好耐冇寫本地波，其實都唔係冇留意，而係嚟嚟去去啲套路都係差唔多，真係唔算好多嘢可以寫。不過日前睇完南華聯賽俾香港飛馬雙殺，心思思之下都係寫返幾句啦。
其實由張廣勇接手之後，南華一直有個為人詬病嘅問題，就係中場嘅控制同組織能力。卡路士年事已高之下，狄恩起用謝家強同陳肇鈞呢對年輕嘅防中組合爛打有餘，但組織駁腳方面仍然有待改善；而司職進攻中場嘅麥高派路域有個人進攻能力，不過串連中前場嘅作用就似乎有限。中場組織力有限嘅結果，就係攻勢往往邊咗由後場 (尤其係兩閘) 發板，長傳上去拎得返嘅就分兩邊再俾高美斯攻，單調得嚟效率亦都唔高，結果前線供應就一直有限。兩翼方面，林學曦係抵讚嘅。喺省港盃之後狀態明顯有提升，走動亦活躍咗唔少，算係南華進攻少有嘅亮點；至於新亞援加藤裕介雖然同樣勤力，不過身形同埋技術都唔算突出，對於球隊嘅幫助亦唔大。
攻不銳之下，下半場早段防守出現漏洞，就俾飛馬連入兩球，然後就進入一個焗攻不過又攻唔入嘅困局，最後就三分全失。老老實實，以南華目前嘅表現，實在好難期望佢哋之後會打出啲咩令人滿意嘅成績；如果球隊可以放眼未來，俾多啲機會羅港威、羅曉聰、陳肇鈞、梁氏兄弟呢啲年輕球員上陣，等佢哋繼續發展成南華新一代嘅班底，可能會有更大嘅收穫。
再講講飛馬，其實前線嘅攻勢都仲係幾依賴利馬同迪亞高兩個巴西外援嘅突破能力，倒戈踢中鋒嘅陳肇麒發揮空間亦都有限，需要更多嘅時間去同隊友磨合。至於防線方面，省港盃中後場領軍之下大致上都穩陣，而查維斯踢中堅變帶刀侍衛，不論係凍結高美斯定係死球嘅助攻都繼續俾到球迷驚喜，真係古斯達禾二世。
不過對於飛馬嘅球迷嚟講，最有利嘅消息應該係有新援試腳：27歲嘅前墨西哥國腳中場柏查奧 (Édgar Pacheco)日前嚟香港，同飛馬跟操。或者係沙華今年出唔返，所以先會考慮呢名近年嚟亞洲落班嘅中前場球員，不過一旦簽到佢嘅話，呢個CV咁勁嘅外援可以為飛馬帶嚟啲咩幫助，相信都值得球迷們去期待一下。
(圖片來源：香港足總)
