總編手記：集體懷念

尋晚聽陳奕迅、謝霆鋒重上叱咤舞台唱〈我的快樂時代〉同〈活着viva〉，很難唔引起集體懷念嘅狂熱——一代人自有一代人嘅歌，而且我地有幸見證過香港流行文化嘅鼎盛年代，呢一切一切都發生喺我十至二十歲嗰段時空。

如果話呢段時間係一個人一生聽歌最多嘅時刻，睇波亦然。Sorry，哥迪奧拿套戰術係好精細啊，高普套pressing係好有激情啊，但無論佢地點好點好，都唔會比嗰個階段你接觸嘅足球更好睇嘛。所以早一排曼城仲連勝緊嘅時候，終於有人拎而家嘅佢地同04年阿仙奴、05年車路士比較，雖然呢種比較係一定會發生，但係任何事物都敵唔過自己嘅記憶。就正如你去問一位阿士東維拉嘅球迷，佢都會同你講82年嗰隊拎歐聯冠軍嘅維拉同百事一樣咁正，而且勁過你呢支用金錢砌起嘅曼城成條街。

更況且，我係曼聯球迷。唔理你係反定係盲反都好，我都係最鍾意90年代嘅曼聯，同90年代嘅英超。講到呢個位，不得不提一位叫財哥嘅紅的司機，同埋上邊呢張相。

我冇見過財哥本人，只不過係我地嘅技術總監Adrian有一日搭的士嗰陣遇見佢，咁啱傾落先知道佢係曼聯球迷。呢張相聚晒一代人嘅記憶。驟眼睇，以為佢係碧咸fans，因為呢堆公仔裏有兩個碧咸，而且隔離仲有位巴夫斯。成日上網睇見有人笑巴夫斯係神經刀，我真係得啖笑，佢係有過甩碌鏡頭（例如01年對拉科嗰場歐聯同布朗撞埋一齊嗰啲呢），但佢啲龍門球同腳法放喺今日其實唔錯，而且反應快、防守面積大，而家睇返佢啲波，絕對唔係而家啲人講到咁差。我心諗，呢位財哥擺得巴夫斯出嚟，品味絕對凌駕好多公海球迷。

點知一問起Adrian，佢話財哥嘅心頭好係麥佳亞（Brian McClair）。麥佳亞身型強壯而且有速度，最擅長執第二點後上施射，係英式442裏面嘅典型二前鋒。而且佢入球量好穩定，加盟球隊第三季同曉士仲相當合拍。史特根形容，佢係一頭「蘇格蘭草原蠻牛」，非常剽悍。不過令人印象至深嘅畫面，當數呢一幕：

91年球季阿仙奴拎英甲冠軍，嗰季兩軍互撼，麥佳亞唔只射失球十二碼，仲畀溫特本係咁狂潤，於是佢地兩個人互相飛鏟，齊齊拎紅牌離場，最後兩軍索性開拖打到飛砂劈石（只得返最斯文嘅施文冇參與群毆）。簡大帝加盟曼聯之後，麥佳亞越踢越後，甚至轉踢中場中，已經係後話（情況如同十年前費格遜叫阿倫史密夫轉踢中場一樣）。嗰季曼聯喺聯賽最後一輪作客高貝利，輸3-1之後仲要列隊歡迎阿仙奴，又係另一個後話。

90年代初甚至年代更久遠嘅曼聯，的確踢得好揦鮓，麥佳亞就係其中一個象徵。嗰陣時嘅曼聯正選十一個人都好揪得，輸人唔輸陣，想當初喺更衣室畀法比加斯掟pizza、而家畀曼城掟奶嗰啲濕碎嘢，邊有得同91年呢隊比。再況且，91年曼聯打贏巴塞拎歐洲盃賽冠軍盃冠軍，係希素慘案後第一家英格蘭球會拎歐戰錦標，意義就更不同凡響。就算呢隊曼聯嘅足球簡單同直接，但論性格，佢地比起而家啲波更有稜角。

愛上麥佳亞同91年曼聯，係一份值得財哥驕傲嘅事情，畢竟佢地一齊度過嗰個年代。對於足球同香港流行曲，最好嘅時光，始終都係停留喺九十年代。

Eric@體波台

www.facebook.com/erickosportsyeah/