世界盃fantasy – 揀球員篇｜Box-to-Box
「想贏，就要揀高分嘅球員。」大佬，鬼唔知阿媽係女人咩。問題係，揀球員組隊時，有咩地方要留意？
文：Box-to-Box
睇過我地嘅世界杯fantasy懶人包之後，大家對今次世界杯嘅官方fantasy game點玩，應該有一定程度嘅理解。玩遊戲當然都希望玩得好啲，喺呢個fantasy game入面，總分愈高，就代表成績愈好，但問題嚟喇，點先可以拎到高分呢？當然就係要選擇最高分嘅球員，組出一隊最高分嘅隊伍啦。
如果大家有玩開以前嘅yahoo fantasy、或者而家嘅fantrax、togga甚至draftkings同mondogoal呢啲，可能慣左好多唔同嘅得分來源。呢種玩法我自己都好鍾意，因為要考慮嘅嘢更多，亦會令唔同位置嘅球員都有相對較均等嘅機會取得更高分。不過今次嘅世界杯官方fantasy，計分形式就會近似返英超個官方fantasy，又或者歐聯同歐國杯個format，基本上如果有玩過上屆世界杯嘅官方fantasy，就會發現個玩法係一樣嘅，只係多左啲道具咁解。
係時候入正題喇。點樣先可以組到一隊高分嘅球隊呢？唔使問，當然係從揀選球員入手啦。呢個時候，大家應該重溫返懶人包入面嘅計分表… 簡單而言，龍門以外嘅球員，取分方式不外乎係上陣時間、入波、助攻、保持清白之身同埋搏到12碼。反而一啲防守上嘅失誤，係有機會招致扣分，包括犯規導致輸12碼、領黃或紅牌、失球達到2或以上同埋取得烏龍球。而進攻球員嘅失誤，例如交失波、單刀唔入等等，係唔會扣分嘅。咁代表咩呢？心水清嘅你應該好快就睇到，喺呢個計分模式下，進攻球員遠比防守球員著數。
事實上，呢一點好貼近現實，亦都從球員身價反映到出嚟。你會發現，進攻球員嘅身價平均會比較高。正因如此，揀多啲進攻球員，理論上應該較容易取得高分，所以，我自己嘅取向係，盡量揀一個多前鋒或多中場，同時後衛少嘅陣式，即係3後防陣式。當然啦，呢個係我個人啫，大家嘅組軍取向應該視乎以下三點：一、你擅於估邊位球員入波，定係擅於邊隊可保持不失﹔二、投資策略上你prefer高風險高回報 (攻擊球員)、還是穩中求勝 (防守球員)﹔三、budget容唔容許你揀選心儀嘅進攻球員。要知道，即使一隊波大勝3-0，身價9-10m嘅攻擊球員都可以冇波入冇助攻，但一個身價5m嘅正選後防球員卻會得到不失球嘅分數，所以，凡事冇話絕對嘅。
剛才提到，龍門以外嘅球員，取分方式不外乎係上陣時間、入波、助攻、保持清白之身同埋搏到12碼。所以大家喺揀選中場球員時，可以多啲留意進攻型、創造型嘅球員，佢地嘅得分回報正常會俾肩負較多防守任務嘅球員優勝﹔而揀選後防球員時亦可以考慮埋呢啲bonus位，出擊型嘅閘會比穩陣嘅閘同中堅值搏啲，但有死球威脅嘅中堅亦係唔錯嘅選擇﹔至於前鋒就唔使多講，喺fantasy嘅世界入面，一個只識得喺前線等機會嘅射手，係會比一個團隊意識強，勤於為隊友開路，鍾意二傳同回後幫波或迫搶嘅前鋒抵玩得多。
而無論邊個位置都好，記住，有正選有1分，上陣滿60分鐘再多1分，而拎呢啲分嘅難度比靠入球、助攻、保持不失等等容易得多，所以揀正選球員係好重要，正選之餘冇咁易或冇咁早被換走嘅就更佳。唔好睇少呢啲1分2分呀，密食當三番，好多時就係贏幾分架咋。
仲有一點都值得留意。由於分組賽後，會有一次無限制買賣次數嘅執隊機會，因此今次揀人大可以盡量專注於分組賽賽事。(當然啦，強隊球員取得高分機會畢竟較大，而過左分組賽後，球員身價會隨表現而有所調整，所以如果想預先儲住一啲預料會升值嘅強隊球員都係好嘅practice嚟嘅。)
揀球員嘅時候，大家應該會留意到，強隊嘅球員，或者名氣較大嘅球員，身價會較貴。而由於budget所限，不可能揀得晒所有最強嘅強隊球員，所以要有取捨。但除左budget嘅因素外，揀人時其實仲有一點可以了解下，就係強隊嘅球員未必係最好選擇，有時一啲冇咁強嘅球隊之中，單天保至尊嘅球員可能仲抵玩。舉個例，比利時對巴拿馬，相信唔少人都會預期係比利時嘅一場大勝，但如果你重金投資左迪布尼 (Kevin de Bruyne)，唔代表你一定會有著數，因為隊中太多可以入球助攻嘅球員，所以呢啲分數可能去晒盧卡古 (Romelu Lukaku)、夏薩特 (Eden Hazard) 或其他隊友身上都未定。買得中固然好，買左隔離隊友就慘喇。相反，好似丹麥咁，基本上入波助攻都極大機會關艾歷臣 (Christian Eriksen) 事，因此如果你擁有佢，咁丹麥一有波入，你就好大機會有分落袋。至於點樣去搵呢啲所屬隊伍唔強，身價冇咁貴，但又係隊中攻擊主力嘅球員，就考你眼光喇。(留意，我舉左艾歷臣做例子，但其實艾歷臣一啲都唔平。)
講到呢度，醒目嘅你可能已經諗到一個要點：死球專家嘅重要性。冇錯，處理死球可以係一個得分來源，無論係直射入網，還是助攻俾隊友破門，都係取分嘅方式，有埋12碼就更加抵玩。之前講過，防守型中場相對冇咁抵玩，但如果有死球處理呢，又完全唔同講法。有玩剛過去嘅球季嘅英超官方fantasy就會知，水晶宮嘅塞爾維亞球員米利禾積域 (Luka Milivojevic)，雖然係一個中中 / 防中，但卡巴耶 (Yohan Cabaye)不在陣時佢有死球處理，更主射12碼，而水晶宮全季齋喺主場已經獲得7個12碼，令fantasy入面身價甚平嘅佢，變成左一個得分能手。
最後，想提提後備板櫈。有睇懶人包都知道，未上陣比賽嘅後備球員，係可以換入嚟取代已經上左陣嘅球員。所以，呢度有兩點要留意。一、正選陣容盡量起用踢先嘅球員，咁如果佢得分欠佳，你仲可以換走佢，搏多個機會。咩陣式都唔緊要的，因為換人時可轉變埋陣式。「隊長」都一樣，踢完個分唔靚，大可以換另一個未踢嘅球員做隊長，所以揀隊長都係揀踢先嗰個會較好。二、同一個位置上，盡量唔好揀晒同一個比賽日嘅球員。留意，第三輪賽事，a組四隊會一齊踢，b組四隊會喺幾個小時後又一齊踢。即係話，如果你唔打算喺兩輪賽事之間搞隊波的話，五個後衛唔係來自同一組都唔夠，最好係五個後衛唔好來自相連嘅組別，咁你就會有較多時間去執隊波。(當然，如果你唔打算玩到咁認真，呢一點其實可以不理。)
如果你睇到呢度… 應該都真係比較認真嘅玩家。而想認真玩嘅你，可能都會留意到，我未提過道具，咁所以唔爭在講少少喇。
Wildcard，其實都好難話幾時係最合適嘅時機去用。分組賽每一輪之間，只可無條件換一個球員，但如果你隊波受到嚴重傷患、停賽、失去正選、有輪換危機或者好多球員未能晉級下一圈等情況影響，就係用wildcard嘅合適時機。
Bench Boost，會令你後備席上所有球員都照計分。如果你執左一個好平均嘅陣，預期正選連後備15個都會有份上陣，或者至少對兩、三個後備就有信心嘅時候，就可以用呢個道具喇。
至於Maximum Captain，我諗大家可以想像到，隨住比賽去到較後階段，剩返嘅球隊都會係比較強，或者表現較好。到時要揀中高分嘅球員做隊長，難度就會更高，亦更容易出現意想不到嘅高分球員。同時，比賽日較少，你搏高分球員做隊長嘅次數亦會少左 (eg. 一輪初賽你可以起碼揀4、5次隊長，但到左4強你最多就只能有2次機會)，所以揀到好隊長嘅難度大增。呢個時候，Maximum Captain就好幫到手喇。不過，凡事都有兩面，從另一個角度去諗，分組賽揀captain係易揀啲，但分組賽有球員高分嘅機會，係會比去到8強、4強大。譬如有比利時對巴拿馬呢類賽程時，有球員上演帽子戲法嘅機會，一定比去到8強、4強大得多，咁如果你captain左一個帽子戲法嘅球員，所獲得嘅double分數就會比入得一、兩球嘅多，所以喺早啲用左個道具，亦係講得通嘅。
好喇，今次就講到呢度先。俾啲空間大家摸索下，組下隊，遲啲有機會再同大家分享下有咩好球員值得揀啦。
