不敵諾定咸森林三連敗之後，紐記喺聖誕快車開車之後又迎來三連勝，紐迷又坐過山車，返咁上下球齡嘅球迷一早就已經習慣晒，年輕啲嘅要適應下，唔會年年都好似上年咁平穩一路輸到尾……
三連勝嘅比賽我就唔多講，贏伯明瀚搞到人哋換教頭(其實唔係好關事)之外，贏韋根、保頓艾爾賓都叫無驚無險，再以一分力壓白禮頓上榜首。之後三場先有27號主場對錫週三，除夕就主場再對森林，最後2號就作客布力般流浪。三場波如果森林無排4423，真係唔怕佢哋囉……
其實寫到呢度，真係可以寫句今週無事，下週再談！但係今次想同大家講下球衣贊助嘅問題。網上流傳紐記下季好大機會轉贊助，除左心口贊助由財仔轉返本土啤酒之外，連帶球衣贊助商由puma轉UA。老實講句，個流傳圖片款式不俗，配上紐卡素多年前嘅贊助真係份外親切，呢粒星真係由細睇到大，代表住好多紐卡素人嘅回憶。而由財仔手中「拯救」出嚟，我估遠喺中超踢波嘅柏比斯施斯都叫好！
由puma轉UA，唔知UA俾左幾多錢出嚟呢？其實紐卡素球迷對贊助商都有莫名嘅歸屬感，兩三年前財仔入侵心口，就有部份球迷自資出品屬於球迷嘅球衣，用嘅球衣就係極有感情嘅adidas。我最初睇紐卡素嘅時候，仲係著asics有Andy Cole嘅年代，伍晃榮報新聞添。到舒利亞年代，就係adidas年代喇。呢個年代嘅波衫好多獨家款，好似真路拿著住喺左路連扭幾個、外觀似欖球衫嘅棗紅、軍藍色橫間球衣，真係好多年都無出過一件咁正嘅波衫。Puma年代真係中規中矩，無好特別嘅亦無好特別醜樣嘅。嚟緊UA會點呢？我哋就拭目以待喇。
#陳沖 #紐迷週記 #TheOutsider
