那些年離開的藍戰士：如果他們遇上干地 | 藍獅
車路士近年被外界認為，放走了不少好球員。眼見雷斯今季回歸車路士，想探討一下部份離開嘅球員，能夠適應干地嘅戰術嗎？
12-13
史度列治 （Danny Sturridge）
轉會至：利物浦
現效力：利物浦
領隊：高普
當年嘅史度列治獲得唔少出場機會，出任球隊邊路攻擊位置，可惜一直搶唔到佢心儀嘅正選中鋒，而轉會至利物浦。及後與蘇亞雷斯和史達寧合組3S，可以話係恐怖級鋒線。但今季顯然在領隊高普手下，因戰術理念未太合適而放置在後備席上，加上球員本人傷患紀錄不段遞增，一道傳出佢會離開利物浦嘅消息；而在干地343嘅戰術體系下，鐵膽必然係迪亞高哥斯達，而身穿史度列治留下來23號波衫（古亞達度係最先接收23號球衣，今季被外借到祖雲達斯）嘅巴舒亞伊亦長期在後備席上。即使轉陣到352，亦有更多選擇比這位利物浦前鋒好。與其回想史度列治，倒不如比更多機會巴舒亞伊更為理想。
13-14
馬達 （Juan Mata）
轉會至：曼聯
現效力：曼聯
領隊：摩連奴
兩屆球會中MVP亦係受萬千車路士球迷寵愛嘅球員，同時為車路士爭奪得各項錦標，因不乎合摩連奴二期防守迫搶標準，而轉會至曼聯。轉會後出任不同位嘅攻擊位置，即使攻中位先係馬達最拿手嘅位置。而球員場內場外嘅表現好快奪得曼聯球迷歡心；在車路士嘅343明顯地沒有馬達嘅位置，即使馬達能打邊路，但以突破性質來說，爭取邊路正選位置實在困難。而如果轉陣到352嘅話，看似馬達能夠放在中場較前位置，但干地要求嘅中場，似乎有更多合心水嘅球員排在馬達之上。車路士球迷嘅情感，與現實需要作角力，馬達留在曼聯發展或會更合適。
迪布尼 （Kevin De Bruyne）
轉會至：禾夫斯堡
現效力：曼城
領隊：哥迪奧拿
現時成為曼城進攻核心嘅迪布尼，可以話狠狠地摑了車路士一巴。當時還身在車路士嘅佢，認為自己應當正選十一人，可惜以位置而論，時任領隊摩連奴認為佢未達標，應付出更多去爭取正選機會。在雙方都不願讓步之下，迪布尼選擇離開車路士加盟禾夫斯堡。當然去到禾堡被安排正選嘅佢發揮得非常好，並且好快成為左歐洲球壇注目嘅攻擊球員，亦都吸引左曼城嘅目光並且收歸其下。依加佢無論要踢邊、攻中，甚至係無鋒陣嘅偽前鋒，質素都相當不俗，相信未來會繼續發熱發亮。依加嘅迪布尼絕對有能力挑戰車路士任何正選攻擊位置，但係佢已經喺曼城成為核心，有必要重回舊地証明自己嗎？
13-14
盧卡古 （Romelu Lukaku）
轉會至：愛華頓
現效力：愛華頓
領隊：朗奴高文
當時以「新杜奧巴」之名登錄英超加盟車路士，外借至西布朗及愛華頓時都有出色表現，而後者更以球會破記錄嘅轉會費收購，這單交易可以話係三贏，始終盧卡古並非跟杜奧巴性質相同嘅前鋒，喺當時嘅車路士戰術體系嘅確發揮唔出球員最好嘅一面。到今季季初以及近期，佢又再跟車路士連上關係，而依加嘅盧卡古仲適唔適合車路士？對比番離開前同這一刻，如果要談得上有進步，小弟認為算係有，始終愛華頓以佢作為核心，唔少球員都會餵波比佢，頭頂腳踢，當中亦偶有浪費了嘅機會。對於依加嘅車路士，以佢嘅能力實在未稱得上正選，更何況車路士嘅正選前鋒係叫迪亞高哥斯達。而轉打352雙箭頭有轉機嗎？如果盧卡古伙拍哥斯達成為最前線，聽落好似好有攻力，但兩位球員球風較為獨行獨斷，要佢地互相配合擦出化學反應似乎有點困難。同時如果以盧卡古當日翻倍嘅價錢回購番車路士，球迷或情願佢留在愛華頓了。
14-15
舒爾尼 （André Schürrle）
轉會至：禾夫斯堡
現效力：多蒙特
領隊：杜曹
一名因為防守表現不合乎領隊要求嘅球員，而背上失敗之名離開藍橋。登陸藍軍初期嘅舒爾尼，球迷抱著唔少期望，畢竟德國人總係有紀律、效率型，而佢亦喺球隊面對失分時刻，以後備奇兵嘅身份挺身而出，為車路士搶番唔少分數。舒爾尼踢法機動，即使無球在腳亦會配合隊友走位，製造機會；但佢並非一名攻守兼備嘅球員，而時任領隊摩連奴注重防守迫搶，即使係攻擊球員亦需要分擔防務工作。而戴著世界盃冠軍以及關鍵助攻光環嘅舒爾尼去到第二季，表現不但未及上季搶眼，更喺關鍵時候導致球隊失波，及後急於表現自己，亦浪費左球隊唔少入波機會，可以話進退失據。最後變成球隊收購古亞達度嘅籌碼，總結佢嘅英超生涯可以話係高開低走，相信當時唔少球迷對佢嘅離開感到可惜。如果活在依加車路士嘅體系，相信佢更為合適，始終球員戰術執行力強，干地亦有條理地安排場上十一人嘅職責，而且舒爾尼配合走位程度不下於柏度，無球走動嘅活躍程度相比其他球員為高，佢嘅存在可能會迫使韋利安到右翼衛發展。只因時機不合，或許這係叫有緣無份。
15-16
菲臘比路易斯 （Filipe Luis）
轉會至：馬德里體育會
現效力：馬德里體育會
領隊：施蒙尼
與迪亞高哥斯達同時加入車路士，並繼承傳奇左閘艾殊利高爾3號波衫嘅菲臘比路易斯，以助攻力強為名。佢嘅加盟明顯係為球隊多線作賽做準備，可惜嘅係現實並非如此，相比於左右閘嘅艾斯派古達和伊雲奴域，菲臘比路易斯出場嘅機會少之又少，大部份時間都係喺後備席上留守，即使後備上場亦明顯狀態不足，表現與效力馬體會時期什有落差，而球員亦有表達在藍橋過得唔開心，最終也選擇離開。如身處在343中，左翼衛絕對係佢嘅理想位置，相比於馬高斯阿朗素，進攻力當然係菲臘比路易斯優勝，反而防守力以及身體對抗性不足係佢嘅缺點，而球員似乎亦不太適應英超嘅節奏。
每個球員當年都有著唔同嘅理由離開，依加亦都喺所屬嘅球會有著一個重要嘅地位。當佢地有機會再次踏足藍橋嘅草地上時，即使穿上了唔同顏色嘅球衣，亦會受到主場球迷嘅掌聲歡迎。
藍獅 每週末出文 用心寫每篇文章 給我們一個Like作支持 :
資訊浩瀚；東張西望。
竭盡所能；深入求真。
企高一格；全新體法。
