筆者本身好鍾意玩足球遊戲，FM、FIFA一定會玩。舊年出FM嘅時候，正值紐卡素降班，由英冠玩起。遊戲世界好過癮，紐記比現實更超班，仲要贏埋聯賽盃添，太誇張喇！升班第一件事，用舒維爾同打比交換韋爾曉士，再買埋修頓個禾特包斯，確保中場運作，亦減輕紅牌、停賽嘅壓力。無錯，我打機咋，舒維爾都可以不斷攞紅牌停賽。
上星期英超開鑼，舒維爾又再魯莽地踩阿里一腳，直接領紅出場。鑑於上季英冠都有類似事情發生，個人認為賽會重罰五場係絕對有可能！
熱刺質素喺紐就之上，主守係無可奈何，加上杜美特受傷、尼祖尼被鏟傷，打亂紐記部署。但係少打一人之後，根本連守都守唔住。嗰球阿里有幾挑釁呢？犯不著要出腳啫……從而我哋可以睇到舒維爾個人情緒控制有極大問題。如果因為佢幾場先有一兩腳妙傳，而將整隊球隊圍繞佢嚟踢，我有極大嘅疑問。
佢罰出場之後，熱刺進攻更輕鬆，而且明顯留有一手，不得不承認熱刺喺英超內戰有佢哋嘅成功之處。但係我要提出嘅係，呢一兩季熱刺不斷踢出一啲富挑釁性、不斷試球證底線嘅足球風格，總有一日會自食惡果。當整個球壇都知你踢呢家波，球證仲會唔會當睇唔到？每每五五波嘅時間，會唔會特別「留意」佢哋呢？而阿里呢類小聰明，如果換嚟半季唔踢得，個人認為絕非好事。凡事去得盡，老人家話唔長命㗎……
總結，今場波輸一人魯莽嘅犯規，但整體戰術執行、佈防嘅站位，都無因為少打一人而大亂，呢樣嘢對紐卡素出名性感嘅防守，有好重要嘅標誌作用。希望可以持之以恆，前線當然買人係當務之急，但係同中下遊球隊對碰時，不致跌落下風。
#陳沖 #紐迷筆記 #theoutsider
