曼聯 vs 般尼睇波遊記 | 空狗愛睇波
Manchester United 0:0 Burnley
2016/10/29
根據本身嘅更表，空狗今日應該係做緊一班即日來回嘅垃圾大陸機。但憑住膽大心細嘅操作、不屈不撓嘅心態，再加上少少上天嘅眷顧，小弟終於成功喺曼聯嘅比賽日換入一班Manchester機。
每次飛行之前，機組人員都需要開一個簡報會，不外乎講吓高登好常見嘅「有咩要注意」嗰類要點。今次阿經理一入嚟，見咁多男crew就問係咪有人聽日去睇波???佢仲話佢帶咗阿女嚟跟我地機，想話喺門口買黃牛咁話。
咁空狗作為真獌，就梗係晨早買咗飛啦！而今班機嘅同事都幾好人同幾好傾，講講吓發現，原來其中一位鬼佬機師已經買咗hospitality package，即係有餐食、有禮物，有波飛但貴到hihi嗰啲套餐。而講講吓又發現，原來另外有幾位同事都好有興趣入場感受吓「夢劇院」嘅氣氛。
話說開季之前，空狗睇咗場韋根對曼聯嘅熱身賽。比賽之後喺火車站等車期間，無啦啦俾幾個英國曼迷撩，又問我叫咩名，又話我件衫好靚???原來佢地係放飛人嚟嘅，交換咗contact叫我第時有需要可以揾佢地。咁既然今次要6張飛咁多，我地一到埗就即刻揾佢，睇吓有冇飛可以送哂我啲同事入奧脫福啦！好可惜經過一輪聯絡，最終只係買到3張，咁阿經理梗係要湊埋阿女入去啦，另外一張就俾咗另外一位都會睇波踢波嘅男同事~ 至於食閉門羹嘅三位空姐，只好喺球場附近嘅Tesco超級市場行吓坐吓。
???
今次空狗坐Sir Alex Ferguson Stand同Stretford End交界嘅山頂位，冇辦法，遲買飛啲位係冇咁靚~ 今場波曼聯正選陣容有亮點兩個：第一：馬達正式宣布奠定摩連奴心目中嘅位置，首次聯賽擔任隊長。真係好鄧佢開心，好人好波終於有好報。第二：中堅組合繼續沿用Rojo+Blind，我笑而不語。
呢場擺明係攻防戰嚟㗎啦，果然開波30秒伊巴就已經有一次射門，可惜俾般尼門將兼曼聯青訓產品希頓擋出。曼聯嘅攻勢一直持續到廿五分鐘，般尼嘅堅持終於得到回報。佢地憑住堅守型嘅442，打反擊嘅時候不致落得單拖前鋒因為支援不足而被對方後防淹沒嘅下場。保持兩位前鋒做配合，加上從後衝上嘅中場球員，確保反擊人數並藉此提升進攻質素，令般尼上半場都做到兩三次能夠以射門作結嘅攻勢。更加重要嘅係，般尼終於等到曼聯打尻波。上半場一半打後，曼聯突然跌watt，行軍慢，誤傳又多，尤其係Rojo呢條友。識空狗嘅朋友，應該都知我幾唔鍾意佢???
下半場先係今場波精萃所在。原來摩連奴俾「明星球證卡頓堡」趕咗上看台，因為摩佬喺隧道向佢投訴達美安禁區被侵犯冇判十二碼。缺少咗領隊場邊指示嘅曼聯，下半場反而踢返好好多。馬達挨近右側令佢活動空間大咗，更加激活埋達美安後上助攻嘅威脅。伊巴演出亦令人嘆為觀止，勤於出入禁區製造同等待機會，最令人深刻嘅係接應前插嘅靴里拉右路傳中，車身勁揪差啲搞到希頓斷手。無疑，伊巴今場把握力差，浪費多次機會，但對我個人嚟講，佢加盟曼聯至今嘅表現完全令人信服。反觀另一「球霸」普巴，技術係好，遠射係勁，但當每次見到佢嗰款「dum吓dum吓」嘅跑姿就令人眼火爆！俾波啲呎吋有時都幾差，又鍾意自己死扭但你又唔係C朗咁快，成日投訴人地拉你撞你，球證未吹就自己停低扮無辜。做球霸唔係唔得，但唔該學吓伊巴，交出具說服力嘅表現先。
卡頓堡今場亦成為焦點，佢幾個有關應唔應該判十二碼嘅裁決，小弟就唔喺度評論。因為喺香港，支持曼聯同身為熱血公民一樣，都係原罪???佢應唔應該趕走靴里拉我都唔講啦。但空狗喺度提議大家，今後不妨多加留意卡頓堡嘅執法水平~
雖然打少一個，但曼聯絕對想攞呢三分，因此摩連奴寧願打少一個中場都想保留伊巴同福仔(唔係顏福偉)。但keep住馬達，對於已經人數少咗嘅曼聯中場又好似冒險咗 (我自己估)，所以就一口氣用爆炸頭同「曼聯三巴」最後一巴「月巴」朗尼，入替馬達同連加特。期望用爆炸頭嘅破壞力，換取普巴同月巴繼續攻堅。好可惜，月巴始終未能為自己爭口氣，表現繼續低迷。而到最後關頭，摩連奴更加用埋迪比作最後掙扎。睇住要靠佢救命，作為多年曼迷，空狗真係苦笑咗一聲以作自嘲之用。
隨住朗尼最後一擊，無人看管都炒飛機，亦注定咗，「這夜！是！屬於般尼的！」(Man of the Match: 一定係希頓)
資訊浩瀚；東張西望。
竭盡所能；深入求真。
企高一格；全新體法。
