紐迷週記：尊重 | The Outsider
呢兩個星期紐記又為大家製造驚喜，先以極具戲劇性嘅方式斬殺白禮頓，再喺作客環境壓制強勢嘅赫斯菲爾德，一片光明之際，竟然作客賽和雷丁，更加喺主場不富咸！
比賽過程唔詳細描述（有轉播的比賽我是有睇的），綜合對白禮頓同赫斯菲爾德嘅比賽，紐記前場唔算打得特別好，後場就更加係險像環生，運氣差啲都攞唔晒6分。而且對手都係有力挑戰嘅球隊，實際上就係6分波！
而對雷丁同富咸嘅比賽（老實搵唔到link），其實同之前兩場無分別，差就差對雷丁大家都搵唔到射門鞋，而第二場就俾對手嘅天才球員賴恩施斯隆梅開二度搞掂你。而富咸受惠紐記送分，少賽一場咬住錫週三。
當連贏白禮頓同赫斯菲爾德之後，好多球迷都覺得贏梗冠軍，其實都係嗰句：打英冠有如泥漿摔角，偶一不慎又會被扯入泥漿，除左一身都係，仲有可能會被打低。仲有九場波，變數當然有，只係點差都唔會差到無前六，暫時同白禮頓同分並列榜首，球員集中啲我有信心可以守住直接升班嘅席位。下場對伯明翰城，打翻身戰喇老友！
呢個星期比較熱烈嘅話題，不外乎外星球隊反勝晉級同有線電視。筆者同有線有啲淵源，曾經參加過佢哋嘅比賽，有幸勝出並且受訓，做過下兼職咁……當聽到有線賣盤，心已經涼一截；賣唔成，大股東表示唔想蝕，直頭心到實埋。
仲記得老爸係捧英超皇者，我就自小已經係紐記死忠，睇住德能、堅哥旁述，真係會嬲到唔同老豆講嘢！嗰時已經好恨做足球旁述。之後有機會參與節目製作，更加明白做節目唔係一件易事。第一個錄影節目，就NG到俾導演炒蟹！一錄就五個幾鐘……之後爽手喇，個半鐘搞掂。但係個節目出街，可能唔夠半粒鐘。嗰時成日聽啲師兄講，你點做都會有人鬧，鬧都好嘅，起碼有人睇你，無人鬧嗰時你就真係清閒喇……之後際遇好、不擅交際好，無再繼續落去，就算有做過下網台，始終都係無人鬧，哈哈哈！
其實做媒體，真心唔怕被人鬧，真係預左，最怕嘅係無人睇、無人聽。又或者咁講，時代唔同資訊發達，人人都可以係專家。我哋做媒體嘅，好多時都唔係獨家甚至係share資訊啫，所以會被人話：我都好過佢喇。唔緊要，咪一齊做囉，如果你真係好過我，我唔介意，我有乜所謂？但係部分高質、用心、有見地嘅從業員呢？你真心好過佢哋？你有真心欣賞佢哋嘅付出？
其實，好多嘢，到左今時今日，都太廉價。另一個問題係我俾左錢就係上帝。有機會再講。
#紐迷週記 #陳沖 #TheOutsider
