港台女足對決觀戰記｜空狗愛睇波
日前香港3:2擊敗關島已經好多人寫過，咁我就唔喺度重覆啦~ 今日dayoff就去埋第一次踏足嘅港會場支持迎戰台妹嘅港女。
喺快活谷搞咗一輪先揾到個入口，一入到去，第一眼就見到台灣5號球員蘇芯芸幾靚女???
世界排名第68嘅香港，賽前已經表明目標係迫和第38嘅台灣。可惜開賽五分鐘，台灣就憑高大中堅林雅涵球鎚先開紀錄。港隊球員平均高度不及對方，18分鐘差唔多一模一樣，再次被林雅涵屈機頂入拉開兩球距離。但台灣並冇因此而放鬆，繼續狂攻港隊。特別係右路嘅9號李綉琴，更可以講係對香港隻左閘王素嫻予取予攜，完全食住對方。台灣左翼包欣玄亦係好波之人，目前喺日本次級聯賽揾食嘅佢，邊路推進擺脫兩名香港球員，30分鐘射成3:0。香港嘅球員同球迷雖然氣餒咗一陣，但好快就重新振作。反正落後三球，港隊反而放開懷抱去踢。8號吳穎琴同17號焦點人物張煒琪更分別試過罰球中楣同近射中柱。
半場休息期間突然間落狗屎，但台灣依舊利用快速短傳拉扯港隊隊型。但香港女將們今次穩得住腳，更以張煒琪為進攻支點，不斷衝擊台灣防線尋找入球機會。好可惜，台灣球員整體質素的確較高，尤其天雨路滑之下，體能優勢更加明顯，啲五五波多數搶贏香港。雖然香港最後大敗五球，但絕對要讚班港女嘅拼勁：門將梁蔚雅曾經二連撲三連撲、孖生姊妹葉婉彤同葉婉汶更先後力戰傷出。
其實球迷今場都值得一讚。一個星期二嘅下晝竟然有三百幾人入場睇女足，我更知道有益友今日專登請假睇波，認真痴線???雖然港隊俾人大炒，但球迷們照樣不斷打氣，希望港隊破蛋。賽後一眾球員更走到看台致謝，場面温馨。
星期三繼續男子組，香港對台灣，要幫港女復仇呀！而空狗將會同空姐W去一個你諗都諗唔到嘅地方睇波，因此未能入場…但敬請大家期待下篇貼文啦~
資訊浩瀚；東張西望。
竭盡所能；深入求真。
企高一格；全新體法。
