#FIFA18 前瞻 #3 —— 數字之爭 | 蔣美葉
當利物浦大部份球員在 FIFA 18 最新數值公佈後，唔少利迷都表示因為利物浦簽咗 FIFA 死對頭 #PES 作為電子遊戲嘅最大合作夥伴，而惡意兼蓄意地莽顧事實地將紅軍所有球員能力較得偏低作為報復，更直斥 #EASports 一向倚重曼聯。對此，我表示不能認同更多；但魚拉突們，則對此表示不敢恭維。全因曼聯 Wonderkid 拉舒福特 (Rashford) 在 FIFA 18 只有 79 嘅 OVR，比死對頭曼城嘅 #耶穌 81 低！
可能會有人話，FIFA 只不過係一隻遊戲，Why so serious 呢？此言非也！其實每年都有唔少球員親自公開高調地直斥 EA Sports 就 OVR 嘅高低而有所怨言。近年最經典嘅當然係華迪 [1]，而今年隨車路士出訪亞洲嘅比利時小將，當射入兩球靚波後亦要求 EA 將佢設定成五星逆足。
不過就算 EA 見到有關 Tweet 都好，不單止無動於衷，更將巴舒亞伊在 FIFA 18 嘅 OVR 降低一格，惹來巴舒亞伊嘅 #大控訴。
FIFA18 苦主又豈止巴舒亞伊一人，最新一份子係今年以 5300 萬鎊，破最高後衛轉會金額加盟曼城嘅班捷明文迪！應該係佢試玩完 FIFA 18 Demo 後無耐，就喺 Twitter 炮轟 EA 上年係咪唔見咗部電視，點解佢今集得 78 嘅 OVR！
數字高低，可能有人唔明做乜睇咁重。但作為職業球員，踢得高水平聯賽，效力大球會，而且 FIFA 已成為全球數以百萬計球迷兼機迷多一個渠道去「認識同了解」更多球員，所以又難怪班球員將呢堆數字睇得咁重！
