17/18 英冠總結 | 夕二工八
原來上次交稿已經係球季開始之前嘅事。
咁英冠喺呢四十六週發生過啲咩事呢？
一～開閘嘅時候前面快嘅有狼隊列斯同埋錫菲聯嗰啲，留守喺中間嘅有葉士域治新特蘭侯城等等，再後啲先見到有維拉同富咸嘅；好喇卡迪夫城揾到個位走上前面，列斯同埋錫菲聯開始慢落嚟，取而代之嘅有米堡同打吡郡，布里斯托城都衝緊上嚟上過第二位，但係喺前面領放嘅仍然係狼隊；好喇去到段柱位，維拉同富咸開始追上喇，布里斯托城好似冇乜力喎越跌越後，打吡郡家下快馬加鞭希望迫近啲狼隊，但狼隊真係段段有呀一路都領前；去～到最後直路，卡迪夫城一直咬住前面唔放，哎吔，俾狼隊同維拉夾一夾又係去唔到最頭，富咸就趁機喺大外檔咋咋聲走緊上嚟氣勢旺盛，再睇返馬冧中間，鬥到嚟而家都仲有力爭前六嘅，除咗有米堡打吡郡普雷斯頓呢啲，竟然有米禾爾喎！最後二百米！狼隊睇嚟會贏出呢場賽事！第二同第三都接近㗎不過睇嚟卡迪夫城頂得住有得直接升班！第三同第四嘅富咸同維拉，就會喺温布萊爭奪最後一個升班席位。
五月廿六號，當世人目標都聚焦喺歐聯冠軍戰，我就同八萬幾人一齊走入温布萊，一同目擊呢場全球最值錢嘅季後賽。
賽前一般預測，粒粒皆星兼經驗老到嘅維拉可以喺呢啲一場過嘅比賽稍稍佔優，畢竟維拉隊中有十一人喺温布萊踢過波嘅經驗(結果布魯士真係出曬呢十一個做正選)，而富咸一個都冇。富咸連續兩屆都喺英冠控球率同傳球成功率最高，不過温布萊遠大於卡雲農舍球場，似乎不利富咸嘅進攻習慣。
但踢落完全係兩回事，亦見兩邊領隊喺部署上嘅分野。富咸嘅祖簡奴域一改用盡球場闊度深度嘅踢法，大部份進攻都放棄邊線底線，改喺球場中間組織，繼續踢自己嘅小型球；卡馬拉同耀目新星施悉隆雖然都掛名係翼鋒，但兩人經常移入中路兼各有工作：卡馬拉同正前鋒米杜域兩個大隻佬經常背向龍門做支點回傳俾中場嘅祖漢臣同卡尼，施悉隆就喺弱邊靜待機會。不得不提嘅係，卡馬拉笨唔係富咸嘅恆常正選右翼，今季打呢個位嘅，數多三四個人選都未到佢，而正正就係呢個出奇不意，令到維拉方寸大亂。致勝嘅一球，就係因為今場串演左閘嘅赫頓移入中路招呼卡馬拉，走漏咗入楔嘅卡尼，俾佢輕鬆射入。
落後一球嘅維拉到下半場焗攻，更見布魯士喺戰術方面嘅無能。所有嘅進攻都只係靠球員嘅個人能力單打獨鬥，冇配合冇走位，一切套路，都因爲易於預計而變得防守友善。仼由周柏豪領軍嘅前場再努力都係冇用，一切都在富咸掌握之中，最終維拉以一球見負，繼三年前被阿仙奴擊潰失落足總盃後，再一次敗走温布萊。
講起周柏豪，或者因爲一路都遇唔到個可以啟發到佢嘅領隊，呢幾嚟嘅進步其實唔大。佢仍然會喺唔啱嘅地方現身要波，仍然係拎到個波就用十五分鐘細心欣賞，往往擾亂球隊進攻節奏。相反對面嘅施悉隆，喺祖簡奴域嘅調較下，幾時控幾時傳幾時射，一切都有板有眼，戰術執行力極強，成熟得完全唔似只得十八歲。
上季嘅赫德斯菲、今季嘅卡迪夫城同埋富咸，都說明咗要升班，有個知人善仼嘅好領隊，有一套好嘅戰術加上有效嘅臨場微調，比起豪擲七千萬鎊砌隊Championship All Stars出嚟仲有用。維拉夏建統老闆嘅名牌球員加名牌領隊策略，用咗兩季嘅時間證實失敗，降班而嚟嘅資金又用得七七八八，星散在所難免。最新消息，第一個冇得續約嘅，係今季表現唔錯嘅隊長泰利。預計年華老去嘅赫頓、當打但冇表現嘅蘭斯貝利等，都會一一被清洗。
恭喜狼隊、卡迪夫城同埋富咸(其實譯富臨係咪啱音啲？)；史篤城、白天鵝、Tesco膠袋，welcome to英冠，過嚟俾叔叔攬攬。
下季再見。
