緬恩斯vs利華古遜遊蹤｜空狗愛睇波

呢間酒店就巴閉，基本上如果有球隊作客緬因斯，首選都會係呢間酒店。小弟之前都聽過有同事撞到史特加、禾夫斯堡，甚至係德國國家隊。(喺instagram見到啲空姐又要唔識班國腳，又要湊熱鬧同佢地影相，心諗點解呢啲機會唔係留俾識貨嘅人???) (另外，正正係呢間酒店咁巴閉，所以佢地係好唔鍾意我地公司同事的。你知啦，小農基因好難避免喺公眾場合高談闊論，又好難避免貪小便宜R下著數咁。)

喂講返重點先，就係呢我地到埗嗰陣，真係見到利華古遜架大巴泊住喺酒店門口！！！即係話，空狗同小豆距離，只有0.03！亦即係話，就算飛完班通頂機，都唔洗旨意瞓覺???

沖完個涼，空狗就落咗大堂等球員，仲見到幾位預備好哂波衫大頭相簽名筆嘅球迷。等咗一陣，就見到陸陸續續有球員落到嚟集合，其中小豆更加係一出?就俾幾位球迷圍住~ 空狗都唔執輸，即刻攞出公司筆同酒店紙要佢簽名??? 我仲show返幾年前我地喺Carrington (曼聯訓練基地)嘅合照俾佢睇添！

小豆！

禾蘭！

又名Giggs 0嘅傑斯寧……

利華古遜教練：舒密特

目送佢地上大巴之後，空狗都出發去球場啦~ 球會安排咗穿梭巴士喺中央車站接載球迷。原來球場係喺一大塊等待被開發嘅空地中間，大家沿住一條路直入球場，中間有好多伯伯專問球迷回收啤酒樽，喂阿哥，啲德國佬咁飲得，拎返啲樽返去換到唔少錢㗎！

由Hbf(德文嘅中央車站咁解) 去球場

行入廢墟中。

去票房攞咗飛就入場(即場攞飛加3歐dklm)。唔知邊度睇過呢個Opel Arena好似有個花名叫「紅色盒仔」，球場只係得一個入口，男還男女還女咁排隊等俾人通櫃，呀唔係，係搜身。

四四方方起哂角，我喜！

原來緬因斯開波之前都係唱《你永遠唔會一條友行路》，金田空狗即刻發現咗一個重大秘密：就係我肯肯定高普專係揀唱呢首歌嘅球隊嚟執教，先後有緬因斯、多毛毛，以及係現時嘅利物浦……

個阿姐會跟住音樂起勢un。

Mainz其實係以節日、盛會而聞名嘅城市，呢件特別版幾繽紛！

緬因斯街坊福利會

飛。

小豆招牌跪地祈禱。

細細地幾骨緻㗎～

小弟好想睇嘅武藤加紀今場冇落場，但其實緬因斯上半場係踢到幾有效果嘅直接足球，中後場一有球權就踢上去俾黑人前鋒哥度巴湧。呢位前鋒勝在又勤力又夠「牙搾」，配合馬利同快速嘅保辛斯基，利華古遜後防對付佢地幾頭痛。但小豆真係太~勁！緬因斯只係領先咗一分鐘，後防一下漏頂就俾小豆把握到，左腳射入追返粒。雖則利華古遜後衛都唔執輸派返粒膠，角球走漏咗馬利，俾佢門前撞入，半場Mainz 2:1 Leverkusen。

下半場唔知係咪過咗數，緬因斯走哂樣???印象中佢地根本做唔到一次似樣嘅攻勢。利華古遜方面，後防換入大隻佬Tah搞掂咗哥度巴，中場換入咗德國國腳禾蘭激活進攻。但最關鍵就係高佬中鋒兼球會象徵傑斯寧：一下子壟斷制空權，兼解放咗小豆。小豆入嘅第二球，就係經傑斯寧頭鎚二傳，右腳射門省中對方後衛笠死門將。及後利華古遜都已經控制咗場波㩒住緬因斯嚟打㗎啦，小豆仲有次中柱波。終於到九十一分鐘，緬因斯又係漏頂一次長波，俾攝喺後面嘅小豆頭鎚絕殺！

講到呢度，各位益友有冇發現一樣嘢，就係小豆嘅帽子戲法分別係由左腳、右腳同頭鎚組成！你地話，小豆係咪真係好勁？???

向隨隊作客的球迷致謝。