德甲爭標形勢之拜仁攞硬？｜劉舜文
拜仁有內憂？
「車！咪又係拜仁攞硬！」，可以話係近日最經常聽到既說話。無疑今屆小豬走左（唉！又自提傷心事！），但係又重金禮聘同屬全能戰士，但比小豬後生三年既維度加盟，實力應該冇乜打折扣。另外，杜格拉斯哥斯達加盟後，令到球隊除左洛賓列貝利之外，再多一位靈活又扭得既「邊路百厭仔」，就算不幸再出現傷兵潮，照計影響都可望略為減低。
不過，正所謂「創業難，守業更難」，更何況今屆拜仁力爭既係前所未見既德甲四連霸？其實上屆下半季開始，拜仁已經先後被禾夫斯堡、慕遜加柏、利華古遜等前列分子擊倒過，小弟愛隊史浩克亦總算摸過和呢，証明拜仁已被重點針對，而佢地又真係原來有機會失分既！
當然，下半季拜仁已經放甩幾條街所以放鬆左，係不爭既事實，但係唔少球隊開始搵到擊倒拜仁既竅門，包括禾夫斯堡既超爽反擊啦，上屆小弟多次提及既慕遜加柏「雙重鎖鍊陣」啦等等，亦係事實噃！再睇下近年拜仁同亞軍球隊既分差，三季前係25分，前季19分，上季就得番10分，來屆若然有球隊可以進一步拉近同拜仁大哥之間既差距，甚至爭一日之長短，絕非天方夜譚！
衛冕三大阻力
OK！咁邊隊最有機會威脅拜仁既霸業先？外界暫時最睇好既，係上屆亞軍禾夫斯堡。不過狼堡要「搞寸PARTY」既首要條件，係要留住上屆德國足球先生兼傳送大師迪布尼，我亦相信「狼迷」需要提心吊膽到九月一日，先至可以暫時鬆一口氣。另外球隊兼顧歐聯之下，會唔會好似2009-10嗰屆咁，顧此失彼？亦係隱憂。
相對狼堡，個人可能更加睇好多蒙特少少。一來多蒙特季前熱身賽及德國盃表現對辦，加上歐霸賽事比較有條件輪換，對聯賽既影響應該比狼堡細。再者，伊基古度根戲劇性留隊，加上卡斯度既加盟，只要萊斯仔長期健康，中場「蜂人院」其實人才滿瀉，所以話唔定今屆蜜蜂仔可以再令大家嚇一跳！
講到呢度，大家可能會問我：「咁你愛隊又點呀？」老實講，其實我每季季初都鍾意FF一下史浩克04攞德甲既情景，可惜最後又係由FF變成SS (SOSAD)，唉！之但係，我份人咁硬頸，加上新兵迪辛度加強前線人手，佳斯既加入更加大大增強04既死球威力，所以今屆我真係冇理由放棄季前FF既權利囉。祈求愛隊今屆可以踢足34場GG (GOOD GAME)，令我的FF可以變成現實，可以嗎？
OK，又返返現實先！今屆奪標四大熱門，順序我會咁揀囉：拜仁＞多蒙特＞史浩克＞禾夫斯堡，咁……你呢？
資訊浩瀚；東張西望。
竭盡所能；深入求真。
企高一格；全新體法。
