米禾爾 | 夕二工八
喺周末舉行嘅足總盃賽事，其中一隊越級挑戰成功嘅就係而家喺League One嘅米禾爾，以三比零輕鬆擊敗英超球隊般尼茅夫再晉一級，下一圈將會喺主場迎戰另一對英超球隊屈福特。
下一圈對手已定，不過，米禾爾嘅未來就未有定案 – 據報佢哋有機會要搬遷到一百里以外嘅肯特郡北部。
米禾爾嘅主場The Den， 坐落喺倫敦泰晤士河以南 嘅Lewisham，一個極唔起眼嘅地方。Lewisham 從前係一個工業重鎮，以出產皮革及食物為主，現今則為倫敦最窮困嘅住宅區。有幾窮？以生菜為例，倫敦市中心嘅超級市場，一鎊一個生菜係基本，而喺Lewisham嘅Catford街市，一鎊可以買到三個，平絕全倫敦，分分鐘平絕全英國。至於米禾爾， 雖未至於財困，但由於近年都冇辦法衝上頂級聯賽，所以未能受惠於英超全球化所帶嚟嘅財富，一直喺次級聯賽浮浮沉沉，而擁躉亦都一直以本地人居多。
一個歷史悠久嘅球會，一般都同附近嘅市區有著共生嘅關係，米禾爾亦都一樣。五年前，因為南倫敦醫療信託基金管理不善， 管理人建議將Lewisham地區唯一醫院的急症服務關閉以減少開支。當時米禾爾有派出球員，跟市民同地方政府官員一同發起「救救急症室」遊行， 最終喺輿論壓力下，急症室的服務得以維持，當時亦令市政府深得當地市民愛戴。
不過喺取得極為重要嘅政治資產之後，呢班工黨背景嘅Lewisham市政府官員，似乎並冇將當地市民同當地球會放在眼內。因為佢哋經已批准咗一個大型嘅重建計劃，而呢個計劃，會將The Den附近一帶嘅地強制賣出，到時米禾爾極有機會要遷出由1910年已經坐落嘅根據地。
球會一直只係租借所在地。米禾爾之前希望可以用一個比市價高嘅價錢買起塊地，不過遭到市政府拒絕。原因好簡單，就係是政府根本冇將米禾爾放入去重建嘅規劃入面。Lewisham 嘅地方政府希望喺The Den同埋附近嘅地方鏟走，再興建2400棟私人樓宇， 而呢個計劃，一直由一個不知名嘅離岸公司主導。
被迫離開百年老舖後，米禾爾可能要搬遷到一百里以外嘅肯特郡北部。一百里以外，即係仲遠過由倫敦去李斯特。咁米禾爾仲叫唔叫米禾爾？叫而家啲fans點去？不過，一心諗住起樓賺錢嘅政府又點會理？
要建構一個新社區，其實就係要將原本嘅社區、原本嘅歷史 、原本嘅凝聚力等一一連根拔起。
霸王硬上弓，度度都有。世界另一邊嘅某個角落，都正步入「嚴汛期」。請各位做足防「洪」措施。
