紅黑兵團新彗星——羅馬奧尼｜十字聯防 Catenaccio
曼聯收購拉莫斯、奧達文迪失敗，今年夏天最重鎊嘅後衛轉會非呢位小朋友莫屬──羅馬奧尼，25M由羅馬轉到AC米蘭。相信9成9香港球迷響呢單轉會傳出之前都唔會識呢位小朋友。
羅馬奧尼今年20歲，上年由羅馬借到森多利亞，今年羅馬回收。由於羅馬今年組軍方針有變，加上羅馬近年來都唔會抗拒賣走自己當家球星，所以企硬呢個價都仲有市場，擾攘接近一個月終於正式加盟。
佢響國內已經被譽為「新尼斯達」，皆因佢嘅高度、踢法搶斷準繩同跑姿，又的確有D似，唯一唔同佢係用左腳，而且進攻及出球能力比起前輩尼斯達強，睇黎會為AC米蘭帶來唔同嘅進攻套路，呢點亦係米赫洛域不惜一切高價買來嘅原因。不過佢宜家只係20歲，只係踢左唔夠50場意甲，是龍是蟲仍係未知之數，要面對住AC重組同埋25M嘅大壓力，條路完全唔易行呀！
