【環保文】總編手記：馮檢基，今次你準備踢咩位？
編按：永續參選的馮檢基又參選了（2018年10月1日），這篇在2018年1月寫成的環保文，每逢基哥參選就會貼一次，相信各位讀者不會感到有新意。
睇足球同睇政客，從來唔應該睇年齡，我大抵同意，不過最好唔好套用喺馮檢基身上。
或者因為近排大家興講集體回憶，馮檢基同佢嘅公關（哪裏來的）自信係屬於大家美好回憶嘅一部分，所以搵老來得奬嘅李克勤嚟類比自己。幸好泛民初選期唔長，要不然佢啲公關又會粉飾佢係「政壇宮崎駿」、「政壇三浦知良」、「政壇又乜又柒」，呢場公關災難又會延續落去。
都係講返足球。今次九西基哥嘅最新搞作，係話自己屬於議會嘅進攻中場。不過，細心留意政治新聞嘅讀者應該知道，馮檢基口中佢嘅位置係常變：由「中鋒」，到「中後場」，再到今日嘅「能攻擅守」嘅「進攻中場」，只差龍門未踢過咁解。好明顯，無論基哥定係佢嘅公關，對足球運動嘅位置感缺乏理解，而缺乏理解嘅人係唔識知所進退。之不過，九西基哥向來有一種「有位就要踢」/「有議席就要坐」嘅精神，位置感當然唔重要。又之不過，無論領隊定選民，都會更傾向一個具位置感嘅選擇。
如果一個球員年紀大、位置感又差，佢嘅貢獻可想而知。基哥屬於邊一款老波骨？我睇唔透。我衷心希望，大家喺嚟緊立法會補選投票，讓「政壇乜乜乜」可以安享晚年。
