隨住原本企喺英冠第三位嘅克打士菲爾德被打吡郡迫和，上咗第一都好幾個禮拜嘅白禮頓終於正式宣佈可以直接升班，仲快過季前大熱門紐卡素。
以白禮頓嘅財力同人腳，要做升降機一啲都唔奇，不過話知佢下季點啦今朝有酒今朝醉，話曬都係首次升上英超！恭喜白禮頓！
以下係一啲唔講你未必知嘅白禮頓二三事：
一
白禮頓嘅死敵係水晶宮。兩個球場相距都成個鐘火車程，絕對唔係愛華頓利物浦嗰隻同市死敵，（btw唔少人話鏝獌其實唔係「同市」死敵，）咁點解會互相仇視嘅呢？
鏡頭一轉去返1976年。當年水晶宮同白禮頓一年內對足五次，淨係足總盃都對咗三次 – 原來當年打和係會無限重賽的，第一次，2：2，super！第二次，1：1，super！第三次，終於分出勝負，水晶宮小勝1：0，但過程又麻麻煩煩 – 白禮頓曾經獲得十二碼，入咗，但因為有水晶宮衝咗入去禁區入面而要重射，重射又竟然炒咗… 為此白禮頓領隊Alan Mullery喺賽後衝入場同球證理論，有水晶宮球迷見狀，竟然用熱咖啡潑向Mullery……不停曾志偉可以忍，但係你竟然出汪明荃！？曾經替英格蘭喺世界盃入波嘅Mullery終於忍唔住，喺褲袋拎出個銀，掟向個球迷個樣！
世仇就係咁樣煉成。
二
Exactly廿年前，白禮頓呢隊波差啲從此喺地球上消失。
話說白禮頓一路都經營得麻麻，有段時間係由一班fans聯營管理，直到1997年， 終於有人願意接手，班fans就以象徵式嘅五十六磅二毫半將球會賣走。點知嗰三個買家根本唔諗住搞波，而係吼中球場塊地，計劃買咗球會之後就散班賣地起樓！白禮頓球迷當然嬲爆，連附近嘅普利茅夫嘅fans都睇唔過眼，喺剛剛流行嘅互聯網度發起活動，希望救救白禮頓。
如是者，來自英國各地、甚至世界各地的球迷，喺1997年2月8日組成咗Fans United，齊集喺白禮頓金石球場，睇咗場英格蘭最低組別嘅職業聯賽。球迷當中有德國人有波蘭人，有伯明翰球迷有維拉球迷，當然有白禮頓球迷但亦竟然有水晶宮球迷… 喺嗰日都各自着上愛隊波衫齊齊撐白禮頓。Fans United對白禮頓有冇實質效用？冇人知，不過，白禮頓喺嗰季捱到最後一輪神奇護級成功，其後亦有白武士將隊波接走。雖然之後白禮頓都唔係順風順水，其後十年都係又財困又搬球場又剩，但起碼「Fans聯」呢啲咁可一不可再嘅場面，可以流芳百世。
Fans聯紀錄片：
三
白禮頓係海邊城市，渡假勝地，地方細細又有兩間大學，仲係歐洲第一大gay town，所以一年四季都好多party going on。最出名嘅就係DJ Norman Cook試過喺白禮頓搞十萬人海灘派對，正到喊！Norman Cook係邊個？咪即係Fat Boy Slim囉。Fat Boy Slim係邊個？佢首Right here Right now曾經被「三間牌」用作廣告歌，你一定聽過：
上季李斯特城奪冠，李城本地band霸 Kasabian喺祝捷大會上台助慶；今季白禮頓升班，唔知本身係 白禮頓人嘅「肥仔瘦」會唔會走出嚟搞場party賀一賀佢呢？
