一搔四年之癢：港隊省港盃簡評 (上)︱KH筆記
踏入2018年，港隊第一擊就係以B隊迎戰嘅省港盃。由青年梯隊教練郭嘉諾領軍之下，港隊有個好開始，首回合先喺大球場以2-0擊敗廣東隊。雖然次回合作客被對手追和，但港隊互射十二碼以4-2擊敗對手，重奪失落四年嘅省港盃桂冠。
呢隊俗稱「港B」嘅香港隊，主要由本地嘅年輕球員同港隊嘅非常規成員組成。而過去幾年由廖俊輝帶隊嘅「港B」，都係因用波組織而引人注目。今屆人腳洗牌 (陳俊樂已經升格做大港腳；曾文輝、林學曦等球員未有入選)，加上換帥領軍之下，港隊表現最好嘅，反而係有紀律嘅防守，唔單止後防表現穩健，前場黎洛賢、袁振昇、羅港威等球員嘅緊迫防守亦相當出色；不過傳送同組織嘅質素就有啲不如以往，所以喺進攻方面，呢支港隊都係比較依靠死球同反擊去製造威脅，首回合嘅兩個入球都係咁樣取得。
次回合作客，面對廣東全力進攻，港隊大部份時間都受壓，不過防線嘅表現都尚算有紀律，可惜兩次嘅犯錯，令港隊喪失首回合嘅領先優勢。雖然其後大部份時間繼續捱打，不過港隊有血肉長城同埋袁皓俊嘅神勇表現，將比賽帶到互射十二碼並且奪冠而回，都值得大家嘅掌聲。
跟住落嚟就要講下個別球員嘅表現，呢篇先講後場：
袁皓俊
年齡：22歲
效力球隊：香港飛馬
開季嘅時候仲係後備門將，袁皓俊喺對東方龍獅一役因為梁興傑受傷而擔任正選，其後一直穩坐球隊嘅正選位置。今屆省港盃佢力壓謝家榮同陳嘉豪兩名門將，取得正選席位，亦都冇辜負郭嘉諾對佢嘅期望。首回合主場表現穩健，力保不失；次回合更加屢救險球，係港隊能夠力戰至互射十二碼嘅最大功臣。喺互射十二碼階段，袁皓俊救出兩球十二碼，協助港隊取勝。雖然喺處理高空波，部份臨場嘅決定上仲有進步嘅空間，不過佢今屆省港盃嘅表現，亦證明咗自己有力喺港隊嘅梯隊中更上一層樓。
張志勇
年齡：28歲
效力球隊：香港飛馬
如果大家對上屆省港盃仲有印象嘅話，應該記得廣州富力嘅中國國腳肖智對住張志勇可以話係睇定嚟食；不過今屆張志勇嘅表現可以話係脫胎換骨。擔任隊長嘅佢，喺後場包位、處理高空波、以至指揮防線，都做得相當稱職，港隊防線表現穩健，佢可謂功勞不少；進攻方面，佢首回合死球後上助攻亦有斬獲。兩回合計，港隊嘅最佳球員應該都係呢名28歲嘅中堅，而今屆省港盃嘅表現亦向大家說明，點解佢可以喺球會力壓另一位後起之秀梁諾恆，同羅斯擔任正選中堅。
徐宏傑
年齡：21歲
效力球隊：標準流浪
去年8月底晉身大港腳嘅徐宏傑，今次省港盃嘅表現比起首次踢A級國際賽可謂愈踢愈好。汲取過港隊比賽經驗之後，返到省港盃夥拍張志勇穩守防線，應付對方國腳級前鋒肖智亦未見輸蝕 (仲有手榴彈賣！)。比較可惜嘅係佢喺次回合下半場腰傷復發，需要退下火線。雖然如此，呢位年僅21歲嘅小將相信前途依然無可限量，有力成為港隊下一代嘅防線人選。
方栢倫
年齡：24歲
效力球隊：香港飛馬
上屆省港盃，大家對方栢倫嘅印象應該係直線盤球推波出界。不過今季喺香港飛馬表現持續進步嘅佢，嚟到省港盃亦繼續交出表現。喺左翼黃梓浩發揮一般下，擔任左閘嘅方栢倫覆蓋左路嘅範圍甚廣，雖然缺乏機會展示佢今季大有進步嘅傳中，不過佢都憑住良好嘅身體質素，守住港隊嘅左路防線。以左閘球員而言，本來覺得喺中國重新開放內援名額之後，方栢倫可以藉住省港盃嘅表現，再度進軍中國，不過經歷過次回合憤怒的中指之後，就有少少保留啦……
翟廷峯
年齡：28歲
效力球隊：和富大埔
今屆省港盃嘅最不幸球員，應該就係翟廷峯啦。首回合表現穩穩陣陣，次回合就馬上嚟料：先係上半場一次同黎洛賢包夾盧琳嘅時候，出腳被對手博得十二碼；到咗下半場就喺對手一次傳中嘅時候，情急之下擺烏龍，間接幫對手扭轉落後2-0嘅局勢。當然不幸還不幸，翟廷峯如果要更進一步，重返大港腳嘅位置，喺防守上嘅決定 (尤其係出腳嘅時機) 都需要繼續改進。
