紐迷週記：2017新年快樂｜The Outsider
2016對紐迷嚟講真係唔多老黎，要降班作賽又要賣走啲當家球星，不過紐記喺英冠保持強勢，家陣仲排喺積分榜榜首，2017年肯定大有可為。
聖誕快車去到終點，紐記暈車浪，boxing day 主場一球不敵錫週三。“佛地魔”舒維爾開始佢五場停賽，無左佢中場創造力的確削弱唔少，但係有佢在陣都唔係場場有貨交，佢停賽只係突顯左紐記中場創造力不足呢個問題啫。自卡巴耶轉投PSG開始，問題根本未解決過，就算上季引入泰奧雲、韋拿杜姆同舒維爾，都唔見紐記中場有太大改善。睇返家陣條中場線，多仲係工兵為主，球隊多數倚賴兩翼側擊嘅踢法，技術型球員真係相當缺乏。
又咁講，喺英冠想踢技術流唔容易，面對對手鉸肉機似的中場，下下高Q大棍去衝去湧，要保持隊型唔容易，要用控球傳導主導比賽，除非你有條具控制力嘅中場線，否則凶多吉少。錫週三之敗，可以睇到紐記喺英冠唔係絕對超班。球員平均質素高於對手，但係踢法上無重心，俾對手偷雞成功一粒搞掂。
幸好球隊未因此而意志消沉，喺30號主場再度出擊森林，並且有個好開始，4分鐘就憑列治稍帶幸運成份嘅入球先開紀錄。不過後防嘅失誤森林前鋒杜米特路門前追平1:1。
下半場60分鐘，森林嘅米爾斯犯規先食黃牌，但係球證突然走出球場，同第三旁證講左幾句，轉頭就向米爾斯出示第二張黃牌趕埋佢出場。睇嚟又有故講。紐記喺之前已經壓住森林嚟打，米爾斯出場之後，紐記就更見得勢不饒人，基爾兩個帶點拖泥帶水嘅入波，主場3:1擊敗森林。無獨有偶今季兩次對碰都有球員被趕出場。憑著呢場勝仗紐記多賽一場之下1分領先第二位嘅白禮頓。
一月份轉會市場重開，傳聞眾多，其中以側擊球員嘅傳聞最多。車路士嘅新秀路夫斯捷克具有天份，般尼茅夫嘅哥林威爾遜就射術速度兼備，但係前鋒線上翼鋒會唔會太多呢？中鋒引援上，維拉嘅基斯泰迪希望踢英超，選擇去米杜士堡。最有趣嘅傳聞應該就係坐穿冷板嘅賓艾化回歸，當然FF之餘，具創造力嘅佢真係回歸又未必係壞事。不過眾多傳聞都係邊路球員，中場中嘅領軍人材就唔多見，而後防人數唔少、質素欠奉，左閘賓帥情願等加美斯都唔願意再入市，大家要繼續忍受杜美特嘅演出喇。
有入自然有出，傳得好行話放走米杜域，但係賓帥有可能為佢轉踢442，反而高不成低不就嘅妖鋒艾約斯就真係待價而沽。筆者認為米杜域除左紀律麻麻之外，有高空優勢同身型，就發展而言比身材速度平平嘅艾約斯為佳。由於前線已經有同類型嘅基爾，再留艾約斯其實作用不大。迪奧堤會唔會再度出售，就要睇買家興趣，中國球會仍然係潛在買家。此外古法蘭、安尼達嘅合約就到期，會唔會提前出售套現，以免人財兩失，都值得關注。希望轉會市場重開有好消息。
