紐迷週記：快樂有時、悲傷有時 | The Outsider
公私兩忙在此就脫期向大家道歉，sorry！本來想做個球季小結，每次落筆，總係有新鮮嘢想加入去，唔通真係咁影響力（誤）？
紐卡素主場憑艾約斯再度怪腳梅開二度之下，4:1大勝普雷斯頓，確保下季升上英超作賽，球迷歡喜若狂！三場不勝、兼送分俾升班對手，呢場贏波就升班，明顯球員決心俾上幾場大。米杜域呢場唔用頭槌改做助攻，季尾先嚟有態，遲好過無喇！而尋晚作客小勝卡迪夫城兩球，白禮頓又輸俾布里斯托，現落後一分居次，英冠冠軍仲有得爭。不過點都好，冠軍有得爭當然爭喇，確定升班就真係放心晒……
服務紐卡素52年、紐記真正傳奇，「茶女士」卡斯迪婆婆(Kath Cassidy)，喺當地時間3月28號離開左我哋。收到有關訊息嘅時候喺日本賞櫻，同時又收到友人喪母嘅消息，一時間百感交集。卡迪斯婆婆九十歲高齡辭世，係福氣、係笑喪。佢對紐卡素嘅貢獻，一定長存我哋心中。對非日本人嚟講，人生能見證東洋櫻花盛開、到落櫻處處，係花見、係幸事。寄語落櫻本是無情物，願助春泥更護花。
另一單想分享嘅紐記新聞，當然係「光頭陳」燦尼(Lee Charnley，多譯作「李卓林」)涉及逃稅事件。自2014年升任董事長一職之後，主要職務都係買賣球員同球會商業營運嘅工作，而成績當然「有目共睹」，大批法甲兵由佢操盤底下，錢就用左好多，但係能夠出場踢波嘅就唔多。今次事件主要涉及利得稅同國家保險稅嘅逃稅案，燦尼高調被帶走協助調查，未知肥佬艾殊利有否涉及有關操作，球會亦無回應有關事件。暫時亦未有涉及中間人收受利益，又或者牽涉回佣等等嘅利益收受嘅可能，作為紐迷當然會繼續關注。希望唔好影響之前燦尼跟進緊同球衣贊助商傾緊嘅合同，球會升班有一大批商業贊助要去斟洽，對季前轉會操作實有影響。另一方面，賓尼迪斯一月期間，曾經對燦尼有微言，有記者問佢點睇燦尼單嘢，佢只係回應話球會「照常營業」，佢哋之前已經開始傾來季嘅備戰工作。當然今次肥賓會唔會借機奪權拭目以待。
最後就係肥賓離隊嘅「新聞」。升班之後，有傳媒訪問肥賓，問佢下季點睇，肥賓回應：「紐記有成個紐卡素支持，但下季點踢、點部署就真係唔知，好多嘢都未確定。你永遠都不知道，足球亦係咁喇……紐卡素令我很驕傲，球迷都好喜歡我。如果要令紐卡素有將來，而家要打好基礎。」好喇，以上嘅回應，你有邊一句邊隻字估到肥賓會離隊？但係華文媒體，就個個都以佢「不確定留隊」、「拒絕承諾留隊」、「將會離隊」去報導……有時，真係唔好怪我拒絕買報紙同click入去啲香港新聞網站。阿哥，新聞真係要做唔係造㗎！每日慳幾蚊，我夠錢買主場作客連練習衫有突，益你？
#TheOutsider #陳沖 #紐迷週記
