鞭屍「體」：邊個話雲爺爺從不阻止賣人畀競爭對手？

由艾迪巴約、拿斯利、雲佩斯，到今天嘅山齊士，阿仙奴球迷一直詬病主帥雲加將陣中主力賣畀競爭對手，讓對手坐大。其實，雲爺爺也曾試過阻止向競爭對手輸出人才，而當事人正是——迪！布！治！（唔係迪布尼）

事緣喺2015年夏天轉會窗，當時曼聯領隊雲高爾物色一位右閘，代替拉菲爾達施華（Rafael Da Silva）離隊嘅空缺（後者轉戰里昂）。喺轉會市場最後一天，曼聯突然向阿仙奴洽購迪布治。當時啱啱年過30嘅迪布治，喺2014年9月經歷韌帶撕裂長抖大半季，所以喺阿仙奴傷多過踢。難得方丈邀請，迪布治心諗呢次係事業翻身嘅難得機會。

點知，雲加一口拒絕左曼聯。理由係唔可以增強競爭對手嘅實力。

迪布治事後曾經向法國Canal+電視台談及呢段不快經歷，並直言自己對雲爺爺「阻人發達」有點不滿。佢仲批評雲加，曾經應承畀佢多啲比賽機會，但係雲加無兌現諾言。喺一年後，迪布治又向法國〈隊報〉翻舊帳，有記者喺記招問雲加是否真有其事，佢除左否認有曼聯嘅報價外，更強調迪布治冇得上陣嘅原因只係受傷。

之不過，當事人一口咬定方丈真係邀請過佢過檔。肯留迪布治，唔肯留雲佩斯同山齊士，雲爺爺嘅思考領域，真係好令人摸唔透……

消息來源：
Skysports

體嘢編輯部

資訊浩瀚；東張西望。
竭盡所能；深入求真。
企高一格；全新體法。