兩邊失衡嘅問題解決咗。對墨西哥時真係全部在右路，墨西哥亦只攻你右路。墨西哥一場嘅左閘柏汀赫特攻又冇人畀波佢守又冇人搞佢嗰邊。上次亦講過因為隊友根本唔畀波佢，今場見到明顯赫達出返嚟，隊友幾肯畀波佢，特別係卻奧斯。甘美治其實繼續係麻麻地，特別係上半場不停咁斬高波令人十分火滾，下半場明顯畀路維訓示咗，出返多啲地波，就好少少。但又不過，如果下場真係出高美斯，咁斬多啲高波又冇壞呀下。至於赫達，感覺好似感冒完都未上返晒力咁，所以助攻貢獻唔多。但其實無論如何都會好過柏汀赫特。另外留意下上面個圖，甘美治赫達殺到入對方final third甚至禁區嘅時間都唔少的
中場方面，卻奧斯當然係必然正選發電機，上面講三個入球已討論咗。唯一要研究就係，稍為有啲針對部署嘅球隊一定會針對住佢專人凍結佢，韓國未必會但之後都實有人會（如果晉到級的話啦），大師最好諗諗點樣避免咁。墨西哥未致於完全凍結卻奧斯，但已經將佢威力減半。
佢拍檔會係邊個就有啲難估。魯迪三十分鐘已收檔，表現好似都只係普通，冇乜咩特別大建樹但又冇乜特別問題咁。根度簡後備入替亦唔見得好好。雖然正路我估唔會出返基迪拉，但都真係幾難估邊個會拍卻奧斯。定佢會出哥利茲卡？
基迪拉都仲話有些少機會出返嚟，但我估奧斯爾就此會冇咗正選。唔係佢上場波差，更唔係懶。但明顯萊斯踢得比佢好。都唔止講佢入波，你睇上面SP (sprint)或TS(Top Speed)之類佢都幾堅。
右路嘅梅拿，係個令人幾鍾意嘅球員。但其實呢兩場真係冇乜建樹。甚至2016佢都係冇乜建樹，係勤力咯，冇啦。似乎在拜仁都OK，去到國家隊呢期真係麻麻。我都好鍾意呢個球員，但唔係唔郁得的。當然，可以搵邊個頂又係一個問題。如無意外佢都會繼續正選。而或者有高美斯出嚟會放生到佢。
左路位同中鋒位係最有趣嘅，一齊討論。達斯拿唔係唔積極，開賽初段已幾乎先開紀錄。但踢得耐咗就見犯規多過建樹，亦都冇佢自己最拿手嘅快放單對單過人或CUT入禁區，反而鍾意控住個波等人上嚟。可能呢個係要多啲空間先做到嘢嘅球員，對於主守嘅其實佢冇乜嘢做得到。無論如何，下半場冇咗佢後隊波似乎幾順，佢個正選位都有啲危。
添姆雲拿比較特別，上半場打中鋒其實都唔係太得，唔係好搶到點。到佢出嚟攞波時又變咗中間冇人。反而下半場佢踼得極好—因為位都換埋，佢去左邊路反而好生猛，兩球入波都係佢在左路發難。高美斯在中間亦都做到嘢，自己頭槌又有，二傳畀人亦都有，身型係真係有優勢，特別係德國多技術球員但反而冇一兩個開路嘅。所以路維如果夠果斷，不妨諗下出高美斯正選中鋒，然後添姆雲拿打左邊。
布蘭特係奇兵，應該畀多啲時間佢。另外想講下布蘭特／白蘭治。路維已經話你知，利萊辛尼入唔到最後名單，係因為爭輸畀呢位國外名不見經傳嘅球員（梗係，個個睇曼城，鬼睇德甲咩）。但布蘭特今屆世界盃夠晒有效率。兩場都係八十幾分鐘先換入嚟—但已經兩次射中柱。其實我都唔肯定佢在國家隊會打乜位，因為時間太短。今次入替赫達佢就偏返左少少，上次佢就入替添姆雲拿。好多時見佢又會走返中間搵食，但其實在球會又好似打翼位多。無論如何，既然路維又鍾意佢，體力又不成問題，而佢仲會回防（雖然佢落嚟幾分鐘梗係好氣好力。但我懷疑利萊辛尼係唔會的）—點解唔早啲畀佢出嚟，甚至打正選？梅拿呢兩場表現差，不如可以試下佢？
