香港，仲有人睇意甲㗎！｜甘＠體波台
作為一個80後，90年代開始睇波嘅球迷，初次接觸足球係94世界盃，見到馬甸尼、巴里斯、巴治奧呢啲球星，好難唔喜歡呢隊意大利。世界盃後開始睇波，當年睇嘅固然係有意甲七雄❨有講法叫七姐妹❩嘅意甲。小世界盃每季爭崩頭，粒粒皆星，宜家回味呢個年代嘅波，真係好有味道。
踏入千禧初，帕爾馬、拉素同費倫天拿紛紛陷困境，意大利經濟泡沬爆破，連帶意甲漸漸星散，而英超得到贊助及轉播，順利成章成為香港人最關注、最受歡迎嘅聯賽。再後來種種原因，意甲球星出走，香港電視台甚至連意甲嘅播映權都懶買，寧願投資天價嘅英超，迎合市場需要。意甲，漸漸變成所謂嘅WFC、辣薩波、沉淪波。
2015年有幸獲高總邀請成為體嘢一份子及體波台主持，可以喺網絡上參與更多足球討論，其間發現香港仍然有唔少意甲迷。呢班意甲老球迷，由十數至廿幾年前學生或後生年代開始睇，只不過到呢刻，各自因為返工、成家立室，再無時間睇波，即使有睇，都喺英超主流掩蓋下成為小眾被邊緣化。但其實，大家仍然好鐘意意大利波，至少香港仍然仲有幾隊傳統豪門嘅球迷會，而費倫天拿、拿玻里近年再次冒起，亦受到大家注目，甚至香港有帕爾馬、熱拿亞、森多利亞同卡利亞里呢幾隊老牌球會嘅球迷，佢地對意大利波嘅執迷，比起好多球迷更瘋狂、更痴線。
米蘭老人院？AC米蘭仲有邊個？邊隊係薩斯索羅？賓尼雲圖即係咩？相信作為意甲球迷每次同朋友講起｢我鐘意睇意甲｣都會遇上呢啲問題。你唔解釋，大家冇話題；你解釋完，佢其實都可能唔多識。或者，有人覺得，意甲波節奏波、好悶，但意甲波就好似捉棋咁，充滿技術智慧同戰術，再追溯返意大利喺足球戰術史嘅領域，無不有另一番嘅感受。而且，近年意大利足球在戰術思維上的改變，亦帶來主流嘅娛樂化價值。無他，傳統媒介對意甲嘅輕視，又或者不求甚解，只係發放既表面又狹窄嘅資訊，令香港人對意甲嘅認識更局限。
有資深球迷基礎、有值得睇嘅看點，一直喺度諗，啟蒙我睇波嘅意甲究竟可以點樣再成為大家關注嘅話題呢？於是年底決定和幾位喺網上認識嘅拍檔成立一個全新嘅意大利足球及文化社群「意甲大本營」，希望推廣意大利足球同文化，從球隊球員，以至經濟歷史嘅資訊評論帶俾大家，當然唔少得舉辦活動，同咁多位窒伏已久嘅意甲球迷交流交流，齊齊支持愛隊，睇好波。
雖然2018年係意大利傷痛嘅一年，世界盃出局、歐洲賽事成績暗淡，不過作為死忠意粉，依然係會繼續支持意大利波！第二屆｢意甲球迷會賀歲盃｣只係第一次活動，嚟緊仲會有更多嘅野同大家一齊去推動香港嘅意大利足球。各位，記得年初四嚟維園，支持下愛隊、支持下我地、支持下意大利足球啦！
