港超：到底東方龍獅個亞冠位發生咩事？｜場邊筆記
0. 了解成件事之前，首先要知道：根據2017-2020年參與亞洲足協球會比賽嘅規例第9條，一間球會要符合參賽要求，必須 (1) 按照第10條獲發牌照；(2) 符合第11條嘅競賽條例，即係聯賽冠軍、盃賽冠軍，或聯賽第二至第三名。
1. 亞洲足協禁止傑志代替東方龍獅參與亞冠盃分組賽，其實根據規程第11.12條：如果合資格嘅球會拒絕參賽，分配予會員國嘅參賽資格將會被取消。而按照規程第5.8.2條，呢個參賽資格將會分配予同區排名最高，而且符合規程第5.4至5.6條嘅會員國。
2. 咁會員國幾時可以自行替補球會參賽？按照第11.5條：如果符合競賽條例嘅球會未有取得牌照 (包括亞洲足協嘅特許牌照)，喺頂級聯賽排名最高嘅球會則可以取代其資格。
3. 講咗咁耐，到底牌照何來？按照規程第10.1同10.2條：會員國需要於頂級聯賽實施與亞洲足協球會牌照規例相符嘅發牌制度，而符合競賽條例嘅球會必須按照呢條條例取得牌照，先可以參加亞洲足協嘅球會比賽。
4. 唔知大家仲記唔記得，港超係有發牌制度嘅呢？根據港超嘅發牌規定，球會係會獲發兩種牌照：香港足總嘅球會牌照同亞洲足協嘅球會牌照。
5. 由於獲發牌照係港超嘅參賽資格，所有港超球會參加亞洲球會比賽都唔會出現第11.5條嘅情況，除非係一支較低組別嘅球隊贏咗一個盃賽，然後贏埋季後附加賽，而又申請唔到亞洲足協嘅特許牌照。
6. 總括而言，代表香港出戰亞冠盃分組賽嘅球會，只可以係東方龍獅；而傑志只可以出戰亞冠盃外圍賽，輸咗冇得踢亞協，直接bye bye。而搞咗呢壇大龍鳳，要負上最大責任嘅，當然係由頭到尾都矇查查嘅足總啦。
P.S. 小弟都係睇完兩份文件同大家講下，有錯請指正。
參考資料：
Entry Manual: AFC Club Competitions 2017-2020 (www.the-afc.com/…/entry_manual_entry_manual_for_afc_…)
HKFA AFC Club Licensing Regulations (www.hkfa.com/…/HKFA%20Club%20Licensing%20Regulations…)
