南華新援勞域捷介紹 | 場邊筆記
繼狄恩出任主教練之後，南華在球員人腳上亦有變動：現年33歲的黑山進攻中場Srđan Lopičić於今日來港試腳。（編按：勞域捷已與南華簽約。）
Lopičić曾經代表前南斯拉夫U21上陣，於職業生涯早年效力塞爾維亞球會，並曾經在歐霸盃外圍賽上陣。隨後Lopičić曾外流比利時，2011年開始轉戰亞洲，於印尼聯賽打滾。
2015年初離開Persela Lamongan後，Lopičić一度回國效力FK Bokelj，隨後在今年初回歸印超，效力阿雷馬。但在今年9月，Lopičić因表現不如預期，被球隊提前終止合約。張廣勇稱球隊的教練團將會繼續觀察其試腳表現，並於日內決定是否向他提供一紙合約。
宜家了解新外援最方便嘅方法，就係上YouTube睇球員經紀幫佢地落班而精心炮製嘅Highlight，而Lopičić嘅Highlight上網搵都有唔少。佢份CV除左代表印尼聯賽明星隊對住祖雲達斯入過一球比較吸睛，同埋做過寶馬嘅隊友比較juicy之外，上年表現雖然有啲下滑，不過作為一個外援進攻中場，表現都算合格：速度唔算快，但係活動範圍廣、入楔意識好、放直線準繩、早幾年亦都有少少遠射腳頭。
喺南華呢隊行軍節奏都唔係快嘅球隊，相信Lopičić要適應同埋串連中前場應該唔係難事；但係南華有佢加盟之後會唔會有好大嘅進步，小弟又覺得唔好抱咁大期望，可能佢都只係一個推前一格同埋冇咁慢嘅卡路士。
當然，齋睇Highlight難免會高估球員實力，Lopičić係咪真正有料到，都要落場驗貨先知。不過可以預見嘅係，陳肇麒打兩翼甚至做後備嘅時間應該又會多啲。
(影片來源: TheSportCV)
