球壇優質腦細系列：高雲地利 | 金仔足球
英甲已經完結，而家踢緊附加賽，確認升班嘅兩隊係保頓及錫菲聯，而最後一個席位由巴拉福特、費列活特、米禾爾、斯肯索普爭奪。今日講英格蘭球會嘅「優質腦細」，當然要提起降班嘅高雲地利。
今年高雲地利又降一級。佢地16年降到英甲，下季英乙見。今年高雲地利先後經歷四名主教練，但都無個教得掂，曾經揾過耶古保幫手，但呢條友出黎都行行企企，踢左1個月後解約。
高雲地利背後老闆：Sisu公司有幾陰質？其實大家有望下新聞都知，球迷要以掟膠豬仔呢件事表示不滿。除左掟膠豬仔之外，球迷掟網球、硬闖球場等，無所不用其極。其實高雲地利好多Fans仲撐球隊，例如今年EFL Trophy賽 ，高雲地利奪冠，但可惜管理層嘅無能管治令球迷死心。
回想當年（2005年），高雲地利陷入財政困難，當時Sisu 公司介入幫手，租左 Ricoh Arena，但一季租金足足130萬英鎊，令高雲地利比賽日無錢賺（賣食物飲品收入只係得75000英鎊）。到2007年，Sisu 公司全面控制高雲地利，決定唔比 Ricoh Arena租金，搬左去位於Northampton既Sixfields Stadium。Northampton距離高雲地利30公里，球迷要比波飛錢又要顧埋交通費，所以14年又搬番去Ricoh Arena，而租金降10萬英鎊。到今年，Ricoh Arena租約到期，高雲地利CEO表示考慮用高雲地利Rugby用緊Butts Park Arena，但個場得3000人。試問有邊個fans唔嬲嬲呢？
除此之外，青訓營場地又到期。高雲地利青訓話哂都出過球星，青訓營一定要保留。不過，自從Sisu 公司接管以來，已經虧損左4000萬英鎊，真係神仙都難救。
過往的高雲地利都帶來回憶，希望高雲地利快振作。芸芸英格蘭低組别聯賽咁多球會，實在充斥太多無能老闆，有時間再傾過！
