[圖集]屬於香港意甲球迷嘅一日：第二屆意甲球迷會賀歲盃
（編按：由意甲大本營主辦第二屆意甲球迷會賀歲盃於大年初四假維園硬地足球場舉行，有八隊球迷會球迷參與，並有意大利駐香港領事館官員負責頒獎儀式。冠軍由AC米蘭香港球迷會在決賽以3比0擊敗祖雲達斯香港球迷會。）
文：甘@體嘢
經過今日，香港，真係仲好多人支持意甲嘅。
與拍檔組織「意甲大本營」後，接手籌備同舉辦「第二屆意甲球迷會賀歲盃」，今次好難得有8隊及至少100位球員參加今次比賽，而且除了體嘢外，仲得到nowtv及keymansoho來採訪，最後亦邀請到意大利駐港澳領事館傳媒主任Antonio Zimone，至少證明意甲在香港還有一定嘅新聞價值和市場。
今日聽到最多嘅係「唔該曬、多謝曬」，但講到尾，無大家支持同埋出席，點會搞得成今日賽事？幾支上年參加過嘅球迷隊包括米蘭、國際米蘭、祖雲達斯、拉素及羅馬俾左唔少意見；另外兩支新參加嘅球迷隊費倫天拿同拿玻里，過程中知道可能因為賽期更改，在組隊上有困難，但最後大家為左賽事都齊腳出席，同埋幫手拍攝嘅意甲聯隊，先可以令成個賽事順利進行。
今次比賽再次證明，或者好多人眼中意甲係辣薩波、沉淪波、WFC，或者已經唔知意甲宜家有咩球員，或者好多人唔會再睇意甲，但至少佢地仍然會出嚟支持自己嘅愛隊同國家隊，而且當有意甲新聞或者意甲活動相關嘅時候，大家都會一呼百應出黎支持。
多謝今日出席賀歲盃嘅8支球隊，多謝今日專誠來支持嘅朋友，最後當然要多謝一班出心出力嘅拍檔，無佢地真係唔成事，希望意甲喺新嘅一年更多人留意，更多人關注！
資訊浩瀚；東張西望。
竭盡所能；深入求真。
企高一格；全新體法。
