多謝 #體波台 邀請，以紐迷身份做嘉賓，同其餘兩隊：維拉嘅 #夕二工八 同埋諾域治嘅Sam（編按：諾域治係Sam第二主隊，第一依然係利物浦），一齊傾下英冠形勢。特別維拉同紐卡素啱啱先踢無耐，大家對比賽就無乜意見，反而對前境就意外地有啲擔心。維拉嗰邊唔講喇，唔係專家更家唔係在行，紐記就真係看似樂觀，其實有暗湧。
個人意見，賓尼迪斯絕對係一個頂級教頭，佢當初以消防員身份嚟到紐記，諗住護級失敗，佢應該會走人。點知呢位性情中人被紐卡素呢個城市打動，甘願留守聖占士公園，仲好積極咁為球隊擴軍同攞成績，做fans嘅點會唔喜歡？奈何肥賓做人，情字行先，有時會有唔理性嘅決策。好似當年利物浦同高層開火，之後選擇去國米、拿波里，同埋最後重返皇馬，都係合情但唔合理嘅選擇。一月傳出嘅不和新聞，老實講，心中又點會無漣漪呢？
當然，打左大半季有多，肥賓喺一個完全陌生嘅聯賽上面，無乜水土不服，有class嘅領隊應有水準。但值得留意嘅係，有好幾個球員好似加美斯（Jesús Gámez）、梅邊巴（Chancel Mbemba）、拉沙亞（Achraf Lazaar）、戴利梅菲（Daryl Murphy），今季上陣情況甚少，呢個情況喺肥賓執教生涯之中多次出現。個人主觀凌駕客觀現實？左後衛情願用無速度、跑得慢同唔夠快嘅杜美特，都唔用加美斯或者拉沙亞？一對中堅拿修斯同奇勒明顯需要輪換同欠經驗，點解又唔俾機會梅邊巴呢？加美斯踢英冠打中堅唔會輸蝕，佢嘅經驗點解唔好好利用呢？
最感情用事莫過於門將選擇上。沙斯（Sels）季初欠穩即時雪藏，但係戴路三番四次出錯竟然穩站正選位置。留意戴路近三場波出現兩次超低級錯誤，而令球隊和兩場失4分！門將位置仲有個叫艾利諾嘅愛爾蘭國門唔用！借出告爾，但阿積士唔想用，最終回歸球隊，之後又再借出，所謂何事？小弟真係諗左好耐都唔明。唔通下季佢諗住撬連拿過嚟？
啱啱迎戰布里斯托城，真係睇到火滾！11分鐘一條後防線裝越位失敗，被對方球員韋巴咸（A. Wilbraham）輕鬆頂入！一對中堅甚至龍門都睇唔到人哋衝門，淨係見到耶連大叫有鬼，真係有鬼用！21分鐘多得戴路“支援”，漏接杜美特嘅“靚回傳”，哥達利爾（Cotterill）輕鬆射成2:0……
不過要護級嘅布里斯托城深感1分夠用，早早領前之下，59分鐘先有史勿夫嘅烏龍波1:2，再喺82分鐘被奇勒頭搥追成2:2完場。又執1分……
以肥賓性格，門將位置一係唔郁，如果郁，戴路應該係咁大。杜美特亦都三番四之出事，左邊嚟用加美斯、拉沙亞都仲有希迪拉同高碧克可以客串，用安尼達都好過用佢！但係下場會唔會有轉變呢？就真係耐人尋味……
最後，強勢嘅赫斯菲爾德被班士利迫和，九場不敗（包括足總盃賽和曼城）之下，紐記只係領先5分；白禮頓3球淨勝雷丁，一方面壓制雷丁停喺第五位，亦以1分之微力壓紐記升上榜首。前三名之外，排第四嘅列斯都只係以4分落後赫斯菲爾德，前列嘅球隊真係打得難分難解。
肥賓，請你理智啲喇！有無人有佢電話……
#陳沖 #TheOutsider #紐迷週記
