中前場有讚有彈：港隊省港盃簡評 (下)｜KH筆記
上篇講完港隊後場嘅主將，今次輪到中前場嘅一眾球員。因為傷兵、體能等因素，郭嘉諾教練喺兩回合人選嘅變動都唔少，當中唔同嘅中前場組合交出嘅表現亦略有不同，有彈亦有讚：
胡晉銘
年齡：20歲
效力球隊：香港飛馬
上屆省港盃嘅其中一個大發現，就係司職防守中場嘅胡晉銘，拍住陳俊樂控制中場嘅表現令人眼前一亮。今屆樂仔晉身大港腳之後，首回合郭嘉諾教練起用佢擔任正選中場，負責掃蕩同駁腳嘅職責。雖然表現不及上屆咁搶眼，不過重要性依舊：次回合正選收起佢之後，喺中場嘅搶奪同埋防守方面，港隊都有所不及，呢位20歲中場嘅表現不言而喻。上年已經晉身A隊嘅胡晉銘，相信前途依然相當明朗。
羅港威
年齡：25歲
效力球隊：東方龍獅
近年表現比較低沉嘅羅港威，嚟到省港盃表現反而有啲起色。首回合擔任正前鋒，喺前場停球與及同黎洛賢執行緊迫戰術都顯示到自己嘅作用，對於廣東隊嘅防線都造成唔少嘅體力消耗。較為可惜嘅係上半場一次反擊爆咗半場之後，埋門一腳嘅處理比較差，未能為港隊先開紀錄。希望過咗省港盃一役之後，羅港威可以繼續提升狀態，重拾當年踢亞協盃嘅表現啦。
袁振昇
年齡：24歲
效力球隊：和富大埔
現年24歲嘅袁振昇，其實喺青年軍時期係方栢倫同黃威嘅隊友，不過中途放棄職業足球嘅佢，到今季加盟和富大埔先係首季征戰職業足球。次回合擔任單箭頭，雖然供應不多，但係都能夠做到前場支點嘅工作，有一球先分波去右路，再走入禁區接應，一控一射，絕對顯示到佢嘅個人技術。雖然兩次中目標嘅射門都未能化為入球，不過以一個第一年踢職業足球嘅球員嚟計，呢張成績表算係合格啦。
卓耀國
年齡：23歲
效力球隊：標準流浪
鄭重宣佈，香港球迷都愛國，「國」係卓耀國個國。郭嘉諾教練喺兩回合都安排卓耀國喺下半場嘅後段先後備上陣，衝擊廣東隊嘅防線。呢個調動喺首回合絕對係立竿見影：卓耀國入替後，不論邊路突破、傳送同製造反擊，都為港隊注入充足嘅能量。先開紀錄嘅一個角球，雖然唔係由卓耀國博得，導致呢個角球嘅，正正係卓耀國喺右邊爆破嘅成果；至於第二球嘅個人反擊，就在此不再多提啦。季前已經有傳獲馬來西亞球會睇中嘅卓耀國，據報喺省港盃前後更獲中超同中甲球隊招手，希望佢藉住今次省港盃嘅表現，可以盡快向外闖。
陸志豪
年齡：32歲
效力球隊：冠忠南區
有時唔係話唔比機會，但係陸志豪呢兩場省港盃嘅表現，又真係難以說服球迷值得踢A隊。首回合嘅死球處理係出色，但係除此之外嘅表現都只係一般，傳送同把握機會嘅表現都麻麻。次回合去到廣東踢進攻中場，傳送質素差，串連中前場嘅效果同樣不敢恭維。陸志豪今年都已經32歲，加上港隊進攻中場仲有黃威冒起，其實真係可以專心踢冠忠南區。
黃梓浩
年齡：23歲
效力球隊：東方龍獅
上屆省港盃踢左翼幫港隊入波嘅黃梓浩，今屆反而踢得患得患失。喺左路唔多見到佢身影，反而喺中路有時仲出現得更多。偶爾會搵到啲埋門機會，但係起腳嘅時間往往都未準備好，踢落予人一種失魂嘅感覺。或者係已經習慣咗喺東方龍獅踢左閘，宜家踢返左翼、主力負責助攻有少少生疏，不過以一個有省港盃 (甚至係亞冠盃) 經驗嘅球員嚟講，「王子」今屆嘅表現實在有啲失色。
