絕無半點虛話，即使主場領先 3-0，做夢也沒想到利物浦能夠順利晉級四強。甫開波兩分鐘便告失守，「弊啦弊啦」嘅情緒更是一直揮之不去… 直至沙拿在 ’56 嘅入球，緊張嘅心情才一下子變成激動嘅亢奮。
賽後，各方討論均指曼城下半場嘅體力不繼，是導致利物浦「吃雞」成功嘅關鍵。此點我不容否認。但更重要嘅係，哥迪奧拿首次回合都排出「慢性自殺」嘅陣容才是利記能夠 #大吉大利 嘅主因。
何解「慢性自殺」？綜觀首次兩回合，開波初段，曼城皆佔了絕對優勢。但哥帥首回合作客晏菲路，以獲加、奧達文迪、甘賓尼、拿撲迪排出四人防線，即使沙尼多番在左路發難，但缺少了左閘支援，令沙尼要以一己之力面對阿諾、路夫雲、軒達臣和張伯倫等人，無疑是對沙尼個人嘅過份苛求。漸漸地，沙尼的進攻模式被套路，亦間接為近期屢遭利迷所詬病其防守力不濟嘅阿諾打下強心針，反之變得越打越有。
其次，哥帥誤用根度簡於首回合擔任右路中場攻擊手，亦埋下中場掃蘯力後勁不繼的伏線。首回合，根度簡在進攻上零貢獻，故早早便被哥帥拿掉退下。然而，此舉埋下一對鎮守中場中路球員──迪布尼和費拿甸奴──的體力後勁不繼嘅伏線。
曼城七日內三場大戰，對面屋阿婆都知道此對球員嘅體力消耗極大，故哥帥主場迎戰曼聯一戰中，亦刻意收起部份主力。而當曼市打吡中場休息時，作為局外人/旁觀者的我，眼見曼城上半場輕輕鬆鬆領先兩粒，下半場大有機會以耶耶托尼入替大衛施華、拿撲迪入替費拿甸奴（戴夫重返中場，甚或一改 3-5-2 陣式）、阿古路出嚟「踩下草」為三日後嘅絕地反擊作備戰，而迪布尼、獲加、耶穌等卻是可以「抖足」之際…卻萬料不到，領先兩球的曼城，下半場開波未有耐，就遭到疑似受加薪利誘而發惡的一億巴「洗劫」，將比數追平；或者哥帥不介意把奪冠的日子推遲，但當史摩寧把賽果改寫成 2:3 時，主場打吡戰如此失威，哥帥難向球會一眾上下作交待。別無他選下，只好先後在 ’72 和 ’76 換入三名主將作最後反撲。此舉暗地裡埋下了歐聯次回合下半場體力不繼既伏線。
所以，哥帥深知球隊體力因連日來連場大戰已消耗得七七八八，當次回合上半場尾段沙尼的入球「被黑掉了」時，哥帥不釋被趕出場的代價，也勢要向球證作出激烈（但合理）嘅投訴以討回公道。因為若不再把比數收窄，早晚會落得「放虎歸山」的結局。
最後，容我簡單一點作結，若哥帥首回合的排陣短評是防線對進攻上嘅支援不足，造成無法打破僵局反被連入三球的不利賽果；那麼，次回合的評語便是前場球員對後防的支援不足。由四人防線，以不諳助攻的拿撲迪出任左閘，到 3-5-2 陣式，以體能未能踢足 90 分鐘高強度足球嘅 B. 施華和沙尼擔任兩翼衛（補充一點，上半場連番施射造成險象環生的 B. 施華，下半場明顯地隱咗影，好矛盾嘅講法，但明嘅自然明），都顯出哥帥兩仗的排陣失衡。
利物浦能夠一騷十年之癢，再次擠身歐聯四強，固然己隊球員功不可抹，但多少也受惠於曼城過去七天的進退失據才能「如魚得水」。
踏入歐聯四強，利物浦大有機會遇上皇馬、拜仁等豪門強隊（撫心自問，今日既曼城，實力仍未達皇巴拜水平）。小弟愚見，利記嘅基輔之路相信難再向前踏出一步，但回想季初本以擠身歐聯十六強為目標的利記，如今能夠鬥到四強，實屬超額完成！
