因公事繁忙，再度脫稿，在此向各位抱歉。
紐卡素大勝QPR 6:0之後，先喺上個星期六、主場不敵狼隊，0:2 搞到一地玻璃碎！第一球梅邊巴擺老烏，近況欠佳、踢法魯莽，我估佢要翻身唔容易。到左星期三聯賽杯，又係主場對狼隊。哈！紐記做低狼隊，又係2:0。古方入球停不了，場波半場未夠，就可以放入雪櫃。
當你以為紐記正常返咩？星期六作客維拉，睇住1:0到尾，88分鐘都係被人追和、兩場不勝。成場波佔上風，就係無入球，而且愈踢就愈唔知想點。
如果故事到此為止？紐記最強嘅，就係令你意想不到嘅瘋狂。尋晚主場對諾域治，狂攻之下基爾連番失機，只能射入一球，仲要輸粒無謂十二碼，半場兩隊平手。下半場好似食左瀉藥連失兩球！先係後衛耶連無跟貼謝路美，後者輕鬆盪入；加上梅利略帶幸運嘅射門，省中人改變方向，射成3:1！
95th minute – Newcastle 2-3 Norwich
96th minute – Newcastle 4-3 Norwich
United. #NUFCpic.twitter.com/GBf4PSxO1w
— Gallowgate Goals (@GallowgateGoals) 2016年9月28日
正當大家都起身走人，諗住落town飲返杯悶酒，71分鐘嘥左半打機會嘅基爾射入第二球。呢球有功架、控射俱佳。完場補時仲係2:3。95分鐘古方人群中接應列治傳中頂入扳平。未完！96分鐘基爾機警趁亂起腳射入絕殺一球，反勝金斯雀4:3！班雀迷尋晚真係想死，上年英超已經成日臨尾香…之但係上季英超金斯雀其實劏過喜鵲一次，呢次當無數……
做球迷好簡單，想睇好波啫。球隊成日俾“驚喜”我哋，真係少啲心血都死！穩定先係硬道理？場場計算十足，無乜大手交易，又唔係紐迷所喜愛嘅足球。當年大Sam哥死罪之一，就係悶棍足球。
講開又講，大Sam哥，You have today！由細細個睇波開始，我就對某大球會好厭惡。好似一個網絡咁，某啲球隊對賽戰果好似預定左咁，領隊同領隊之間，唔係師徒就係前下屬關係，好多人嘅兄弟、仔女仲要係球員經紀人！當然，你可以話捕風捉影，但係對於非自己人圈內球會嘅球迷，陰謀論點都會有啲囉，right？
開始進入英超軍備競賽年代，人人都入貴價外援，好幾個領隊都幫球會大手買入一大批球員，之後兩三季就走人。當中有用嘅球員唔少，水貨、貨不對板嘅一大堆。你仲唔信傳說中嘅收回佣？今次大Sam瀨嘢，可以話咎由自取，不過只係冰山一角，事件應該仲有大把嘢爆！
下週再見。
#陳沖 #TheOutsider #紐迷週記
