永恆的4231 — 德國四屆大賽人腳陣式變化 (上)｜李聲揚
寫咗兩篇純數字分析，（唔講戰術人腳，純數字分析世界盃分組同奪冠 及 劇本決賽就係巴西對德國，巴西捧盃，報仇成功），今次寫返篇冇咁「冷血嘅」。但我只寫德國隊，因為我場場睇晒（友賽都盡可能係），亦因為唔識寫第二啲。
講官方，德國FIFA國際排名第一。計賠率，馬會開佢係第二熱門。講科學，Elo Rating 佢排第二。點睇都係大熱。仲有，外圍賽，十戰十勝。點解都勁。但另一方面，近六場友賽，之前五場不勝。最近一場僅僅贏沙地阿拉伯一球，又似乎令人擔心。
呢篇文主要寫德國會出咩陣式，知道咗就大約連咩球員都估到。我哋可以睇返過去咁多屆大賽，德國出過嘅陣式，同埋大約會出咩人。
一場友賽我都冇揀，外圍賽亦都冇。對於德國等等嘅強隊，外圍賽已經同友賽差不多。唔止係德國唔會去到盡，其實但凡強隊都唔會，況且球員仲要專心球會賽事。只有世界盃／歐洲國家盃賽事先見真章（而舊年嘅洲際盃我都冇理）。
我由2010年講起，原因首先係篇幅，而且路維在2008年之後先明顯地轉咗單中鋒陣式。仲有，2010年開始大賽就冇波歷克，呢個球員個人能力太強，同而家講合作平衡嘅德國唔同。而最後，呢一期德國嘅主力，都係2010年開始冒起的。紐亞，保定，基迪拉，奧斯爾，卻奧斯，梅拿，等等，都係2010年開始擔正，當年係一個小換血。而呢班友而家仲係核心．而其實2008果屆嘅，除咗高美斯之外，全部都收晒山，寫嚟多餘。
先講結論：
1）其實真係唔使討論咩3後防定4後防。正式賽事德國差不多冇用過3後防，而球員在球會亦極少踢3後防。即使唔夠人用路維都唔興用3後防。討論完畢。（對，其實洲際盃2017用過3中堅，拎冠軍添，但只係B隊，參考價值不大）
2）亦都其實唔使點討論咩陣式。路維就係死硬嘅4231，沒有其他。你可以將佢當係451或433，不在呢啲細節糾纏。重點係：德國只打單箭頭，德國唔會出3中堅。討論完畢。
3) 梅拿唔會打中鋒，梅拿唔會打中鋒，梅拿根本唔會打中鋒。好重要要講三次，討論完畢
4) 路維其實幾鍾意用奧斯爾打邊路，效果亦唔錯。唔好低估呢樣嘢再出現嘅可能。
5) 路維好鍾意用中堅打閘。有時係因為冇人，但佢真係有呢舖癮。
去片，睇晒咁多場波。
2010第一場波，德國就盡顯王者本色，澳大利亞全無還手之力。2008年時路維其實仲係出雙箭頭高美斯/普度斯基拍高路斯，去到四強先開始試單箭頭。2010就呢三丁友仲在，但路維已經擺明係打單箭頭，原因同梅拿冒起有啲關係。留意當年後防仲係費特列治拍梅迪薩卡，侯姆斯未入選，保定就有入選，但呢屆稍後先正選。八年後紐亞基迪拉梅拿奧斯爾仲在陣，位陣踢法都冇乜唔同。
2010第二場波。德國在大賽向來有第二場出事症，原因不明。再加上對住東歐球隊往往唔掂（其實主要係克羅地亞啫）。陣式上同之前對澳洲完全一樣，可見路維在順境下唔鍾意點變。轉捩點當然係出名斯文嘅高路斯好快已經兩黃一紅，普度斯基亦射失十二碼。留意德國上半場已落後，路維都等到70分鐘先換人。亦留意後備入替嘅同澳洲嗰場一樣嗰三位。
2010第三場對加納，未算係生死戰，但德國兩戰得3分。留意左閘位換咗人。巴斯杜巴在輸畀塞爾維亞一場表現備受抨擊，結果搵咗其實係打中堅嘅保定替佢，亦因為咁可以同對面嘅奇雲保定（Prince）世紀兄弟對決。路維好鍾意用中堅打閘，遲下仲有例子。另外前線正選變咗卡卡奧，因為高斯路之前一場食紅牌。高美斯呢？在路維心目中由頭到尾都係後備殺手。但你咪理，佢玩到2018都仲有得玩。德國唔算佔盡上風，但靠奧斯爾一個靚波小勝一球，首名晉級。
繼續係4-2-3-1。高路斯停賽完後即時拎返正選，其他正選會亦同加納一場冇變，陣式亦冇變。呢場波同之後一場嘅大捷，奠定咗奧斯爾同梅拿（仲有小豬，但已退休）在國家隊嘅地位。分數不代表實力分野，英格蘭入球被判無效，然後急於追平，大舉壓上，先比德國下半場再下兩城。但奧斯爾小豬梅拿在反擊上真係好強。
繼續呢個陣式，不變勝萬變。梅拿飄忽嘅走位令阿根廷人極快已經失波，之後輸反擊都輸死，阿根廷堆後防亦係一大笑話。美斯？原來有份踢的。
繼續係嗰個陣，但最礙眼見到右邊冇咗梅拿，多咗杜查奧斯基（呢啲友都可以正選，證明當年德國都唔係咁勁）。原因係因為梅拿對阿根廷食黃牌停賽。當然呢個唔係咩藉口，西班牙2012年連韋拿都冇，一樣狂風掃落葉拎冠冠軍。講返呢場，西班牙在2008年已經淘汰冒起嘅德國，當時係完全冇得打咁滯，波都拎唔到。嚟到2010都唔係唔夠西班牙砌，但實力相距好似收窄咗。至少拎到個波，而西班牙亦只係靠個死球突圍，其他時間係西班牙控球但德國仲守得住。
季軍戰，實在冇乜好講，因為都唔算係好正式嘅賽事。唯一想講：卡卡奧，贊臣，費特列治，杜查奧斯基，傑斯寧之類之後就淡出國家隊。候姆斯卻奧斯上位。
去到2012年。留意德國成個戰術已經成型，同今日唔爭得遠。就係4231，梅拿打右邊。費特列治收檔後，侯姆斯上位。留意呢屆係佢第一屆大賽，亦都後來同路維幾乎炒大鑊（之後會講）。巴斯杜巴仲拎到中堅位。拿姆由右閘變咗左閘，應該因為左閘冇乜人（長期都缺人），而拿姆可以兩邊都打到。至於應該係中堅嘅保定又變咗右閘（之前又打過左閘）。攻擊組合上高美斯拎咗正選。而呢場波亦只靠佢一個靚頭槌搞掂。事實高美斯呢屆極FIT．
呢場對德迷當然有意義，因為呢場之前德國N咁多年冇在大賽贏過荷蘭。點解會編埋一組？其實荷蘭係pot 1，德國先係pot 2。德國都pot 2？因為主辦國波蘭烏克蘭霸咗兩個位，加埋西班牙荷蘭。德國就變成超級pot 2．呢組係死亡之組，四隊都係世界排名頭十。繼續冇變，拿姆左閘保定右閘高美斯正中鋒。呢場高美斯真係著火，不妨再睇下。荷蘭最後三連敗出局。
繼續係冇變的。保定停賽，所以個右閘位變咗拿斯賓達，佢亦射入奠定勝局嘅一球波。
一樣係4231，但球員轉咗啲，原因不明。留意左右攻擊手都換咗人，右邊用咗萊斯，左邊用咗舒爾利，中鋒用返高路斯。原本正選嘅梅拿普度斯基冇傷冇停，有坐後備。你叫我估應該係輪換兼留下力。路維係唔多睇得起希臘的。
又一場幾慘嘅波。之前講過德國2008，2010兩屆不敵西班牙。去到2012避到西班牙，但就避唔到意大利。結果同2006一樣畀意大利踢出局。（後話：2014德國捧盃一樣冇遇到意大利西班牙）。留意希臘休息後，普度斯基變返正選，而高美斯都係。好多人都認為路維信錯高美斯。冇錯佢在分組賽係好堅，但去到淘汰賽繼續發揮佢斷纜王嘅本色—個波去到佢度就終結，唔係射門就係比人搶走，好難同隊友做到配合。另外，唔知點解卻奧斯會變咗正選，取代梅拿。懶搵原因。但留意，梅拿在呢屆歐洲國家盃一球都冇入到—唔止，其實2016年佢一樣一球波都冇入。似乎佢有歐洲國家盃恐懼症。38個入球冇一個係歐洲國家盃，夠晒奇怪。最後一提，因為呢場波侯姆斯同路維幾乎反面。路維之前已經話佢太多不必要嘅長傳，成日交失波。呢場波失嘅第一球正係侯姆斯盯唔住卡斯辛奴畀佢傳中畀巴路迪利頂入。
下篇講埋2014同2016。
