感恩同盲忠，唔係一體兩面 | Nic
睇完基沙文自傳講阿仙奴，話雲加和佢經理人傾完一大輪又話希望佢加盟，但原來最後乜都冇做過，浪費大家精神、時間，令他感到失望。以後阿仙奴搵佢，佢都耍手擰頭。相信大把似基沙文嘅事例，有待公佈。如Draxler 、Lacazette 等人，大家都應該知道差唔多，人地打起咗又唔會睇得阿記上眼，更只會對前事耿耿於懷。
偏偏雲加呢幾年搞衰咗個朵，真係嚇死人。佢老人家開始唔太識調教球員，大部分人集體退步，人地都唔只關心Trophy、錢，如果喺雲加麾下連自己發揮都成疑問，點搞？
難吸引大牌
球探事小，但係以前幫阿仙奴出面傾嗰位係UEFA（兼阿仙奴）高層David Dein。 其他球隊要俾面你，買柏金、奧華馬斯呢啲大牌咁順利，都係Dein 傾番嚟。冇左呢隻左膀右臂，依家買乜都難。大家睇拿卡錫迪，就會略知一二。明知阿仙奴神女有心，偏偏佢本人襄王無夢，寧願去馬體會。唔好話馬體會，高普可能都比起你雲加更號召力。加上近幾年，雲加嗰啲 bluff / bid 吓唔 bid嘅壞習慣，絶大部分球員在他手下越踢越沉（除左山齊士同高斯爾尼），根本好難再吸引大牌，而家又要踢歐霸。阿仙奴要復興，只要有雲加在，只會越來越困難。
阿仙奴論近幾四季在轉會市場的淨支出在全英超只落後「雙曼」，不是班主肯不肯洗錢的問題——車仔近年喺轉會市場獲得盈利㖭，咪一樣拎冠軍？班主高安基非英超最富有（57億鎊排第三），但近三季都使左兩億買球員。要同曼城、車仔鬥錢多冇意思，我唔認為每個球會都需要買人買到負債累累才能有好成績。
蹉跎球員光陰
「能否用好現有人腳」，已經係雲加近年最大問題。其實有施治、貝林連、賀定、梅斯達菲、高斯爾尼、張伯倫、夏卡、藍斯、奧斯爾、山齊士作骨幹，阿仙奴本來可以有一番作為。但雲加有否好好用他們？貝林連同藍斯兩個可造之材，近兩季不進則退；張伯倫浪費光陰，到今季先叫定位清晰番少少；禾仔、傑比斯、張伯斯、贊堅臣更不在話下…….（編按：都仲未計基拿比同金寶，畀雲加白白糟蹋）。球員集團性停滯、退步，咁班主多給五六億你買美斯、夏世三、摩迪、卻奧斯又如何？
平庸化的阿仙奴
沒有了甸恩（David Dean)的阿仙奴，轉會談判上已經沒有昔日優勢；雲加漸失去點石成金的能力；
不只雲加，連教練團（如助敎Bould/Primorac）、體能教練、隊醫都係雲加親信，佢地無能力輔佐雲加重回正軌……偏偏佢地人人有不死身，永世唔炒。球會未來仲可以係點？
亞當斯喺上週訪問中透露，自己曾有四次機會加入阿仙奴教練團，佢希望作為防守教練幫助球隊。不過雲加卻一再拒絕，因為佢覺得雲加不太希望有呢類「頂心杉」喺教練團當中。亞當斯補充了一句：「但與此同時，教波（coaching）卻非雲加的強項之一。」試問雲加現在仲有什麼強項可言？
仲繼續支持雲加嘅阿迷不如諗下，如果佢今夏續約（其實成事機會極高），阿仙奴仲有多少時間可以任人蹉跎？感恩同盲忠，唔係一體兩面嘅事情。
