【數字分析】劇本決賽就係巴西對德國，巴西捧盃，報仇成功｜李聲揚
照舊一開頭比定資料你開住嚟睇: FIFA排名，Elo排名，馬會賠率
技術文：唔講戰術人腳，純數字分析世界盃分組同奪冠｜李聲揚
呢篇係純數據估波同分析，唔吹水。咩球員咩陣式咩教練我一概唔理。球評家實憎死。正如在股票上，我最初係學院派，CFA嘛，當然信基本分析，咁自然鄙視啲技術分析睇圖嘅。 但做嘢耐咗，覺得講到尾，捉到老鼠就好貓。技術分析或睇圖點解有用？或者基本分析點解冇用？因為你基本分析嘅嘢已經in the price。
上次篇文寫得比較長，但講到尾，睇下三個唔同系統 （FIFA排名，Elo排名，馬會賠率）預測每組咩隊首次名出線，同埋幾時會打交之類。最尾加埋我嘅個人心水，咁講明唔講戰術人腳，所以基本上，但凡有打交，我都係跟我認為最準嘅Elo Rating為準。
根據呢個預估小組首次名，就進入淘汰賽階段，咁我再做咗個晉級圖，就會係咁。決賽巴西對德國，巴西捧盃。世事真簡單。
心水清嘅朋友會發現問題：喂，你用Elo Rating唔計其他嘢嘅-咁一定係排名高嘅隊晉級架喎，咁梗係最高嘅隊入晒四強（事實巴西德國西班牙法國就係最高排名嘅四隊）。咁不如直接頒個獎畀巴西啦！排名第一嘛，使乜踢？
對，呢個絶對係Elo Rating嘅局限。你會話，都唔畀爆冷嘅，肯定個發展唔會跟足你預期。咁係相當肯定的，但依然有討論價值
- Elo Rating 其實最原本係應用在一對一嘅比賽，只計勝負，然後排名。例如國際象橫，圍棋，網球，或者online game都係用呢類方法排名。所以去到淘汰賽更加好用。因為理論上，有兩隊嘅Elo rating points，就可以計到各自嘅得勝率—在世界盃就係晉級率。計法如下：
聰明嘅你會發現，兩個加埋係一的（點解就留畀讀者當練習）。和波呢？冇呢樣嘢喎，Elo嘅系統冇容許打和。亦都係一路畀人話用在足球唔夠完整嘅原因（籃球照計就唔會和波）。亦所以上一篇文我冇講呢啲，一來篇幅所限，二來分組賽真係會和波。但去到淘汰賽一對一，總會分 「勝負」，哪怕係十二碼。
2. 你發現隊名側邊有埋個四位數字，就係Elo分數。然後個％就係晉級機會，加埋係100%的，我幫你用上面條式計埋。對，都係排名高分數高嘅晉級。但你會睇到晉級嘅難易度。例如劇本中西班牙對俄羅斯，巴西對墨西哥，都係強弱分野好大（留意個分數爭好遠）。但哥倫比亞對比利時之類就真係五五波
3. 講返小組出線，英格蘭比利時嘅G組真係咬得好緊，邊隊首名真係五五波。呢度係最有機會同個圖唔同。更正嘅係次名嗰隊同哥倫比亞都係五五波。但哥倫比亞定次名嘅英格蘭／比利時都好，都應該難敵德國。另一邊亦係，首名嘅英格蘭／比利時對波蘭過關唔難，但去到八強對巴西亦係收得工。係相當無趣的。
4.當然，之後我會一路live update呢個圖，小組賽後又整一次。
5.但就而家嘅情況睇，都仲睇到啲嘢。係預測強者必勝，但巴西德國同西班牙三強嘅Rating係帶開到離晒罩的（德國西班牙友賽都失利，減咗少少分，否則仲勁）。但你睇巴西真係超班，而且條簽都有利。十六強同八強近八成晉級機會，就算去到四強撞法國都有七成。法國呢？去到八強撞葡萄牙已經冇乜好大優勢。
6.下線方面，德國條簽靚過西班牙。十六強對瑞士固然冇難度，八強對哥倫比亞／比利時／英格蘭其實都唔難過關。但四強就硬憾西班牙，難過。西班牙條簽，十六強係咁多隊最輕鬆——俄羅斯應該係小組出到線之中最低分嘅。但八強西班牙要撼阿根廷。
7.總結：巴西分數超班，入到四強前，甚至入到決賽前都冇乜對手（因為西班牙德國都另一邊線），輪換都仲得，捧盃熱門。下線德國條線稍為好過西班牙。如果唔計咩格食格，應該德國入決賽對巴西—然後巴西報仇成功。
8.最後不厭其煩講多次，Elo Rating 每場波之後都會自動更新，唔似FIFA咁一個月先知。Elo Rating嘅精神基本上係自我修正，高分隊輸比低分隊，高分隊就扣好多分，低分隊就拎好多分。高分隊一路失利，就自動減分，去調整返 「踢到出嚟都唔係咁勁」嘅結果。
Facebook 專頁有更多無聊短文: www.facebook.com/ivanliresearch/
