啱啱今個星期六，港超直落三場聯賽都有東網電視直播。雖然三場比賽都受大雨影響而變成雨戰，不過並無損比賽嘅精彩程度。當中幾位華人射手嘅精彩表現更加向大家證明，即使喺外援前鋒當道之下，華人球員喺前線依然有佢哋嘅價值，可以穩佔一席位。
卓耀國 (標準流浪)
標準流浪今季由李輝立再度執掌，以華人年輕球員作為骨幹。作客冠忠南區，流浪中前場都起用劉卓軒、黎洛賢同埋卓耀國等本地球員；教練狄恩亦有利用本地球員嘅比較細膩嘅技術，嘗試以地面組織進攻。不過從呢場比賽嚟睇，佢哋嘅走位同埋傳波都有唔少出錯，似乎喺默契上都仲係有待磨合。
雖然如此，由R&F富力回歸標準流浪嘅卓耀國依然持續佢上季攻入7球嘅勇態，下半場把握一次反擊嘅機會，接應卡錫嘅直線突擊得手，扭過冠忠南區門將謝德謙，為球隊追近比數至1-2。之前有傳卓耀國受東南亞球隊嘅注目，有意喺一月嘅時候向佢招手，希望佢可以保持自己嘅表現，幫標準流浪爭取成績嘅同時，同樣為自己爭取外流嘅機會啦。
梁嘉恆 (香港飛馬)
華人前鋒除咗有香港土生土長嘅射手之外，同樣有來自澳門，效力香港飛馬嘅梁嘉恆。對戰R&F富力嘅時候，梁嘉恆雖然因腹股溝嘅傷患暫列後備，但係伊高喺開賽初段被對手門將撞傷之後，佢都要帶傷上陣。不過傷患似乎無阻梁嘉恆突破同入楔嘅能力，喺下半場先於左路突破，射門被救出後窄角度補中；隨後再接應方栢倫恰到好處嘅傳中，喺門前射入，為飛馬將比數拉開到3-1，奠定今場比賽嘅勝局。
不過喺贏波之後，梁嘉恆下星期就需要接受手術，根治腹股溝嘅傷勢，需要缺陣大約三星期。對於前線兵源不多嘅飛馬而言，如果傷出嘅伊高同樣需要休養，咁下星期對戰傑志嘅時候，進攻火力就會成為球隊嘅一大隱憂。
黃威 (和富大埔)
堅家鋒將初長成，兩年前斷腳嘅黃威喺今個暑假做手術，拎走右腳脛骨嘅鐵之後，信心同埋狀態都屬巔峰。繼周中代表港隊作客馬來西亞，後備入替交出表現之後，星期六返到港超迎戰東方龍獅，更係交出自己嘅代表作。
和富大埔排出3-4-1-2嘅陣式之下，擔任前鋒嘅黃威主要負責支援迪亞高，喺上半場已經多次交出直線，製造有效而且具威脅嘅反擊。到咗下半場，三個入波佢都參與其中：追和1-1嘅一球，就係黃威喺中圈附近交出一球準繩嘅直線，迪亞高喺左路突破，傳中之後由後備入替嘅本地前鋒袁振昇門前射入；到咗比賽末段，迪亞高喺左路被對方侵犯，黃威主理嘅罰球造就杜度門前頂入，為球隊反先；而奠定勝局嘅一球就更加下佢嘅個人表演：接應迪亞高嘅傳送，單刀扭過曾錦濤同埋葉鴻輝，冷靜射入，盡顯個人質素。
縱使外援或者歸化前鋒當道，今個星期嘅港超聯話俾大家知，華人射手唔使轉型踢翼踢閘，都可以憑住自己嘅能力同埋努力，去屬於爭取自己嘅位置。希望各位華將繼續有好嘅表現，證明自己絕對有能力同其他球員競逐所屬球隊，或者係港隊嘅正選席位。
圖片來源：香港足總、蘋果日報、香港01
