紐迷週記：球場上的第十二人｜The Outsider
事忙又甩稿（已經雙週都甩）萬分抱歉。
紐卡素開始凍，雖然話全球暖化，英格蘭東北仍然唔見熱得幾多。可能因為咁，紐記球員硬晒軚，由上個星期六開始三連敗。
先係主場不敵布力般流浪0:1，射極唔入後防失魂，已經敲響警鐘。點知週中又係有優勢（都唔算多），98分鐘入波99分鐘失波，仲要輸埋十二碼，唉…失望一定有，但係無運之餘，都係時間檢討自己之前係實力定係運。後防老問題：無人具有統治級嘅領導力，起碼係唔好甩晒啲人，成日都輸死球死得㗎！打龍嘅做好本份，但係走位提場要好好提升先得，雖然今季應該打正選嘅艾利諾都係弱……
賽前左腳右翼列治明言，要打一場翻身戰，要重新上路云云，對球隊同球迷嚟講當然好喇，紐記呢幾年就係無乜火！可惜呢場波就可以用一句嚟形容：人算加埋天算，實輸……
尋晚主場迎擊諾定咸森林，比賽一路平淡。到左32分鐘，紐記禁區有雙方球員跌低，球賽繼續…咦，咪住，球證突然吹停，之後詢問旁證後，十二碼兼趕埋「佛地魔」舒維爾出場！我X！咩事？原來之前舒維爾喺禁區同蘭斯貝利互有動作，從鏡頭睇到先係互動之下蘭斯貝利落地，之後夾埋舒維爾落地之後互踢，蘭斯貝利叫痛，就出現十二碼。球證大佬，你趕佛地魔出場，點解唔罰埋蘭斯貝利而係罰十二碼呢？百思不得其解。小學生打交，永遠都有人唔服輸去告老師，最後要睇老師有無所羅門般嘅智慧，兩個一齊罰永遠公道。講完。好睇就好在「Lord賓」賓特拿一腳、射失，戴奴好波，撲十二碼佢係有一手。
當你以為完嘅時候，紐就就入波。45分鐘列治兌現承諾森林禁區右邊勁抽，十人應戰領先一球。幸運之神好幽默。補時階段一對中堅失位被蘭斯貝利cut入禁區，杜美特情急推佢、球證就吹佢，又一個十二碼兼直紅出場。杜美特呢腳其實好不智，而且佢成日都輸呢啲硬膠波…蘭斯貝利唔理咁多自己操刀，一射，戴奴又救到！！兩救十二碼！！
但係九人應戰又點夠打呢？52分鐘被追平，捱到86分鐘角球輸烏龍波都已經係後話，基本上紐記想唔輸係好難好難嘅事。「人算」係球證罰第一個出場時，被蘭斯貝利偷到雞，「天算」就係86分鐘搞球烏龍，主場再輸三連敗已成定局。所以球場上嘅第十二人，你話幾重要呢！
最後，為查比恩高斯意外喪生嘅職球員致哀，祝願有關人士平安。
賽事精華：
