世界杯fantasy – round 2 開戰｜Box-to-Box
仲有兩場，round 1 就踢完喇，緊接落嚟就係round 2嘅比賽。今晚26:00前，就係準備round 2 個陣嘅最後機會，大家係會有免費轉一個球員嘅機會，記住勿失良機呀﹗
當然，如果你想，其實係可以轉超過一個球員，只係每個要先扣四分咁解。付唔付呢四分嘅代價，見仁見智啦，我自己就傾向盡量都唔會咁做嘅，原因好簡單，要回返呢四分嘅本，再外加原先個球員本來有上陣嗰兩分，其實都唔係想像中咁易，自己睇下round 1陣中有幾多球員有六分就知道啦。所以如非必要 eg. 紅牌停賽、受傷久休、失去正選etc. 我都盡量唔去轉兩個球員或以上。唯一例外係，除非唔夠錢入心儀球員，而迫住要downgrade另一個位嚟配合……
話雖如此，如果你有信心某位球員係會爆分，以而家仲有咁多比賽機會嚟講，襯早入定都未嘗不可。而家就同大家簡單分享下幾個值得考慮嘅options：
後防：
Ahmed Fathi (Egypt，埃及，身價5.0)
分組賽最難踢嗰場，埃及都已經捱過左。以穩守著稱嘅呢支埃及隊，嚟緊兩場波，保持清白之身嘅機會都唔太細架，因此幾位埃及後防球員其實都有得諗，特別係佢地身價都只係介乎4.5和5.0之間。咁點解要特別推薦當中最貴嗰個？因為Fathi係一眾後防球員入面，傳波入禁區次數最多嗰個，一旦皇牌前鋒Mohamed Salah 復出，Fathi隨時會得到額外的進攻分添。
三位墨西哥後衛 (Mexico，墨西哥，身價5.0)
同埃及一樣，已經捱過左最難踢嗰場，分組賽對手只剩下攻力疲弱的瑞典及實力更不濟的南韓，預期至少也有一場能保持清白之身吧。
Guillermo Varela (Uruguay，烏拉圭，身價4.5)
烏拉圭明顯係呢組入面最突出一隊，而Varela身價更只係超值嘅4.5，兼又證實左係正選，所以順理成章成為大熱人選。
Luis Advincula (Peru，秘魯，身價4.5)
另一位有正選嘅身價係4.5嘅後防球員。有得秘魯對丹麥就會留意到呢位好肯跑上跑落嘅球員。預期下場對澳洲有機會保不失之餘，亦有一定機會多啲上前參與進攻，以秘魯咁自由奔放嘅表現，話唔定就此拎到個助攻甚至入球。
中場：
Miguel Layun (Mexico，墨西哥，身價5.5)
雖然佢比同樣有正選嘅Gallardo貴0.5，不過呢0.5係值得俾嘅，因為睇返墨西哥場波，不難發現呢位Layun都幾鍾意起腳，全場都起碼射左3、4腳波。對德國就話冇波入啫，但試諗下之後對瑞典或南韓，咁樣起腳法，話唔定真係入到波架。
Rurik Gislason (Iceland，冰島，身價5.5)
隨住Johann Gudmundsson 嘅受傷，Gislason取而代之成為正選。留意，有關 Gudmundsson 傷勢嘅消息唔太多，但如果真係趕及復出，Gislason就唯有當係一個平平地塞滿位嘅後備，相反，如果最終以正選上陣，對住表現乏善可陳嘅尼日利亞，分分鐘從邊路交出助攻都唔奇。
Cristian Pavon (Argentina，阿根廷，身價6.5)
有傳下場分組賽，Pavon會取代Di Maria踢正選。Pavon身價係比Layun同Gislason貴1.0，不過Pavon喺場上嘅位置係左邊嘅邊鋒，不時會cut in搵機會起腳，亦可以助攻俾中間Sergio Aguero 或Lionel Messi，所以如果係當半個前鋒咁用，呢個價錢其實真係唔貴。第二輪對手克羅地亞唔係嗰種死守嘅球隊，有理由相信進攻上面，踢起嚟會比對冰島較舒服，或者Pavon會就此偷到雞都未定。
前鋒：
Edinson Cavani (Uruguay，烏拉圭，身價9.5)
呢位不用多介紹啦。烏拉圭嚟緊呢round將會遇上沙特阿拉伯，有睇揭幕戰的話應該知道，呢次絕對係機不可失，喺Luis Suarez 狀態似乎平平之下，Cavani應該係最可信賴嘅選擇。同時更會係呢一round嘅captain之選﹗
Ante Rebic (Croatia，克羅地亞，身價5.5)
踢一個前鋒後少少位置嘅Rebic，以正選前鋒嚟講，身價極平，就算用嚟free返啲錢出嚟投資喺其他位置都非常抵。佢關鍵傳球同傳中數字喺隊中，撇除死球嚟講，都算係數一數二 (當然數據嘅database好細)，由此可見佢都幾經常參與製造埋門機會俾其他隊友，以咁嘅價位嚟計，偷到一個助攻已經非常抵架喇。
Andre Carillo (Peru，秘魯，身價5.5)
下場對手係澳洲，絕對係取分嘅好機會。Carillo上場踢得有幾生，相信大家都有目共睹，而5.5嘅身價，可謂超值，就算未必親自取得入球，佢嘅變速同突如其來嘅加速推進，都係殺著之一，上場就已有幾次成功突破丹麥嘅防守落底製造機會。
Sadio Mane 或隊中其他前鋒 (Senegal，塞內加爾，身價8.5 或以下)
執筆之時，第一場都未踢，甚難估計Mane以外會有咩攻擊球員，但下輪對手係日本，打法同身體對碰上應該會佔到啲優勢。最緊要今晚望望佢地比賽，睇下邊個係正選，邊個係危險球員，到時就可以揀入自己隊喇。
最後值得一提嘅係，第一輪賽事都未打完，已經出現左8個12碼。14場賽事嚟講，即係話，平均唔夠2場就會有一球12碼。有見及此，其實大家都不妨考慮下各隊嘅12碼劊子手，甚至係一啲擅於撲救12碼嘅門將，睇下會唔會fit到大家隊波嘅budget。事實上有啲12碼劊子手身價好平，譬如早前向大家推薦過嘅Granqvist，尋晚對南韓就真係射入左一球12碼，配合埋清白之身，咁就輕鬆拎左12分。以下係幾個身價唔高嘅12碼劊子手：
Andreas Granqvist (Sweden，瑞典，身價5.0)
Ricardo Rodriguez (Switzerland，瑞士，身價5.5)
Mile Jedinak (Australia，澳洲，身價6.0)
Christian Cueva (Peru，秘魯，身價6.0) (留意如Guerrero在陣，有機會主射12碼)
Sergio Ramos (Spain，西班牙，身價6.5)
Box to Box
