克羅地亞球迷投擲煙花彈之亂事內幕｜Hrvatska Povezan 在線克羅地亞
(編按:在克羅地亞對捷克的比賽期間，克國球迷當中的Ultras（球迷組織）向球場投擲了照明彈及爆炸品，使比賽被迫中斷。我們通過Facebook專頁Hrvatska Povezan 在線克羅地亞的報導，可以了解是次克羅地亞Ultras的舉動，是針對克羅地亞足總和左右克國足球界的權貴人物——Zdravko Mamic。據該專頁推測，投擲煙花彈的應該屬於國內聯賽勁旅夏德的Ultras——Torcida。體嘢專誠整理Hrvatska Povezan提供的資訊，讓香港球迷理解當中的來龍去脈。)
投擲煙花彈的前奏
親克羅地亞足總嘅球迷組織Uvijek Vjerni曾報串比足總，今場對捷克會有人搞事，唔會似上場波咁風平浪靜喇。咁睇嚟真係堅料，克羅地亞足總頭號敵人，夏德球迷組織Torcida今場會比d 顏色佢地睇！唔好同我講話為團結玩少次啦，歐洲杯大好形勢呀，我屌你老母啦，呢個足總關我地達瑪堤亞人咩事呀？我係克羅地亞死忠，不過我更加係一個達瑪堤亞分離主義者。正因為我係達瑪堤亞分離主義者，先更證明我有幾愛克羅地亞。明係要型鳩你，咁點？
除咗睇波，今晚大家都可以留意下看台上搞事嘅Torcida有幾威威，分四級：
笠水狗： 同上場一樣，風平浪靜；
柴犬級 ：看台上有人嗌幾分鐘za dom spremni 或者U boj u boj za narod svoj；
狼狗級 ：有人嗌mamiću cigane，有人掟煙花落球場；
雄獅級 ：有人係看台上點煙花，燒座位，掟座位落球場；
雖不能至，心嚮往之，加油Torcida ，做番場好戲 ！
Drži se ， Torcida !Resultati je trend ，ideal je vječan !
說到做到，我兩日前已向克羅地亞足總發出黑色球迷搞事警告。長年嘅南北矛盾你唔去疏導，你當我地Torcida真係 笠水狗咩屌你老母 。公道講，就算呢件事係唔係Torcida做都好，一定全世界都會入佢數 ，克羅地亞早報已經將呢次事件定性為克羅地亞史上最大恥辱，話要捉搞事果個坐十年監…..
有睇開我寫嘢嘅人一定清楚我嘅立場，不過你未必睇得曬我立場所建基嘅背景。足總做咗幾多陰質嘢去將國家隊變成戴拿模嘅私人財產 ？你玩咗幾多嘢去針對以夏德為首嘅克羅地亞南部足球 ？搞你大鑊嘢就梗，而家Torcida係要型鳩你 ，咁點 ？
（以上文字刊登於6月17日 5:45p.m.，即克羅地亞對捷克的六小時前）
Zdravko Mamic何許人也？
（Mamić 當國家隊教練喝狗咁喝圖）
呢個世界沒有無緣無故嘅愛與恨，點解球迷要搞事？你估人地真係戇鳩仔 ？
根本部份克羅地亞人已經唔滿意足總好耐。唔滿意佢全面偏坦戴拿模，唔滿意國家隊變咗戴拿模老闆Mamić嘅搵錢工具！琴日捷克場波因球迷搞事而中斷期間，又比《自由達瑪堤亞》影到啦，戴拿模老闆Mamić 當國家隊教練喝狗咁喝，根本一直都講緊Mamić先係呢隊波嘅實際話事人，Čačić 只係佢隻狗……加上今場波咁嘅換人質素，你叫人點信服呀？
克羅地亞足總d 仆街嘢，我唔直接答你，我用圖片答你…..
雖然呢個未係答案嘅全部……其實我地個page之前d post都有講，尤其係23人大軍選人果輪……
仲記得三年前同美路史拿域Miroslav Šarić傾開計（當時佢踢流浪），講開戴拿模老闆Mamić (當時又發生咗Mamić開大咪屌記者事件），美路本人都係欲言又止咁……
老實講，如果你叫我講，其實都係一樣，畢竟我地都對克羅地亞足球太有感情……（美路自己本身都係Bad Blue Boys成員……）
（編按：Zdravko Mamic曾經是薩格勒布戴拿模的行政總監，目前擔任球會顧問仍然手握大權。他經常恐嚇記者和意見相左的足球圈內人士，並插手克羅地亞足總選舉，和直接操控假波活動的運作。在2009年，薩格勒布戴拿模和夏德的克羅地亞杯決賽首回合比賽涉嫌被人為操控，來自亞洲賭博公司的莊家通過這場比賽獲得了1400萬歐元的非法收益，而Zdravko Mamic據稱也是受益人之一。另外，Zdravko Mamic又涉及在克羅地亞多名星級球員如摩迪、哥盧卡、伊度亞度達施華等轉會裏收受回佣，並且非法逃稅及侵吞公款。)
Torcida 在煙花彈事件中的角色
其實Torcida場場克甲都搞事，如果今次係歐洲杯咁大場面搞事可以突顯呢個存在已久嘅問題，大家又會唔會係打落水狗之餘，比番少少Credit 班搞事嘅人？
如果你覺得自己係真正嘅克羅地亞球迷，你係呢一刻會唔會有少少覺得佢地所做嘅事其實係好撚正 ？
Torcida 計劃草圖曝光 ，原本打算係搞到成個場都掟滿煙花 ！可以睇到Torcida 本身係聯合咗克羅地亞其他三大激進球迷組織 ：BBB（即Bad Blue Boys，為薩格勒布戴拿模球迷組織），Armada（Rijeka球迷組織）同Vinkovčani（Cibalia球迷組織）諗住一齊做呢場大龍鳳，咁就成個球場四方八面都會中曬煙花彈！咁點解最後會得一個角落頭爆得成事呢？明顯係有人臨時笠水，數完123之後唔撚掟……
（Torcida 計劃草圖）
睇下張圖，你會發現Armada肯定係笠水狗……佢地果邊乾淨到……（不過Armada呢班人笠水都唔是第一次，有機會再講），之後就到Vinkovčani係二號笠水狗，不過我唔會怪佢地，佢地組織規模其實好細，比成班人圍住笠水唔奇。咁BBB 呢？雖然佢地係薩格勒布戴拿模嘅球迷組織，不過越係死忠就越憎Mamić。可惜睇番當時情況同佢地嘅位置，sorry，你地都係笠水狗……
（投擲煙花彈實況圖）
講到最後，邊班人有講有做？邊班人數完123之後真係有掟？邊班人係雄獅而唔是笠水狗？咪就係令人欽佩嘅Torcida囉，雖然做唔到全場煙花彈，得torcida負責果邊交到功課。寧做落水狗，不做笠水狗，係Torcida面前，所有嘢都係垃圾。之前有個關於克羅地亞獨立運動嘅關鍵人物Zvonko Bušić個故仔未講完，今日torcida就為咗突顯克羅地亞足球問題而俯首廿為孺子牛，歷史往往就係咁樣連結起上來 。好彩之前停咗未寫曬Bušić 啲嘢（定係根本未開始寫？），而家連埋呢鑊嘢講，又可以精彩咗！
涉事Ultras介紹
（夏德Ultras：Torcida）
Hajduk split(夏德)球迷組織Torcida :
今次抗爭行動嘅第一把手，亦係克羅地亞國內最大勢力，行事作風最為硬派嘅球迷組織。torcida成員全世界都有，而我就係香港分部嘅首腦（好似全香港只有一個torcida成員）我就98年入會嘅，夏德08年訪港，佢地嘅隨行官員正式確認我嘅身份。torcida係克羅地亞足總最大嘅敵人，每場波都會搞事，或係看台上紀念相關成員，或拉出大型諷刺橫額……
Rijeka球迷組織Armada :
因為利耶克係克羅地亞最接近西歐嘅城市，Armada做事方法會比較文明。不過其佢地同克羅地亞足總之仇都係不共戴天，因為有一年個克甲冠軍佢地比戴拿模黑鳩咗去。Armada最近嘅代表作係國家隊友賽聖馬力諾，係佢地主場踢，佢地拉大隊杯葛唔入場，令到看台坐唔到8成人，羞辱吹大雞叫人團結嘅足總。不過佢地無入場搞事，從呢件事嘅取態你會區隔到Armada同Torcida係意識形態上嘅分別。
哦係，我係特登唔講薩格勒布戴拿模嘅BBB（Bad Blue Boys），明黑鳩你，咁點？
（編按：為令各位讀者認識Bad Blue Boys，以下介紹為編者所加。）
（夏德Ultras：Bad Blue Boys）
薩格勒布戴拿模球迷組織Bad Blue Boys：
Bad Blue Boys 是歐洲最有名的Ultras之一，成立於1986年。他們對球會的日常運作有直接話事權，而且他們當中有一位「主腦」(orchestrator)，每位搖旗吶喊的球迷都要聽從他指揮。「主腦」會手持大聲公、背對球場，號召球迷集體行動和為球場製造氣氛。這種組織文化後來受到德國和意大利球會的球迷紛紛仿效。
Bad Blue Boys在場外的行徑也相當突出。他們除了會和國外警員及其他Ultras群毆，更曾經闖入球隊訓練場喝令球員脫光衣服，因為他們認為球員的表現配不上身上的球衣。球會主席一度把球會名字改成克羅地亞戴拿模，他們便一把火把主席所有的包廂燒掉。
克羅地亞傳媒的取態
《自由達瑪堤亞》，立足克羅地亞南部達瑪堤亞地區嘅媒體，佢地對今次以Torcida為主導搞事事件嘅報導，係比較客觀同公平。最後，講講我對各大克羅地亞媒體處理今次事件嘅睇法（有人問到，我順便講少少達瑪堤亞分離主義）。呢樣嘢已經同足球完全無關（其實有少少關，不過算，當佢無），大家未必有興趣，
咁我講咗結論先 ：一個地方嘅利益只有自己地方嘅人會去維護，唔好天真咁去以為會有外人去幫你。
搞事事件一出，唔意外，《早報》一定第一個衝出嚟柒！作為克羅地亞最大媒體，一完場乜都未搞清楚已經嚴辭譴責搞事嘅人，話佢地係克羅地亞最大恥辱，話要拉人坐十年監。屌你老母！不過世界上所有嘅「大台」都係咁，見怪不怪。《早報》咁嘅取態唔係因為同足總嘅關係，而係公司早幾年（好似十年前）已經賣咗盤比德國佬，咁用西歐文明嘅觀點去睇呢個問題，你就明曬點解佢地會衝出嚟柒。屌還屌，大台就係大台，事件發生後因流量太大《早報》死咗幾個鐘server，上次發生咁嘅事我記得係《早報》早幾年直播釋放Gotovina嘅判決（呢件事我會連埋thompson單嘢一齊講，不過要遲d先，Sor 9……
之後到《自由達瑪堤亞》，睇名都知，佢地係立足克羅地亞南部達瑪堤亞地區嘅媒體，果然無令我失望，佢地對今次以Torcida為主導搞事事件嘅報導，係比較客觀同公平。事發後，佢地係有同《早報》同一口徑嘅地方，不過同時間佢地亦立即去大造mamić背後指揮國家隊嘅黑材料，係第一個媒體登果張Mamić 當國家隊教練喝狗咁喝圖（個名真長），記者仲從陰謀論角度作咗幾句嘢比讀者自己諗。其實克羅地亞南北矛盾存在已久，從足球睇就係不斷打壓南部球會，將利益輸送比以薩格勒布戴拿模為首嘅中央集權！如果話廿鳩幾年前克羅地亞之所以能夠獨立係因為球場上波班踢警察果一腳，我睇唔到今日達瑪堤亞地區點解唔可以因為今次torcida搞事而分裂獨立成達瑪堤亞公國，如果在地媒體肯鼓吹的話！諗諗如果Subašić因為呢件事退出國家隊番家鄉支持達瑪堤亞獨立，歐洲想繼科索沃之後極速再多一個新國家其實唔難！當然呢d只屬ff，事實係要做到好似今次《自由達瑪堤亞》咁嘅取態已經唔容易，尤其係你知道其實《自由達瑪堤亞》早兩三年已經賣咗比《早報》。不過，作為達瑪堤亞地區嘅傳媒龍頭，今次都算係為咗在地人發聲，我認為已經難能可貴。（本身想假設埋我老友以前主理嘅《達瑪堤亞之聲》如果仲未執嘅話會點，不過算，好攰，冇人想知先再講……Sor 9)
最後講埋平日成撚日話要杯葛國家隊嘅《指報》。《指報》不嬲做嘢好撚辣嘅，平時追住Mamić來屌，揭社會瘡疤不遺餘力，之前政府倒閣仲搵人搞個專題去跟。不過面對「球迷流氓」呢個無人敢犯大不諱嘅議題，佢地明顯鳩縮咗。事發無耐d 報導都係跟《早報》嘅主旋律，不過後來又轉載咗《自由達瑪堤亞》果張Mamić喝狗圖，然後各打五十大板：「流氓球迷在搞事，另一個流氓則在指揮國家隊」…咁叫杯葛咗，嗯，我服嘅，駁唔撚柒閪到……
仲有幾份其他地區報紙想講，不過真係好攰，一人之力有限，最衰呢d 嘢我唔講無人講（用廣東話/華文），其實相關嘅英文評論都少…力已盡，有時間有機會再講，再一次sor9 ，係咁。
