對不起！筆者私人事忙致脫稿頻頻，再同大家say sorry！不過要say sorry嘅應該唔只我一個，一月轉會市場吹多過買，肥賓同佢個制服組仝人，真係想紐迷同佢哋「拜個早年」！
先講講紐記過去幾場波先。贏賓福特2:1屬正常賽果，後備入替嘅戴利梅菲取得首個入球。足總盃重賽3:1擊敗伯明翰城過程輕鬆，肥賓起用三名新秀，中堅芬特利演出大獲好評，中前場巴利沙同賓艾馬利亦未見怯場，值得注意。聯賽方面，4:0擊敗洛達咸，梅菲再度「士哥」，列治亦兩場入四球，精華片段直情好似舒維爾嘅球王片，紐記睇嚟重回正軌。
不過呢場波最多人討論嘅，係門將戴路。佢突然「孤寒」唔解圍，但係又擒唔實個波，俾對方前鋒截去皮球……眼見死得之際好在隊友回防協助阻一阻對手，佢竟然可以回身擋出對手射門，堪稱神救！睇重播都覺得佢身手不凡但係頭腦簡單……
唔知係唔係受轉會傳聞影響，戴路先會派膠呢？皆因賽前傳出外借阿積士嘅門將告爾可能回巢。一直以嚟筆者不只一次提出，戴路定艾利諾都係身手唔錯，但係無力領導後防嘅門神。而家後防蜀中無大將，個龍唔曉提場，會輸好多冤枉波……告爾為左國家隊前途先諗到返荷蘭，但係返到去人家都唔重用你，真係留喺英冠好過。不過呢單新聞只係個別媒體傳出，真實性存疑…….
第二單就係「唐辛風暴之愛回家」！上年一月重金禮聘唐辛來投，佢一人之力差啲護級成功，時也命也，最後唐辛選擇離隊他投無可厚非。但係人算不如天算，去到水晶宮半路易帥由大Sam揸旗，唐辛苦無落場機會，於是諗起重回東北計劃。如果有唐辛回巢，翼位真係多個星級選擇，下季重回英超都用得著，係一單幾好嘅買賣。對於唐辛回歸，英國fans好壞參半，又睇睇會唔會成事。
中場中路舒維爾已經顯示出佢嘅重要性，佢停賽期間2勝1和2負，中場混亂、無創造性，肥賓plan B完全唔掂。中場中位置除左佢之外，希頓、高碧克、安尼達都係工兵球員，根本無人可以做節拍機控制中場。最近又傳愛華頓嘅占士麥卡菲有機會來投，但係愛華頓已經放走湯卡華利，就算新血踢出水準，後備都要積返厚啲，所以我就唔多睇好會成事。當然麥卡菲硬淨有餘，對中場節奏嘅控制，肯定俾而家嗰班好，對舒維爾造波都多左重保護，就算單deal唔成，呢類球員係引援目標。
中鋒喺梅菲入局之後，米杜域亦復操。肥賓要考慮嘅，可能唔係買人，而係考慮要唔要變陣改踢442，實際上451、4231嘅踢法有啲保守，以球隊嘅實力根本可以用442擊殺對手。基爾＋艾約斯-、米杜域＋梅利嘅組合，菱形中場：舒維爾（攻中）、列治、古法蘭、希頓（防中），其實都幾有威脅性。有無人有肥賓電話？
