世界杯fantasy – 滄海遺珠推介｜Box To Box
過去幾日，大家係咪好努力將個陣執完又執，改完又改呢？到左呢一刻，應該已經執得七七八八啦？如果仲有個別位置未諗掂，又或者想搵一兩個球員套現少少錢出嚟upgrade其他位置，希望呢篇滄海遺珠嘅推介可以幫到大家解決以上問題。
先由門將開始：
Yann Sommer (瑞士 Switzerland，身價5.0)，Keylor Navas (哥斯達黎加 Costa Rica，身價5.0)
將兩位放埋一齊講，因為原因係完全一樣。呢組入面，除左巴西好明顯獨當一面之外，其餘三隊都有同樣特色，就係都係守強於攻：近年瑞士喺國際賽嘅防守表現出晒名，而Keylor Navas喺皇馬嘅表現亦愈來愈穩定。以5.0嘅身價來說，如果能夠保持到兩場嘅清白之身，又或者一場再加埋對巴西嘅多次撲救所得嘅撲救分，呢個投資已經得到合理回報，而多出嚟嘅一蚊亦非常好使好用。
Yassine Bounou (摩洛哥 Morocco，身價4.5)
摩洛哥喺外圍賽已經展現過極強嘅防守力。雖然同組對手實力頗強，但其實細看之下，摩洛哥絕對有能力同伊朗周旋，葡萄牙要強攻亦唔多擅長，只有西班牙係較大威脅。不過一來西班牙剛出現內亂，二來摩洛哥遇上葡萄牙、西班牙呢類強隊，大可以先求穩守，咁門將隨時有大量撲救機會，配合不俗嘅防守力，4.5嘅投資隨時帶嚟可觀嘅回報。
然後到後防：
Andreas Granqvist (瑞典 Sweden，身價5.0)
可能有啲球迷會對Granqvist有印象，因為佢曾征戰英超，後來輾轉到荷甲搵食。推介Granqvist嘅原因，最主要係因為佢係隊中嘅兩大12碼劊子手之一，如果一個身價5.0嘅後衛能夠有主射12碼嘅機會，你已經係搏贏左喇﹗瑞典雖然稱唔上抽得好籤，不過首場會對南韓，亦算係保持清白之身嘅好機會，如果真係唔睇好瑞典嘅，第一輪賽事後用完即棄都可以架。
Kalidou Koulibaly (塞內加爾 Senegal，身價5.0)
實力不俗嘅中堅，有一定嘅死球攻門威脅，同時亦係球隊嘅必然正選。如果塞內加爾順利晉身淘汰賽，佢嘅身價隨時會上升，喺budget有限之下，慳得幾多得幾多，Koulibaly可能會係唔少人組軍嘅好幫手。
Michael Murillo (巴拿馬 Panama，身價4.0)
如果你都係要三後衛陣式為主，咁第五後衛個位其實大可以有玩嘢，或者慳錢for其他位置嘅空間。難得巴拿馬有份參與今屆世界杯，玩fantasy都不妨入返佢地一個半個球員啦。身價4.0嘅Murillo，上年借到紐約紅牛，以右閘身份上陣17仗入2球，最後做埋球隊嘅新人王，旋即被紅牛簽下，長居球隊正選。搵Murillo嚟做第五後衛，隊波就可以有巴拿馬球員，慳到錢之餘，又可以有一個正選球員以防萬一，一次過滿足三個願望，何樂而不為？
Youssouf Sabaly (塞內加爾 Senegal，身價4.0)
又一位身價4.0嘅球員。冇錯，佢唔係巴拿馬球員，不過佢有另一個吸引之處：佢係球隊開角球嘅第二人選。有得處理死球對fantasy遊戲嘅重要性，喺上一篇已經解釋過，以最低價可以得到一位正選兼有機會處理死球嘅球員，實在係抵到爛﹗
然後到中場：
Hakim Ziyach (摩洛哥 Morocco，身價7.0)
感覺會係今屆世界杯爆起嘅一位球員。為國家隊上陣15次嘅佢，有8個入波，而喺球會層面，亦一直保持頗穩定嘅入球量，而且佢除左自己入波，亦擅於為隊友製造機會，今季喺球會有15個助攻，去季都有11個。如果摩洛哥今屆進攻有咩作為，應該都好大機會關佢事。主力攻擊球員嚟講，咁嘅身價絕對抵玩。
Christian Cueva (秘魯 Peru，身價6.0)
頭先講到Ziyach嘅身價係好抵玩，但Cueva身價仲要再平一蚊﹗見到身價係6.0，一開始我仲以為自己睇錯或者隻game係有bug。呢位效力聖保羅嘅球員，係秘魯嘅新希望，而以中場球員嚟講，佢嘅入球能力亦非常強，好多歐洲球隊都已經捕住佢。佢盤球同入攝時間都冇得頂，好睇之餘亦好有實際作用，以一隊球隊嘅進攻泉源嚟講，6.0嘅身價真係冇唔揀佢嘅理由。
Maximiliano Meza (阿根廷 Argentina，身價5.5)
Meza可能係呢支阿根廷23人大軍中，最名不經傳嘅一位球員。不過，受惠於蘭仙尼 (Manuel Lanzini) 因傷退隊，Meza貌似取代左佢嘅位置，以正選身份出任靠右嘅攻擊中場。前面有咁多高質球員做隊友，再唔係輕輕撥橫俾美斯都已經可能係一個助攻嘅時候，即使阿根廷今屆嘅成績大家未必咁睇好，但5.5嘅身價絕對係窮人嘅福星。
最後係前鋒：
Sisto (丹麥 Denmark，身價6.5)
唔同統計對於Sisto 外圍賽錄得幾多個助攻都有啲差別，但上陣500幾分鐘有3-5個，其實都算係合格有餘。最近嘅友誼賽佢都有入波架，基本上有艾歷臣 (Christian Eriksen) 喺到，隨時都可以有入球機會。如果嫌其他正路前鋒太貴，又想搏一搏，Sisto係一個幾好嘅option。不過要留意佢經常被換出，有機會喺60分鐘前被換走，咁就會少左一分，不過前鋒嚟講, 6.5嘅身價，好難要求十全十美架喇。佢幫你慳返嗰兩，三蚊，隨時夠你換個美斯或C朗拿度返嚟啦。
Wahbi khazri (突尼西亞 Tunisia，身價 6.5)
如果睇過英超或法甲嘅球迷，可能都會覺得「Khazri呀嘛，睇過啦，平平無奇啫」。不過返到國家隊，佢就完全唔同，因為佢喺國家隊嘅進攻主力，情況同摩洛哥嗰邊嘅Ziyach有得揮。更正嘅係，佢主理晒球隊嘅所有死球，包括12碼，而且喺進攻上有絕對嘅自由俾佢去發揮。所以如果突尼西亞進攻上有咩得著，Khazri嘅貢獻一定係其中一個主要成份。如果你想套現幾蚊，又怕Sisto上陣時間成疑問，Khazri會係一個唔錯嘅選擇。
Saifeddine khaoui (突尼西亞 Tunisia，身價5.0)
好老實，對於佢嘅認識實在唔深。前鋒位置咁寶貴，亦唔建議長期持有呢位球員。不過，如果你打算喺分組賽第三輪用wildcard，咁就要留意下呢位身價5.0嘅球員喇﹗因為突尼西亞嗰輪嘅對手係巴拿馬，如果呢位身價5.0嘅前鋒一直保住正選席位的話，絕對係第三輪比賽嘅黑馬之選。到時另外兩個前鋒位，美斯、C朗拿度、尼馬三揀二都冇問題啦~~
