拆埋禮賓府起公屋吖笨｜施建章
特區政府打算將傑志賽馬會訓練中心拆卸，興建公營房屋。傑志這塊地皮，真係公德無量，解決了成千上萬人的住屋需要，體育係無經濟效益，拆係抵你死，體嘢總輯高俊賢叫我寫兩筆，其實除左粗口之外，我真係再諗唔倒有乜可以寫。
在香港從事體育行業，從來都是艱難非常，一萬幾千億起條高鐵，倒水落海面不改容，起個體育城20年都無著落。你老闆，北京攪奧運咪自己攪，死落黎香港攪馬術仲乜春！拆左體院個場，香港隊每一個級別都無場練。我想問，而家香港又多少人玩馬術？世界排名提升左多少？而家叫做傑志有個場，比較容易安排操練，又好似以前土葬條例咁，埋左副棺材七年要執骨再葬，到底係香港足球欠左政府，定香港政府想足球同廣東話一樣滅聲？項項運動唔攪，係要攪足球？香港要搵地多到阿媽都唔認得：伊利沙伯醫院對出的舊軍營荒廢多年無人用，觀塘成業街後的爛地停車場用左唔知多少年，新蒲崗工廠大廈、九龍灣政府工廠大廈、油塘一帶用地、深水埗、長沙灣、荔枝角一帶大把爛地停場，葵盛西邨拆卸重建，以上一帶的可用樓面面積，都較傑志訓練中心為高，拆黎把鬼。
再者，將軍澳訓練中心落成遙遙無期，傑志訓練中心對香港隊集訓有一定的作用，至少讓他們可以有一個較穩定的場地和時間集訓。而最重要的是，香港隊有機會出線2019年亞洲盃，香港政府最好求神拜佛香港隊唔好出線，到時出左線唔好死埋黎話支持香港足球——小喇叭，你地連一個固定場地比香港隊都無，打世界盃外圍賽大球場都唔比用，而家仲要拆埋傑志訓練中心。我唔係傑志球迷，亦都唔支持傑志，但呢件大事大非，真係佛都有火。
其實特區政府話搵地咁難，粒粒皆辛苦，倒不如身先士卒，拆左禮賓府起公屋呀笨！禮賓府位處高地，風水良好，根據風水學在禮賓府興建公屋可以培養更多優秀人材服務香港，亦可減省高官的房屋津貼，合乎經濟效益。既然而家政府做野唔駛用腦，我認為信風水最好，有大批居民進駐禮賓府，一定可以帶旺該區零售及飲食業，成為第二個銅鑼灣，創造更高的商業創值、地盡其利。拆得傑志訓練中心，一定要拆埋禮賓府先夠土地供應！
