總編手記：媒體實驗
話說體嘢近來喺《懂球帝》開粵語直播頻道，而且一試播就要為歐聯四強戰：拜仁vs皇馬（首回合）做即場旁述。聽人講波經驗固然不少，如今自己親身上陣，箇中滋味豐富得多。
如果將「評」同「述」兩大功能拆開，我專職「評」、維負責「述」，Nic嘅角色搖擺於兩者之間。Nic、防中維嘅臨場應變同經驗都比我好，毋須長時間就入到局（冇佢哋湊住我絕不可能充撐90分鐘）。而且，首次試播長期維持接近4000人欣賞我哋聲音導航，值得鼓舞之餘，亦令我哋更有信心再接再厲。
喺懂球帝做即場評述，係相當有趣嘅媒體實驗。足球評述係重要嘅導賞工作，既展現個人語言技巧、對足球運動嘅見解，更包括個人對社會、人生嘅價值觀（足球觀點之異，有時候可能更折射個人美學、道德倫理、歷史同政治價值觀，有機會另寫文章探討一下）。面對同一個比賽畫面，有十數種風格嘅評述選擇，就如同為球迷帶來十數種導賞經驗——足球賽事轉播有朝一日能夠如此開放交流，對於呢種運動嘅推廣同受眾都會獲益匪淺。喺懂球帝做即場評述，就係一種「去大台」嘅媒體實驗。
但足球評述呢一座殿堂嘅門檻好高。喺英語世界，足球旁述嘅影響力足以成為Football Museum嘅分類主題，而且館中更會展示與評述、主播相關嘅文物，可見呢份工作喺足球、媒體發展嘅歷史價值（香港喺華語世界早期足球發展亦佔關鍵地位，僅「足球評述」一項已經好有影響力）。門檻之所以難登，無非因為「專業」二字。
我都係轉播文化長大嘅球迷，對足球嘅見解、興趣，莫不受之影響：聽阿叔講世界盃，聽劉舜文、何柏霖講德甲，Keyman、陳葦如講意甲，由ESPN年代嘅何輝到Now嘅陳?俊講英超，佢哋嘅識見、專業，我輩難以企及，更應時時借鑑。即如平日夥拍肥蘇做節目，亦自覺對足球認知有所不如。觀眾崇優，自然選擇專業；如果喜歡我所講嘅媒體實驗，亦可以選擇體嘢。
喺稍後日子，體嘢會繼續為香港以外地區嘅網友、球迷送上各類粵語賽事旁述、視像節目，希望大家樂在各種交流之中。
